Read Batak Simalungun HEBER 3 Bible Online

HEBER 3 - Batak Simalungun bible

HEBER 3

¹Halani ai, nasiam sanina na mapansing, siparrupei bani pandiloon na hun nagori atas, tonggor nasiam ma Apostel anjaha Sintua ni Malim in, na sinaksihonta in, ai ma Jesus. [22]

²Hatengeran ni uhur do Ia bani na pabangkitkon-Si, songon si Musa ibagas ganup rumahni ai. [23]

³Tapi bueian do hasangapon ibere Bani ase hubani si Musa, domu hubani surung ni hasangapon bani na pajongjong rumah marimbang rumah na pinajongjong ni ai.

⁴Ai ganup rumah, adong do na paulihonsi, tapi Naibata do na mangadongkon haganup.

⁵Ia si Musa tongon, haposan do ia i rumah ni Naibata, songon siparugas, laho manaksihon na sihol sisahapkononkon ope use,

⁶tapi anggo Kristus haposan do songon Anak, na manggomgomi rumah ni Naibata, anjaha hita do rumah-Ni ai, anggo poltik ijolom hita ronsi ujungni hinsah ni uhur ampa tenger ni uhur bani na niarapkon ai. [24]

⁷Halani ai, songon na hinatahon ni Tonduy Na Pansing, “Sadari on, sanggah na binogei nasiam sora-Ni,

⁸ ulang ma pamapir nasiam uhur nasiam, songon sanggah ari parlawanon ai, sanggah ari parlajouan ai i halimisan. [25]

⁹Ijai ilajou anjaha isuba ompung nasiam do Ahu, age pe ididah sidea na Huhorjahon ompat puluh tahun dokahni.

¹⁰Halani ai manggila do Ahu bani na sasundut ai anjaha Huhatahon, ʻTongtong do kahou uhur ni sidea, seng itanda sidea dalan-Ku,ʼ

¹¹pala marbija Ahu ibagas ringis-Hu, sabonar seng bulih masuk sidea hu parsaranan-Ku. [26]

¹²Nasiam sanina, jaga ma nasiam, ase ulang adong paruhur na jahat, na so porsaya humbani nasiam, na manundali Naibata na manggoluh in.

¹³Tapi marsipagolpaan ma nasiam ganup ari, sadokah hata ʻSadari onʼ marlaku ope, ase ulang adong humbani nasiam, na gabe mapir uhurni halani dousa na paoto-otohon in. [27]

¹⁴Ai domma parrupei hita bani Kristus, anggo poltik ijolom hita tenger ni uhur, na dob adong banta bani mulani ronsi ujungni. [28]

¹⁵On do na hinatahon ni Surat in, ʻSadari on, sanggah na binogei nasiam sora-Ni, ulang ma pamapir nasiam uhur nasiam, songon sanggah ari parlawanon ai.ʼ [29]

¹⁶Ise do sipanlawan ai, age pe ibogei sora-Ni? Ai lang haganup do sidea, na mandarat hun Masir, binobahon ni si Musa?

¹⁷Ise do na ginilaan-Ni ai pala ompat puluh tahun dokahni? Ai lang sidea na mardousa ai do? Radag do bangkei ni sidea i halimisan ai. [30]

¹⁸Dompak ise do Ia marbija, paboa na so bulih sidea masuk hu parsaranan-Ni ai? Ai lang dompak sidea na so sipambalosi ai do?

¹⁹Jadi ididah hita ma, halani na so porsaya do sidea ase lang tarbahen sidea masuk.”