Read Batak Simalungun HEBER 5 Bible Online

HEBER 5 - Batak Simalungun bible

HEBER 5

¹Ai sagala sintua ni malim, na pinilih humbani jolma, ipabangkit do halani jolma, laho marugas i lobei ni Naibata, ase igalangkon sibere-bere ampa galangan halani dousa.

²Na tarbahen do ia mangahapkon ahap ni na oto ampa na kahou, ai ia pe ibagas hagalekon do. [39]

³Halani ai maningon mamboan galangan pardousaon do ia, sedo halani bangsa ai hansa, tapi dihut do halani dirini. [40]

⁴Anjaha seng adong na mambuat hamuliaon na sonai bani dirini, tapi na nidilo ni Naibata do ia hujai songon si Aron. [41]

⁵Sonai do homa Kristus in, seng Ia pasangap diri-Ni gabe Sintua ni Malim, tapi Naibata do, na dob mangkatahon hu Bani, “Anak-Ku do Ho, sadari on do Ho Hutubuhkon.” [42]

⁶Bani ianan na legan homa ihatahon do, “Malim do Ho ronsi sadokah ni dokahni mangihutkon orde ni si Melkisedek.”

⁷Sanggah jolma Ia, igalangkon do pangindoan-Ni ampa elek-elek-Ni marhasoman doruh banggal ampa iluh hubani na boi paluahkon-Si humbani hamatean, anjaha itangihon do Ia, gabe maluah humbani habiaran ai. [43]

⁸Ai age pe Anak Ia, iguruhon do pambalosion marhitei na tinaron-Ni ai. [44]

⁹Anjaha dob gabe gokan dear Ia, jadi bona ni haluahon sisadokah ni dokahni do Ia bani haganup, na mambalosi-Si. [45]

¹⁰Igoran Naibata do Ia Malim mangihutkon orde ni si Melkisedek.

¹¹Buei ope namin sihatahononnami pasal ai, tapi payah do patorangkon ai bani nasiam, halani na so marpangarusion ai nasiam.

¹²Ai marimbang dokahni ai domma patut jadi guru nasiam, hape maningon porlu ope ajarhonon bani nasiam humbani pangajaran pamungkah ni hata ni Naibata, gabe dadih mando porlu bani nasiam, sedo sipanganon na koras. [46]

¹³Ai sagala siinum dadih, seng marpambotoh ope ai bani ajaran na sasintongni, halani dakdanak ope ai. [47]

¹⁴Tapi sipanganon na koras, ai ma bani na dob matoras, na dob pasomal-somalhon dirini, gabe ibotoh parleganan ni na madear ampa na masambor. [48]