Read Batak Simalungun HEBER 1 Bible Online

HEBER 1 - Batak Simalungun bible

HEBER 1

¹Gati anjaha bagei do sapari dalan ni Naibata mamparsahapkon ompungta marhitei nabi-nabi in,

²tapi bani panorang parpudi on iparsahapkon do hita marhitei Anak-Ni, ai ma na pinabangkit-Ni gabe sitean haganup, parhiteian-Ni homa manompa sagala na adong. [1]

³Sinalsal ni hasangapon-Ni ampa usihan ni hadirion-Ni do Ia, anjaha Ia do na manatang haganup na adong in marhitei hata-Ni na marhagogohon in. Dob iadongkon haborsihon humbani sagala dousa, laho do Ia hundul hu siamun ni Hamuliaon in, na i babou ai. [2]

⁴Songon lobih ni goran na tinean-Ni ai humbani goran ni sagala malekat, sonai do surung ni hasangapon-Ni humbani sidea.

⁵Ai hubani malekat na ija ma ongga ihatahon, “Anakku do ho, sadari on do ho hutubuhkon?” Dob ai use, “Ahu do gabe Bapa bani, anjaha Ia anak Bangku?” [3]

⁶Anjaha, sanggah na sihol arahkonon-Ni hu dunia on Anak-Ni, na parlobei tubuh in, ihatahon do, “Maningon do manrogop hu lobei-Ni sagala malekat ni Naibata.” [4]

⁷Tongon, ihatahon do pasal malekat, “Ia mambahen logou malekat-Ni, apuy na marjimbur-jimbur do juakjuak-Ni.” [5]

⁸Tapi ihatahon do pasal Anak in, “Ronsi sadokah ni dokahni do paratas-Mu, Ham Naibata, tungkot hapintoron do tungkot ni harajaon-Mu.

⁹Holong do uhur-Mu bani hapintoron anjaha magigi bani na salah, halani ai do ase iminakkon Naibata-Mu minak malas ni uhur Bamu, Ham Naibata, lobih humbani hasoman-Mu.” [6]

¹⁰Ihatahon do homa, “Ham do, ale Tuhan, na pajonam tanoh on bani mulani, anjaha jadi-jadian ni tangan-Mu do langit in. [7]

¹¹Magou do ganupan in use, tapi totap do anggo Ham, laho buruk do in ganup songon hiou.

¹²Sorpihon-Mu do in ganup songon baju mantel, gabe mubah ma, tapi anggo Ham, totap do, anjaha tahun-Mu pe seng marujung.

¹³Tapi bani malekat na ija ma ongga ihatahon, “Hundul ma ho hu siamunkon, paima hubahen munsuhmin sidogeian ni naheimu?” [8]

¹⁴Ai lang tonduy siparugas do sidea haganup, na sinuruh mangidangi halani sitean haluahon in? [9]