Read Batak Simalungun 1 JOHANNES 5 Bible Online

1 JOHANNES 5 - Batak Simalungun bible

1 JOHANNES 5

¹Ganup na porsaya, Jesus do Kristus, ai ma na dob tubuh humbani Naibata, anjaha ganup na mangkaholongi Ia, na manubuhkon-Si, holong do homa uhur-Ni bani halak na dob tubuh hun Bani. [55]

²Hunjon do ibotoh hita, na dob holong uhurta bani Anak ni Naibata, anggo holong uhurta bani Naibata anjaha ihorjahon hita titah-Ni.

³Ai on do holong ni uhur bani Naibata, anggo idalankon hita titah-Ni, anjaha seng borat titah-Ni in. [56]

⁴Ai sagala na dob tubuh humbani Naibata, ai do na manaluhon dunia on. Haporsayaonta, in do na dob monang manaluhon dunia on. [57]

⁵Ise do na manaluhon dunia on, anggo lang na porsaya, paboa Jesus do Anak ni Naibata?

⁶Ia do in, na dob roh marhitei bah pakon daroh, ai ma Jesus Kristus, seng pitah ibagas bah, tapi ibagas bah ampa daroh do. Anjaha Tonduy in do na manaksihon, ai Tonduy in do hasintongan. [58]

⁷Ai tolu do na manaksihon,

⁸ai ma Tonduy in, bah in ampa daroh in, anjaha sada do na tolu in.

⁹Ia hasaksian humbani jolma ijalo hita do, tapi banggalan do hasaksian na humbani Naibata, ai hasaksian na humbani Naibata do on, na sinaksihon-Ni pasal Anak-Ni in.

¹⁰Na porsaya bani Anak ni Naibata, ijolom do hasaksian in. Na so porsaya bani Naibata, ibahen do Ia parladung, halani lang porsaya ia bani na sinaksihon ni Naibata pasal Anak-Ni in. [59]

¹¹Anjaha on do na sinaksihonni ai, ai ma, na dob ibere Naibata do banta hagoluhan na sadokah ni dokahni, anjaha ibagas Anak-Ni in do hagoluhan in.

¹²Simada Anak in, bani do hagoluhan in, na so simada Anak ni Naibata, seng bani hagoluhan in. [60]

¹³Ase husurat on bani nasiam na porsaya bani goran ni Anak ni Naibata, ai ma, ase ibotoh nasiam, na dob bani nasiam do hagoluhan na sadokah ni dokahni.

¹⁴Anjaha on do hinsah ni uhurta na dong banta i lobeini, “Anggo ipindo hita atap aha domu hubani rosuh ni uhur-Ni, itangihon do hita. [61]

¹⁵Anjaha, anggo ibotoh hita, itangihon do hita pasal atap aha pe na pinindonta, jadi ibotoh hita ma, na tongon ma jumpah hita na pinindonta ai hun Bani.

¹⁶Anggo ididah sada halak hasomanni mardousa, na so marujung hu hamatean, martonggo ma ia, jadi bereon-Ni ma bani hagoluhan, ai ma bani sipardousa, na so marujung hu hamatean ai. Adong do dousa, na marujung hu hamatean, seng huhatahon, ase itonggohon anggo ai. [62]

¹⁷Sagala hagedukon, dousa do ai, anjaha adong do dousa, na so marujung hu hamatean.

¹⁸Ibotoh hita do, na so mardousa sagala halak na dob tubuh humbani Naibata, tapi marsijoloman bani Naibata do halak, na dob tubuh hun Bani, anjaha seng tarkahua parjahat in ia. [63]

¹⁹Ibotoh hita, na humbani Naibata do hita, anjaha ganup dunia on ibagas kuasa ni hajahaton do. [64]

²⁰Tapi ibotoh hita do, na dob roh do Anak ni Naibata, anjaha ibere do uhur banta, ase itanda hita Ia na sintong in. Anjaha ibagas Ia na sintong in do hita, ibagas Anak-Ni Jesus Kristus. Ia do Naibata na sintong in ampa hagoluhan na sadokah ni dokahni. [65]

²¹Nasiam dakdanakku, jaga nasiam ma diri nasiam dompak sisombahon na lepak.” [66]