Read Batak Simalungun PANGUHUM 10 Bible Online

PANGUHUM 10 - Batak Simalungun bible

PANGUHUM 10

¹Dob si Abimelek bangkit ma si Tola, anak ni si Pua, anak ni si Dodo, sada halak Isasar, paluahkon halak Israel, anjaha i Samir do ia marianan, i Dolog Efraim.

²Anjaha dua puluh tolu tahun do iuhumi halak Israel; dob ai matei ma ia, anjaha itanom i Samir.

³Dobkonsi ia, bangkit ma si Jair, sada halak Gilead, anjaha iuhumi ma halak Israel dua puluh dua tahun dokahni. [84]

⁴Adong do tolu puluh anakni dalahi na mangajak tolu puluh halode, anjaha adong do huta ni sidea tolu puluh i tanoh Gilead na margoran Hawot-Jair ronsi sonari. [85]

⁵Matei ma si Jair anjaha itanom ma i Kamon.

⁶Dob ai iulaki halak Israel ma mambahen sogam ni uhur ni Jahowa; marsombah ma sidea hubani Baal pakon Astarot, hubani naibata ni halak Aram, naibata ni halak Sidon, naibata ni halak Moab, naibata ni halak Amon, pakon naibata ni halak Palistim, tapi itadingkon sidea do Jahowa anjaha seng ibalosi sidea Ia.

⁷Jadi gajag ma ringis ni Jahowa mangidah Israel, anjaha ijualhon ma sidea hu tangan ni halak Palistim pakon halak Amon.

⁸Jadi idorun anjaha idogei-dogei sidea ma halak Israel, mulai humbani panorang ai girtip sapuluh ualuh tahun dokahni, haganup halak Israel na i dipar ni Jordan, i tanoh ni halak Amori, na marianan i Gilead.

⁹Ambahni ai idipari halak Amon do Jordan laho marporang mangimbang halak Juda, halak Benjamin pakon ginompar ni si Efraim homa, gabe tarsosak tumang ma halak Israel.

¹⁰Jadi doruh-doruh ma halak Israel bani Jahowa, nini ma, “Domma mardousa hanami dompak Ham, halani na itadingkon hanami Naibatanami, anjaha marsombah hanami hubani Baal.

¹¹Tapi nini Jahowa ma dompak halak Israel, ʻAi lang Ahu do, na paluahkon hanima humbani halak Masir, halak Amori, halak Amon pakon halak Palistim?ʼ

¹²Halak Sidon, halak Amalek pakon halak Midian pe iodoh-odoh do hanima, jadi doruh-doruh ma hanima hu Bangku, gabe Hupaluah hanima use hun tangan ni sidea.

¹³Tapi domma itadingkon hanima Ahu anjaha marsombah hanima hubani naibata na legan; halani ai seng ra be Ahu paluahkon hanima.

¹⁴Laho ma hanima doruh-doruh hubani naibata na dob pinilihnima ai; sidea ma na paluahkon hanima bani panorang hasosakannima in. [86]

¹⁵Nini halak Israel ma dompak Jahowa, ʻDomma mardousa hanami.ʼ Bahen Ham ma bennami, romban hubani ganup rosuh ni uhur-Mu; tapi urupi Ham ma hanami sadari on.”

¹⁶Jadi ipadaoh sidea ma naibata na legan ai hun tongah-tongah ni sidea, anjaha marsombah sidea bani Jahowa, gabe itostos ma uhur-Ni mangidah hasombuhan ni Israel. [87]

¹⁷Dob ai iarah ma halak Amon hu parporangan, anjaha pajongjong lampolampo ma sidea i Gilead; martumpu ma halak Israel, anjaha pajongjong lampolampo i Mispa.

¹⁸Dob ai manriah ma pangulu-pangulu ni Gilead, “Barang ise na mammulai parporangan mangimbang halak Amon, ia ma gabe pangintuai ni ganup partanoh Gilead.” [88]