Read Batak Simalungun HEBER 8 Bible Online

HEBER 8 - Batak Simalungun bible

HEBER 8

¹Ia siporlunan bani na dob hinatahon ai, ai ma: Adong do banta Sintua ni Malim, na dob laho hundul hu siamun ni paratas ni Hamuliaon in i nagori atas, [66]

²siparugas bani ianan na tang pansing, ai ma lampolampo na sintong ai, na pinauli ni Tuhan in, sedo jolma.

³Ai sagala sintua ni malim ipabangkit do, laho manggalangkon sibere-bere ampa galangan, ase maningon adong do age Bani sigalangkonon-Ni. [67]

⁴Ambit i dunia on Ia sonari, tontu seng malim Ia, ai adong ijin malim, na manggalangkon sibere-beere mangihutkon titah.

⁵Parugason ni sidea ai ma usihan ampa halinoh ni na i nagori atas ai, songon na dapotan parentah si Musa hun babou, sanggah sihol paulionni rumah panumbahan in, “Ingat ma,” nini mangkatahon, “Paulihon ganupan in domu hubani usihan, na dob pinatuduhkon bam i atas dolog in!” [68]

⁶Tapi Jesus, dapot-Si do jabatan hamalimon sisurungan, ai Ia do siholang bani parpadanan sidearan, na itotapkon maronjolan bani bagah-bagah sidearan. [69]

⁷Ai ambit lang adong sihataon bani padan na parlobei ai, tontu seng pala porlu na paduahon on.

⁸Tapi hona hata do sidea, nini, “Tonggor ma, nini Tuhan in, na roh ma ari, pajongjongon-Ku ma ijai padan na baru bani ginompar ni Israel pakon Juda! [70]

⁹Seng songon padan na Hubahen bani ompung ni sidea, sanggah na Hutangkap tangan ni sidea, laho mamboan sidea luar hun tanoh Masir; ai seng totap sidea bani padan-Kin, anjaha Ahu pe seng Husarihon be sidea, nini Tuhan in.”

¹⁰“Tapi on do padan, sibahenon-Ku hubani ginompar ni Israel, dob salpu panorang ai,” nini Tuhan in, “Hubagas uhur ni sidea do nahkonon-Ku titah-Ku, anjaha hubani atei-atei ni sidea do suratkonon-Ku ai, gabe Ahu do Naibata ni sidea, anjaha sidea gabe bangsang-Ku.

¹¹Anjaha seng pala be ajaran ni sada halak hasomanni sabangsa barang hatahononni hubani saninani, ʻTanda ma Tuhan in,ʼ ai haganup do sidea manandai Ahu, na etek age pe na magodang.

¹²Marpangulaki do uhur-Hu pasal panlanggaran ni sidea, anjaha seng be paingat-ingaton-Ku dousa ni sidea.”

¹³Marhitei na isahapkon padan na baru, ihira Naibata do padan na parlobei ai domma matua. Anjaha sagala na dob buruk anjaha matua, podas ma laho salpu ai. [71]