Read Batak Simalungun HEBER 6 Bible Online

HEBER 6 - Batak Simalungun bible

HEBER 6

¹Halani ai tadingkon hita ma lobei podah pamungkah pasal Kristus, anjaha toruskon hita ma hubani podah bani halak na dob matoras. Ulang be naulaki pauli onjolan pasal na paubahkon uhur humbani horja hamatean ampa na mangkaporsayai Naibata,

²podah pasal pandidion ampa na manampeihon tangan, pasal parpuhoon ni halak na dob matei ampa paruhuman sisadokah ni dokahni.

³Anjaha bahenonta do ai, anggo ilopas Naibata.

⁴Ia sidea, na dob ongga santorap ipalihar, idai sibere-bere parnagori atas ai, gabe parrupei bani Tonduy Na Pansing, [49]

⁵na dob idai hata na mantin na humbani Naibata ampa hagogohon ni dunia simagira,

⁶anggo marbalik sidea, sabonar na so tarpabayu be sidea, ase mubah use, ai na dob mangulaki mamparsilangkon Anak ni Naibata do sidea ijai anjaha ipabador, gabe hamagouan ni sidea sandiri.

⁷Ai tanoh, na mangonsop bah udan, na sai roh hujai, anjaha itubuhkon suan-suanan na marguna bani na mangkorjahonsi, ai do na dapotan pasu-pasu humbani Naibata,

⁸tapi tanoh na manubuhkon hupihupi ampa duri-duri, seng na marguna ai, sipapaan ma ai podas, anjaha mosogkonon bani ujungni.

⁹Tapi age pe sonai hatanami, nasiam na hinaholongan, tenger do uhurnami sidearan ai do bani nasiam, ai ma na mamboan hu haluahon.

¹⁰Ai sedo na geduk Naibata, gabe lupa Ia bani pambahenan nasiam ampa bani holong ni uhur nasiam, na pinatuduhkon nasiam bani goran-Ni, marhitei pangidangi nasiam hinan ampa sorani bani halak na mapansing in. [50]

¹¹Tapi ipindo uhurnami do, ase ganup ma nasiam patuduhkon porlu ni uhur na sonai, ai ma marsijoloman botul bani pangarapan in ronsi ujungni, [51]

¹²ase ulang gabe rayohan nasiam, tapi tiru nasiam ma sidea, sitean bagah-bagah ai, marhitei na marhaporsayaon ampa marsabar ni uhur.

¹³Ai sanggah na mambere bagah-bagah-Ni Naibata bani si Abraham, halani seng dong be sibanggalhononni parbijaan-Ni, hubani siri-Ni sandiri do Ia marbija, [52]

¹⁴nini, “Tongon pasu-pasuon-Ku do ho, anjaha tongon pabueion-Ku tumang do ho.”

¹⁵Jadi, halani sabar ia paima-imahon, gabe dapotsi do bagah-bagah ai.

¹⁶Ia jolma, sibanggalhonni do ibahen parbijaanni, anjaha bija ai do mangujungi sagala parsalisihan lanjar songon jaminan do ai. [53]

¹⁷Halani ai, Naibata pe, bija do ipakei manjamin, laho patuduhkon bani sitean bagah-bagah ai sura-sura-Ni na so ra mubah ai,

¹⁸ase marhitei na adong banta dua fakta na so mubah-ubah in, ibagas ai seng boi Naibata marladung, adong do banta apoh-apoh na margogoh, banta na marhaporusan hujai laho marsijoloman hubani pangarapan na i lobeita ai.

¹⁹Ia pangarapan in, ai ma songon sauh bani tonduyta, na totap anjaha na toguh, na masuk das hubagas hirei-hirei ai.

²⁰Hujai do masuk, gabe parlobeita, Jesus, na dob gabe Sintua ni Malim sadokah ni dokahni, mangihutkon aturan ni si Melkisedek. [54]