Read Batak Simalungun HEBER 7 Bible Online

HEBER 7 - Batak Simalungun bible

HEBER 7

¹Ia si Melkisedek, ai ma raja ni Salem, malim ni Naibata na Timbul in, ialo-alo anjaha ipasu-pasu do si Abraham sanggah mulak, dob italuhon raja-raja, [55]

²anjaha ibere si Abraham do bani saparsapuluh ni haganup na adong bani. Parlobei arti ni goranni ai, “Raja Hapintoron”, dob ai “Raja Salem”, artini, Raja Hadameion.

³Anggo ia, seng marbapa, seng marinang, seng marpartuturan, seng dong parmulaan ni arini barang ujung ni goluhni, anjaha halani hadosanni pakon Anak ni Naibata, ia pe malim do tongtong ronsi sadokah ni dokahni.

⁴Tapi tonggor nasiam ma sangapni in, si Abraham, ompungta parsadaan ai pe, mambere do bani saparsapuluh humbani taban-tabanni.

⁵Tongon, ginompar ni si Levi pe, na manjalo jabatan hamalimon in, adong do bani sidea aturan mangihutkon titah in manjalo parsapuluhan humbani bangsa in, ai ma humbani sanina ni sidea, age pe ginompar ni si Abraham homa. [56]

⁶Tapi si Melkisedek, na so adong partuturanni hubani sidea, manjalo parsapuluhan do humbani si Abraham, anjaha ipasu-pasu do haondosan ni bagah-bagah ai.

⁷Anjaha seng tarparnalang on, sisangapan do na mamasu-masu sietekan.

⁸Ambahni ai, ia halak Levi, na manjalo parsapuluhan ai, jolma na ra matei do, tapi pasal na legan ai isaksihon do, manggoluh do ia.

⁹Ase tarhatahon ma, ibagas si Abraham sibere parsapuluhan do age si Levi, sijalo parsapuluhan ai namin,

¹⁰ai ibagas angkula ni ompungni si Abraham ope ia, sanggah na roh si Melkisedek mangalo-alosi.

¹¹Ambit domma dapot hadearon na gok marhitei hamalimon ni halak Levi (ai maronjolan hujai do ijalo bangsa ai titah in), mase ma pala pajongjongon malim na legan, mangihutkon aturan ni si Melkisedek, na so mangihutkon aturan ni si Aron. [57]

¹²Ai anggo marubah hamalimon, tontu maningon marubah ma homa titah.

¹³Anjaha Ia, na tinarsingatan ni hata on, masuk marga na legan do; seng ongga adong na humbani marga ai na marugas bani anjapanjap in. [58]

¹⁴Ai torang do, humbani marga Juda do marharorohan Tuhanta, anjaha seng adong itarsingati si Musa hamalimon ni na samarga on. [59]

¹⁵Lambin torangni ma homa ai, halani ipabangkit do sada Malim na legan, na usih hubani si Melkisedek,

¹⁶na so marhitei aturan pardagingon gabe malim, tapi marhitei gogoh ni goluh na so marpunsa do.

¹⁷Ai isaksihon do pasal-Si, “Malim do Ho ronsi sadokah ni dokahni mangihutkon orde ni si Melkisedek.” [60]

¹⁸Marhitei ai iparontihon ma titah na parlobei ai, halani seng margogoh anjaha marguna.

¹⁹Ai aha pe lang na pinajongjong ni titah in na gabe gokan dear. Halani ai ipamasuk ma pangarapan sidearan, parhiteianta mandohori Naibata. [61]

²⁰Anjaha seng masa ai, anggo lang marhitei bija. Sidea tongon, gabe malim do, seng pala marbija,

²¹tapi anggo on, marhitei bija do, na binijahon ni na mangkatahon ai hu Bani: Domma marbija Tuhan in, anjaha seng solsolan-Ni diri-Ni, “Ho do malim sadokah ni dokahni.”

²²Mardomu hujai, surungan do padan, na jinalomin marhitei Jesus.

²³Anjaha buei do sidea na gabe malim, halani seng torus sidea malim pambahen ni hamatean.

²⁴Tapi anggo Ia, halani totap do ronsi sadokah ni dokahni, seng boi mandipar hamalimonni bani halak na legan.

²⁵Halani ai, tarbahensi do mambere haluahon na totap bani sagala na mandohori Naibata marhiteihonsi, ai na manggoluh do Ia tongtong laho mangapiti sidea. [62]

²⁶Sintua ni malim na sonin do patut banta, na pansing, na so ongga marsalah, na so martikas, sirang humbani pardousa, na dob gabe gijangan humbani nagori atas, [63]

²⁷na so pala songon sintua ni malim na legan, padaskon ganup ari parlobei galangan halani dousani sandiri, dob ai pe halani dousa ni bangsa ai, ai sahali do ihorjahon in, sanggah ginalangkon-Ni ai diri-Ni. [64]

²⁸Ai ipabangkit titah in do jolma na galek gabe sintua ni malim, tapi bija, na pudinan humbani titah in do na pabangkitkon Anak in, na dob gabe gokan dear ronsi sadokah ni dokahni. [65]