Read Batak Simalungun HEBER 13 Bible Online

HEBER 13 - Batak Simalungun bible

HEBER 13

¹Holong ni uhur bani sanina, sai totap ma ai. [169]

²Ulang ma halupahon nasiam partamueion, ai marhitei na sonai ongga do itamuei halak malekat seng ibagas botohni. [170]

³Ingat nasiam ma na tartutup, songon na dihut nasiam tartutup, sonai homa na hona arsik-arsik, ai nasiam pe ibagas angkula do. [171]

⁴Sangap ma parunjukon bani haganup halak, ulang butak podoman, ai uhumon ni Naibata do parriah-riah ampa parbangkis. [172]

⁵Ulang ma mata duiton parlahou nasiam, hasonangkon nasiam ma na adong, ai Ia sandiri do mangkatahon, “Sabonar na so tadingkonon-Ku do ho, sabonar na so paturuton-Ku do ho!” [173]

⁶Halani ai, tenger do uhurta mangkatahon, “Tuhan in do pangurupi bangku, seng mabiar ahu, aha ma boi bahenon ni jolma bangku?” [174]

⁷Dingat nasiam ma na mambobahon nasiam, na mangkatahon hata ni Naibata bani nasiam; ujung ni pardalanan ni sidea ma tonggor nasiam, anjaha tiru nasiam ma haporsayaon ni sidea. [175]

⁸Ia Jesus Kristus totap do, sonai nantuari, sonai do sadari on, lanjar sonai do ronsi sadokah ni dokahni. [176]

⁹Ulang ma ra nasiam taruyun halani podah na marbagei-bagei anjaha na legan. Dear ma gabe toguh uhurta marhitei idop ni uhur, sedo halani aturan-aturan pasal sipanganon, na so marguna bani na mandalankonsi. [177]

¹⁰Adong do banta anjapanjap; seng marhak mangankon hunjai siparugas na i lampolampo ai. [178]

¹¹Ai idarat ni parsaranan ai do itutung daging ni pinahan, dob iboan sintua ni malim daroh ai hubagas kamar na pansing ai, halani dousa. [179]

¹²Halani ai Jesus pe idarat ni horbangan ai do Ia marsitaronon, ase ipapansing bangsa-Ni marhitei daroh-Ni sandiri. [180]

¹³Ase, laho ma hita hubani Jesus hudarat ni parsaranan ai, mamorsan hadorunon-Ni ai. [181]

¹⁴Ai seng dong banta ijon huta na totap, tapi ipindahi hita do na sihol roh ai. [182]

¹⁵Anjaha marhiteihon-Si ma galangkon hita tongtong bani Naibata galangan puji-pujian, ai ma buah ni bibir, na mangakui goran-Ni in. [183]

¹⁶Mambahen na madear ampa na marsibere-bere, ulang ma halupahon nasiam ai, ai galangan na sonai do iharosuhkon Naibata. [184]

¹⁷Tangihon nasiam ma na mambobahon nasiam, anjaha balosi nasiam ma sidea. Ai sidea do manjagai tonduy nasiam, anjaha martanggung jawab pasal ai. Sihol ma marmalas ni uhur sidea mandalankon ai, ulang ma marhoih-hoih, ai seng marguna ai bani nasiam. [185]

¹⁸Tonggohon nasiam ma hanami. Ai tenger do uhurnami, paboa borsih do panggora ni uhurnami, halani ihaporluhon hanami marparlahou na madear ibagas haganup. [186]

¹⁹Lambin iojur hanami do nasiam mangkorjahon ai, andohar lambin podasni ahu ipaulak bani nasiam.

²⁰Tapi Naibata Sipardamei in, na mangarahkon humbani na matei Siparmahan bolon ni biribiri in, marhitei daroh parpadanan sisadokah ni dokahni, in ma Tuhanta Jesus. [187]

²¹Ia ma pasirsirhon nasiam bani sagala na madear, laho mangkorjahon rosuh ni uhur-Ni, anjaha manjadihon ibagas hita, rosuh ni uhur-Ni marhitei Jesus Kristus! Bani ma hasangapon ronsi sadokah ni dokahni! Amen.

²²Tapi huojur ma nasiam sanina, jalo nasiam ma hata podah in ai pondok do husuratkon bani nasiam.

²³Botoh nasiam ma, na dob maluah do saninanta si Timoteus, ai ma hasomanku mangidah nasiam, anggo podas ia roh.

²⁴Padas nasiam ma tabinami bani haganup na mambobahon nasiam ampa haganup halak na mapansing. Manongos tabi do bani nasiam hasoman na hun Italia.

²⁵Idop ni uhur ma bani nasiam haganup!