Read Batak Simalungun HEBER 12 Bible Online

HEBER 12 - Batak Simalungun bible

HEBER 12

¹Ase, halani domma songon hombun buei ni saksi manginggoti hita, tadingkon hita ma sagala na paboratkon ampa dousa na manrahuti hita, anjaha marsabar ni uhur ma hita marlintun bani parlumbaan na adong i lobeita. [148]

²Ibagas ai mangkawah ma hita dompak Jesus, sipungkah ampa sidobkon haporsayaon in, na manaronkon parsilang ai, gantih ni malas ni uhur na i lobeini, anjaha seng ihira hailaon ai, gabe hundul i siamun ni paratas ni Naibata.

³Ingat nasiam ma Ia, na manaronkon parlawanon na sonai dompak-Si humbani pardousa, ase ulang marnaloja nasiam, mandolei uhur nasiam. [149]

⁴Bani paruntolon nasiam mangimbang dousa, seng ongga ope tiris daroh nasiam maruntol.

⁵Ai domma lupa nasiam bani sipaingat, na hinatahon bani nasiam songon na bani anak, “Ale anakku, ulang ma hampung uhurmu bani pangajarion ni Tuhan in, anjaha ulang ma mandolei anggo ipinsang, [150]

⁶ai iajar Tuhan in do na hinaholongan ni uhur-Ni, anjaha ilonsing do anak na niain-Ni. [151]

⁷Sabar ma nasiam, gabe pangajarion do on bani nasiam, ai anak-Ni do nasiam ijai ihira Naibata. Ai ija ma adong anak na so niajar ni bapani?

⁸Ai anggo seng hona ajar nasiam, songon na dob mangonai ai bani haganup, anak salong-salongan ma nasiam ai, seng anak na botul. [152]

⁹Ambah ni ai, bapanta pardagingon do sipangajar banta, anjaha mabiar do hita bani sidea; ai lang patut ma lambin marunduk ni uhur hita bani Bapa ni Tonduy, ase manggoluh hita? [153]

¹⁰Ai anggo sidea, tongkin do hita iajar domu hubani partimbangan ni sidea, tapi Ia, hubani na marguna banta do, ase parrupei hita bani hapansingon-Ni.

¹¹Sagala pangajaran tongon, sanggah hamamasani seng malas ni uhur, tapi pusok ni uhur do ai ahapkonon, tapi use ihorhon ai do buah hapintoron na marisi damei bani sagala na dob tarlatih ibagas ai.” [154]

¹²Halani ai, pagostong nasiam ma tangan na galek-galek, anjaha patotap nasiam ma towod na hitir-hitir. [155]

¹³Papintor nasiam ma dalan sidalanan ni nahei nasiam ase ulang puhei nahei na repat in, tapi malum ma namin. [156]

¹⁴Porluhon nasiam ma ase mardamei nasiam hubani haganup halak anjaha margoluh na mapansing, halani anggo seng sonai, seng boi idahon ni atap ise Tuhan in. [157]

¹⁵Jaga nasiam ma ase ulang adong na liah bani idop ni uhur ni Naibata, ase ulang martumbor urat na paet, na mangkorhon hasunsahan anjaha buei halak butak ibahen. [158]

¹⁶Ulang ma adong siparriah-riah atap na marhabutakon songon si Esau, na manjualhon hak sikahanan halani sipanganon na otik. [159]

¹⁷Ai ibotoh nasiam do dobni, sanggah na sihol teanonni pasu-pasu ai namin, itulak do ia; ai seng jumpahsi be panorang paubahkon uhur age pe mariluh-iluh ia mangindohon. [160]

¹⁸Ia sijumpahkonon nasiam ai sedo na tarjamah, apuy na gajag, barang na golap, barang na lotir, barang haba-haba, [161]

¹⁹barang parhata ni tarompit ampa sora ni hata, pala mangelek-elek na mambogeisi, ase ulang hubani sidea ipadompak hata ai;

²⁰ai seng tartahan sidea parentah ai, na mangkatahon, “Age pinahan, anggo dais hu dolog ai, maningon matei do pargijigon.” [162]

²¹Pala do ihatahon si Musa halani jangin ni na nididahni ai, “Mabiar do ahu anjaha hitir-hitir.”

²²Tapi Dolog Sion in do iparayak nasiam ampa huta ni Naibata na manggoluh in, ai ma Jerusalem na i nagori atas ai, ampa malekat na marlaksa-laksa ai, ampa humpulan pesta, [163]

²³ampa kuria ni na parlobei tubuh ai, na dob tarsurat i nagori atas, ampa Naibata, siuhum haganup, ampa tonduy ni parpintor na dob gokan dear ai, [164]

²⁴ampa Jesus, Siholang ni parpadanan na baru ampa daroh, na pinispiskon ai, parsora sidearan humbani daroh ni si Abel. [165]

²⁵Jaga ma nasiam, ulang das itulak nasiam Ia, na marsahap in. Ai anggo seng maluah sidea, halani ijua sidea na palumbahon sidea i tanoh on, lambin sonaha ma hita, anggo itundali hita Ia, na hun nagori atas in? [166]

²⁶Tanoh on do idugur sora-Ni ijia, tapi sonari marlumba-lumba do Ia, “Duguron-Ku do sahali nari, seng pitah tanoh on, dihut do nagori atas.” [167]

²⁷Hata na mangkatahon “Sahali nari” patuduhkon na mubah ma na tardugur on, in ma na tinompa on, ase totap na so tardugur ai.

²⁸Halani ai, mangkatahon tarima kasih ma hita, ai ijalo hita do harajaon na so tardugur, anjaha ibagas ai iidangi hita ma Naibata domu hubani rosuh-Ni, marhasoman hormat ampa biar,

²⁹ai apuy na mangankon do Naibatanta. [168]