Read Batak Simalungun PANGUHUM 12 Bible Online

PANGUHUM 12 - Batak Simalungun bible

PANGUHUM 12

¹Hona arah ma halak Efraim; bingkat ma sidea dompak Zafon anjaha nini sidea ma dompak si Jepta, “Mase ma laho ham marporang mangimbang halak Amon, hape lang iarahkon ham hanami dihut pakon Ham? Halani ai tutungonnami ma rumahmu i atasmu pakon apuy. [104]

²Dob ai nini si Jepta ma dompak sidea, ʻJobu tumang do ahu marimbang pakon bangsangku dompak halak Amon; huarahkon do nasiam, tapi seng roh nasiam paluahkon ahu hun tangan ni sidea.ʼ

³Jadi dob huidah, na seng roh nasiam paluahkon ahu, huasamkon ma hosahku, jadi bingkat ma ahu dompak halak Amon, gabe iondoskon Jahowa ma sidea hubagas tanganku. Mase ma tangkog nasiam sadari on laho marmunsuh dompak ahu?” [105]

⁴Dob ai ipatumpu si Jepta ma ganup halak Gilead, laho marmunsuh dompak halak Efraim. Jadi italuhon halak Gilead ma halak Efraim, halani na hinatahon ni sidea, “Halak na maporus hun Efraim do nasiam!” I tongah-tongah ni halak Efraim pakon halak Manase do halak Gilead ai.

⁵Jadi iiankon halak Gilead ma pandiparan ni Bah Jordan laho mangimbang halak Efraim. Anggo adong halak na maporus humbani halak Efraim na mangkatahon, “Palopas ma mandipar ahu, jadi nini halak Gilead ma hu bani, ʻHalak Efraim do ham?ʼ Anggo ihatahon “Lang”! [106]

⁶nini sidea ma hu bani: “Hatahon ma lobei: Syibolet”. Anggo ihatahon: “sibolet”, jadi seng sintong pangkatahonni, itangkap sidea ma ia anjaha isayat dohorhon ni pandiparan Bah Jordan ai. Adong do na matei bani panorang ia humbani halak Efraim ompat puluh dua ribu halak.”

⁷Dong do onom tahun si Jepta manguhumi halak Israel. Dob ai matei ma si Jepta, halak Gilead ai, lanjar itanom bani sada huta i tanoh Gilead.

⁸Dobkonsi ia, jadi si Ebsan, na hun Betlehem ma na manguhumi halak Israel.

⁹Adong do tolu puluh niombahni dalahi. Tolu puluh boruni ipalaho bani halak luar, anjaha tolu puluh naboru ialop humbani halak luar bani anakni. Iuhumi ma halak Israel pitu tahun dokahni.

¹⁰Dob ai matei ma si Ebsan, lanjar itanom ma i Betlehem.

¹¹Dobkonsi ia, si Elon halak Sebulon ma na manguhumi halak Israel, anjaha iuhumi do halak Israel sapuluh tahun dokahni.

¹²Dob ai matei ma si Elon halak Sebulon ai, lanjar itanom i Ayalon, tanoh Sebulon.

¹³Dobkonsi ia, si Abdon anak ni si Hillel, halak Piraton ma na manguhumi halak Israel.

¹⁴Adong do ompat puluh niombahni dalahi anjaha tolu puluh pahompuni dalahi, na mangajak pitu puluh halode. Iuhumi do halak Israel ualuh tahun dokahni.

¹⁵Dob ai matei ma si Abdon, anak ni si Hillel, halak Piraton ai, lanjar itanom i Piraton, i tanoh Efraim i dolog ni halak Amalek