Read Batak Simalungun PILEMON 1 Bible Online

PILEMON 1 - Batak Simalungun bible

PILEMON 1

¹Hun bani si Paulus, na tartutup halani Kristus Jesus, ampa si Timoteus, sanina in, hubani si Pilemon, na hinaholongan ampa hasoman sahorjanami, [1]

²ampa hubani si Appia, botounami, ampa hubani si Arkippus, hasomannami maruntol, ampa hubani kuria na martumpu i rumahmu: [2]

³Idop ni uhur ma bani nasiam ampa damei humbani Naibata Bapanta, ampa humbani Tuhan Jesus Kristus.

⁴Mangkatahon tarima kasih do ahu tongtong bani Naibatangku, siap hudingat ham bani tonggongku. [3]

⁵Ai hubogei do holong ni uhurmu ampa habujuronmu bani Tuhan Jesus pakon dompak haganup halak na mapansing. [4]

⁶Anjaha hutonggohon do, ase parsaoranmu ibagas haporsayaon in mangkorhon panandaion ma in bani haganup na madear na adong banta ibagas Kristus. [5]

⁷Holongmu ai, ham saninangku, ihorhon do bangku buei malas ni uhur ampa apoh-apoh, ai ipahinsah ham do uhur ni halak na mapansing in. [6]

⁸Halani ai, age pe barani do namin ahu ibagas Kristus, mamarentahkon bamu mambahen na patut,

⁹tapi dearan ma halani uhur holong ahu mangindo bamu, ahu, si Paulus, sada halak na dob matua, na targari nuan halani Kristus Jesus.

¹⁰Ase huelek-elek ma ham pasal si Onesimus (na marguna), anakku ibagas Kristus, na hutubuhkon sanggah na tartutup on ahu. [7]

¹¹Seng marguna hinan ia bamu, tapi sonari marguna ma bamu age bangku.

¹²Husuruh do ia mulak bamu, tampuk ni atei-ateihu do ia.

¹³Sihol do namin jolomanku ia, ase gantihmu ia laho patorsa-torsahon ahu, na tartutup on halani Ambilan Na Madear in. [8]

¹⁴Tapi seng ra ahu mambahen age aha pe, anggo seng humbani dear ni uhurmu, ase ulang ma songon paksaan dear ni layakmu, tapi humbani rosuh ni uhurmu ma. [9]

¹⁵Ra, ase sirang pe ia tongkin hun bamu, ase lalab do ia bamu,

¹⁶seng be songon sada jabolon, tapi lobih ma humbani jabolon, ai ma sanina na hinaholongan, tarlobih hu bangku, tontu lobihan ma bamu, ibagas daging ampa ibagas Tuhan in. [10]

¹⁷Ase anggo huanmu do ahu ihira ham, jalo ham ma ia songon ahu.

¹⁸Tapi, anggo adong salahni atap utangni bamu, hu bangku ma ai parkirahon ham.

¹⁹Ahu, si Paulus, manuratkon on marhitei tanganku sandiri. Ahu ma manggalar ai; seng pala tarsingatanku, na marutang do ham namin pasal dirimu hu bangku.

²⁰Ham saninangku, sihol do hun bamu maruntung ahu ibagas Tuhan in; pahinsah ham ma uhurhu ibagas Kristus.

²¹Tenger do uhurhu, sanggah na manurat on, balosanmu do na hupindohon, lobih tene humbani na huhatahon.

²²Ambah ni ai pasirsir ham ma ianan bangku, ai mangarap do ahu, halani tonggo nasiam bereon-Ni do mulak ahu bani nasiam. [11]

²³Manongos tabi bamu, si Epapras, hasomanku tartutup ibagas Kristus Jesus, [12]

²⁴sonai homa si Markus, si Aristarkus, si Demas ampa si Lukas, hasomanku sahorja. [13]

²⁵Ihasomani idop ni uhur ni Tuhan Jesus Kristus ma tonduy nasiam. [14]