Read Batak Simalungun PANGUHUM 1 Bible Online

PANGUHUM 1 - Batak Simalungun bible

PANGUHUM 1

¹Jadi dob matei si Josua, isungkun halak Israel ma Jahowa, “Ise ma hun bennami parlobei tangkog marporang dompak halak Kanaan?” [1]

²Jadi nini Jahowa ma, “Halak Juda ma tangkog; tonggor ma, domma Hubere tanoh in hubagas tanganni.”

³Dob ai nini si Juda ma dompak si Simeon, abangni ai, “Tangkog ma ho rapkon ahu hu tanoh parbagiananku, ase marporang hita dompak halak Kanaan, ase huhasomani homa ho laho hu tanoh parbagiananmu.” Jadi laho ma si Simeon rap pakonsi.

⁴Dob ai tangkog ma halak Juda; jadi iondoskon Jahowa ma halak Kanaan pakon Peresi hubagas tangan ni sidea, gabe iraseihon sidea ma sapuluh ribu halak i Besek.

⁵Jumpah sidea ma si Adoni-Besek i Besek, jadi iporang sidea ma ia, anjaha italuhon ma halak Kanaan pakon Peresi.

⁶Maporus ma si Adoni-Besek; ipardakdak sidea ma ia anjaha jumpah, gabe irotap ma ompu-ompu ni tanganni pakon ompu-ompu ni naheini.

⁷Jadi nini si Adoni-Besek ma, “Pitu puluh raja, na dob nirotap ompu-ompu ni tanganni pakon ompu-ompu ni naheini manjomputi na maperper i toruh ni mejangku; songon na hubahen ai, sonai do ibalaskon Jahowa hu bangku. Iboan sidea ma ia hu Jerusalem anjaha matei ijai.”

⁸Dob ai marporang ma Juda dompak Jerusalem, italuhon ma ai anjaha iraseihon marhitei podang, anjaha isurbuy ma huta ai.

⁹Dob ai tuad ma halak Juda, laho marporang dompak halak Kanaan, na marianan i dolog, i tanoh dangsina pakon i tanoh bornoh. [2]

¹⁰Dob ai bingkat ma halak Juda dompak halak Kanaan, na marianan i Hebron (Kiriat-Arba do goran ni Hebron ai sapari), gabe italuhon sidea ma si Sesai, si Ahiman pakon si Talmai.

¹¹Hunjai bingkat ma sidea hu pangisi ni Debir; ia goran ni Debir sapari Kiriat-Seper do.

¹²Jadi nini si Kaleb ma, “Barang ise na manaluhon Kiriat-Seper anjaha itaban, hubere ma hubani si Aksa, borungkai bahen parinangonni.”

¹³Jadi itaban si Otniel, anak ni si Kenas, anggi ni si Kaleb ma huta ai, gabe ibere ma hubani si Aksa boruni ai bahen parinangonni.

¹⁴Sanggah na masuk ai ia, ielek-elek ma ia mangindo juma sanlambar humbani bapani; turun ma ia hun halodeni, jadi nini si Kaleb ma, “Aha bam?”

¹⁵Jadi nini ma bani, “Bere ham ma bangku pasu-pasu sada; domma ibere ham bangku tanoh dorging, bere ham ma homa bangku bah tubuh.” Jadi ibere si Kaleb ma bani bah tubuh i huluan pakon i kehen.

¹⁶Dob ai tangkog ma anak ni si Keni, tulang ni si Musa, hun huta parkurmaan rap pakon ginompar ni si Juda hu halimisan Juda, na i tanoh dangsina i lambung ni Arad; bungkas ma sidea, lanjar marianan i tongah-tongah ni bangsani ai. [3]

¹⁷Dob ai bingkat ma Juda rap pakon si Simeon abangni ai, gabe italuhon sidea ma halak Kanaan, na marianan i Zefat, siap tumang do sidea ibahen. Jadi ibahen ma goran ni huta ai Horma. [4]

¹⁸Itaban Juda do homa Gaza ampa nagorini, Askalon ampa nagorini, pakon Ekron ampa nagorini.

¹⁹Sai ihasomani Jahowa do Juda, gabe italuhon ma tanoh dolog ai, tapi seng tarusirsi na marianan i tanoh hornop, ai margareta bosi do sidea.

²⁰Ibere sidea ma Hebron hubani si Kaleb, songon na tinonahkon ni si Musa hinan; jadi iusir ma hunjai anak ni si Enak na tolu ai. [5]

²¹Tapi seng iusir ginompar ni si Benjamin halak Jebusi, na marianan i Jerusalem; jadi marianan i Jerusalem do halak Jebusi ai rap pakon ginompar ni si Benjamin ronsi sadari on. [6]

²²Tangkog homa do ginompar ni si Josep dompak Betel, anjaha Jahowa do hasoman ni sidea.

²³Dob ai ihatahon ginompar ni si Josep ma mangkahapi Betel. Lus do goran ni huta ai sapari. [7]

²⁴Jadi ididah parkahap ai ma sada halak luar hun huta ai, gabe ihatahon sidea ma hu bani, “Mahua patuduhkon ma bennami dalan hu huta in, mardear layak pe hanami bamu.”

²⁵Jadi ipatuduhkon ma bani sidea dalan hu huta ai, gabe isiapkon sidea ma huta ai marhitei podang, tapi anggo dalahi ai pakon hasomanni saompung ipaluah do ganup. [8]

²⁶Bungkas ma dalahi ai hu tanoh ni halak Heti; ipungkah ma sada huta, anjaha ibahen ma goranni Lus, lanjar ai do goranni ronsi sadari on.

²⁷Tapi seng ibuhar si Manase anggo par Betsean ampa dusunni, Taanak pakon dusunni, Dor ampa dusunni, Jibleam ampa dusunni pakon Megiddo ampa dusunni, ai ipahobal halak Kanaan do uhurni marianan i tanoh ai. [9]

²⁸Tapi dob lambin markuasa Israel, ibahen ma halak Kanaan ai marrodi, seng ongga homa buhar sidea.

²⁹Efraim pe seng ibuhar halak Kanaan, na marianan i Geser, lanjar marianan i tongah-tongah ni sidea do halak Kanaan ai, i Geser. [10]

³⁰Sebulon pe seng ibuhar par Kitron pakon par Nahalol, lanjar marianan i tongah-tongah ni sidea do halak Kanaan ai, tapi marrodi. [11]

³¹Asser pe seng ibuhar par Akko, Sidon, Ahlab, Aksib, Helba, Apik pakon Rehob;

³²lanjar marianan do halak Asser i tongah-tongah ni halak Kanaan, ai ma partanoh ai hinan, ai seng hona buhar sidea.

³³Naftali pe seng ibuhar par Bet-Semes pakon par Bet-Anak, lanjar marianan do i tongah-tongahni halak Kanaan, ai ma partanoh ai hinan, tapi manrodi do par Bet-Semes pakon par Bet-Anak ai bani sidea. [12]

³⁴Ionjar-onjar halak Amori do ginompar ni si Dan hu dolog, seng ipalopas sidea tuad hu tanoh hanopan.

³⁵Igogohkon halak Amori ma marianan i Dolog Heres, i Ayalon pakon Salabin; tapi gogoh do tong tangan ni ginompar ni si Josep mangodohkon sidea, gabe hona rodi sidea ibahen. [13]

³⁶Ia parbalogan ni halak Amori, ai ma hun tangkogan Akrabim das hu Sela torus hu huluan.