Read Batak Simalungun HEBER 10 Bible Online

HEBER 10 - Batak Simalungun bible

HEBER 10

¹Jadi halani halinoh ni parulihan na sihol roh do hansa titah in, sedo anggo badanni sandiri, halani ai seng tarbahen titah in mambahen gokan dear sagala na roh hujin, mamboan galangan na dos torus siap tahun. [93]

²Ai ambit sonai, parontihonon ma na manggalang ai, halani seng adong be dousa idingat sidea siparsombah ai, anggo domma borsih hinan sidea santorap.

³Tapi halani galangan ai, puho do pardingat bani dousa ai ganup tahun. [94]

⁴Ai seng tarbahen daroh ni lombu jonggi atap hambing tunggal pasaloseihon dousa.

⁵Halani ai, nini do bani parmasukni hu dunia on, “Seng ihasiholhon uhur-Mu galangan atap sibere-bere, tapi badan do ipasirsir Ham bangku.

⁶Seng marosuh uhur-Mu bani galangan situtungon barang bani galangan pardousaon.”

⁷Jadi ningku ma, “Tonggor ma, na roh ma Ahu mangkorjahon rosuh ni uhur-Mu, ale Naibata; bani buku gulungan in do tarsurat pasal Ahu.” [95]

⁸Ase, anggo ihatahon lobei, “Seng ihasiholhon uhur-Mu anjaha seng marosuh uhur-Mu bani galangan, sibere-bere, galangan situtungon barang galangan pardousaon, age pe igalangkon namin ai romban hubani titah,”

⁹anjaha dob ai use ihatahon, “Tonggor ma, na roh ma Ahu mangkorjahon rosuh ni uhur-Mu, ijai ma iparontihon na parlobei ai, laho pajongjongkon na paduahon ai.”

¹⁰Anjaha marhitei rosuh-Ni ai gabe pansing do hita, halani badan ni Jesus Kristus, na dob ginalangkon-Ni ai, torus lalab marhitei na sahali ai. [96]

¹¹Ia malim-malim, ganup do jongjong ari-ari marugas, laho manggalangkon galangan na sarupa marnunut, na so boi ongga tongon pasaloseihon dousa. [97]

¹²Tapi anggo Ia, sada galangan hansa iboan laho pasaloseihon dousa; dob ai laho ma Ia hundul sadokah ni dokahni hu siamun ni Naibata. [98]

¹³Na paima-imahon ma Ia hunjai nari, ronsi ipatunduk munsuh-Ni gabe sidogei-dogeian ni nahei-Ni. [99]

¹⁴Ai marhitei sada galangan, gok do dearni ipajongjong ronsi sadokah ni dokahni, sagala na ra papansingon-Ni. [100]

¹⁵Dihut do Tonduy Na Pansing manaksihon ai banta, ai ihatahon do lobei,

¹⁶“On do padan sibahenon-Ku bani sidea, dob salpu panorang ai,” nini Tuhan in, “Nahkonon-Ku do titah-Ku hubagas uhur ni sidea, anjaha suratkonon-Ku do ai hubagas atei-atei ni sidea.” [101]

¹⁷Dob ai use, “Anjaha seng be ingaton-Ku dousa ni sidea pakon hajahaton ni sidea.” [102]

¹⁸Ase anggo domma sasap ai, seng be masa galangan pardousaon.

¹⁹Ai pe nasiam sanina, halani domma adong banta hinsah ni uhur laho masuk hubagas ianan na mapansing ai ibagas daroh ni Jesus, [103]

²⁰humbani dalan na baru anjaha na manggoluh ai, na ibuka banta, manlopusi hirei-hirei ai, ai ma daging-Ni ai, [104]

²¹anjaha domma adong homa banta malim bolon, na manggomgom Rumah ni Naibata,

²²halani ai, dohori hita ma Naibata, maruhur na sintong, ibagas haporsayaon na gok, maruhur na dob hona uras humbani panggora ni uhur na sambor ampa ibagas angkula na dob pinapansing marhitei bah na borsih. [105]

²³Poltik ma jolom hita pangarapan na dob niakuhonta in, ai hatengeran ni uhur do na marbagahkonsi. [106]

²⁴Pardiateihon hita ma samah hita, ase marsiojuran hita mandalankon holong ampa horja na madear, [107]

²⁵anjaha ulang ma tadingkon hita partumpuanta, songon na dob somal bani deba halak, tapi lambin marsipagolpaan ma hita, halani na lambin dohor ma ari ai ididah nasiam. [108]

²⁶Ai anggo ituntun hita mardousa, dob sompat ijalo hita panandaion bani hasintongan in, seng adong be dapot galangan pasaloseihon dousa. [109]

²⁷Uhum mando sipaimaon ibagas biar ampa apuy ringis, na mangagouhon sagala sipanlawan.

²⁸Na manlanggar titah ni si Musa, maningon do matei, seng dong be idop ni uhur, anggo adong dua barang tolu halak na manaksihon ai. [110]

²⁹Timbang nasiam ma, ai lang boratan ma uhum mangonai bani jolma, na mandogei-dogei Anak ni Naibata anjaha na so mangkargai daroh parpadanan in, na dob papansingkonsi, anjaha na pahirihon Tonduy Paridop ni uhur in? [111]

³⁰Ai itanda hita do Ia, na mangkatahon, “Ahu do simada pambalason, sai na balaskonon-Ku do!” Dob ai use ihatahon do, “Uhumon ni Tuhan in do bangsa-Ni.” [112]

³¹Jangin ni in, madabuh hu tangan ni Naibata na manggoluh in!

³²Tapi ingat nasiam ma panorang na dob salpu ondi. Ijia, dob ipalihar nasiam, tahan do nasiam ibagas buei paruntolon na marhamarsikon. [113]

³³Deba nasiam gabe sitontonan halani apas-apas ampa hamarsikon, na deba nari dihut manaron homa halani halak na manaron ai. [114]

³⁴Ai rap manaron do nasiam pakon halak na tartutup, anjaha age hona rampas arta nasiam, malas do uhur nasiam ijai, halani ibotoh nasiam, adong ope bani nasiam arta sidearan anjaha na totap. [115]

³⁵Ai pe, ulang ma ambukkon nasiam hinsah ni uhur nasiam, ai banggal do upah balas ni in!

³⁶Hasabaron do na porlu bani nasiam, laho mandalankon rosuh ni uhur ni Naibata, ase dapot nasiam bagah-bagah in. [116]

³⁷Ai tongkin nari tumang mando, roh ma na sihol roh, anjaha seng padokah-dokahonni. [117]

³⁸Tapi humbani haporsayaon do manggoluh parpintor in, anjaha seng marosuh uhur hubani halak na surut. [118]

³⁹Tapi seng surut anggo hita ase hu hamagouan; na porsaya do laho paluahkon tonduy.