Read Batak Simalungun PANGUHUM 13 Bible Online

PANGUHUM 13 - Batak Simalungun bible

PANGUHUM 13

¹Dob ai iulaki halak Israel ma use mambahen sogam ni uhur ni Jahowa, halani ai iondoskon Jahowa ma sidea hu tangan ni halak Palistim, ompat puluh tahun dokahni. [107]

²Jadi adong ma sada halak hun Zora, humbani marga Dan, na margoran si Manoah; lambang do parinangonni, seng tubuhan tuah.

³Dob ai ipataridahkon malekat ni Jahowa ma dirini hu bani naboru ai, anjaha nini ma hu bani, “Tonggor ma, na lambang do ham, seng tubuhan tuah; tapi boratan rumah ma ham anjaha manubuhkon anak sada. [108]

⁴On pe, jaga ma dirimu ulang inum ham anggur barang siinumon na pamabukkon, anjaha ulang ma pangan ham barang aha pe na so panti, [109]

⁵ai tonggor ma, boratan rumah ma ham anjaha manubuhkon anak sada. Seng bulih dais pisou parsuhur bani uluni, ai gabe halak nasir do ia bani Naibata humbani parnaibataan nari; ai pungkahonni ma paluahkon halak Israel hun tangan ni halak Palistim.” [110]

⁶Dob ai roh ma puang-puang ai mangadu-aduhon ai hu bani paramangonni, “Roh do sada halak ni Naibata bangku, ia rupani songon rupa ni malekat ni Naibata do, jombut tumang; seng husungkun barang hunja do ia, goranni pe seng ipatugah hu bangku. [111]

⁷Tapi nini do hu bangku, ʻBoratan rumah ma ham anjaha manubuhkon sada anak; on pe ulang ma inum ham anggur barang siinumon na mambahen mabuk anjaha ulang ma pangan ham barang aha pe na so panti, ai gabe halak nasir do bani Naibata dakdanak ai humbani partubuhni das hubani ari parmateini.ʼ

⁸Dob ai martonggo ma si Manoah hubani Jahowa, nini ma, ʻHam Tuhanku, sai roh ma namin sahali nari halak ni Naibata, na dob sinuruh-Mu ai bennami, ase iajarhon bennami barang aha do sibahenonnami hubani dakdanak na sihol tubuh in.ʼ ”

⁹Jadi itangihon Naibata ma pangindoan ni si Manoah ai, gabe roh ma use malekat ni Naibata ai hubani naboru ai, sanggah hundul ia i juma, sanggah seng rap pakonsi si Manoah paramangonni ai.

¹⁰Dob ai tarolos ma naboru ai patugahkon ai hu bani paramangonni, nini ma hu bani, “Tonggor ma, domma ipataridahkon halak na roh nabaruon ondi use dirini hu bangku.”

¹¹Jadi jongjong ma si Manoah, iirikkon ma parinangonni ai, anjaha dob das sidea hubani halak ai, nini ma hu bani, “Ham do tongon na dob ongga marsahap pakon naboru on? Balosni, ʻAhu ma da.ʼ

¹²Dob ai nini si Manoah ma, ʻOn pe, anggo saud ma holi songon hata-Mu ai, sonaha ma talup pargoluhon ni dakdanak ai, anjaha aha ma sibahenonnami?ʼ

¹³Jadi nini malekat ni Jahowa ai ma dompak si Manoah, ʻGanup na dob Hupatugah hubani naboru on maningon pardiateihononni do.ʼ

¹⁴Seng bulih panganonni sagala na luar humbani hayu anggur; anggur atap siinumon na pamabukkon seng bulih inumonni, anjaha seng bulih panganonni atap aha pe na so panti. Maningon ramotkononni do sagala na dob Huparentahkon hu bani.

¹⁵Nini si Manoah ma dompak malekat ni Jahowa ai, ʻSai ra ma Ham jolomannami, ase ihoseihon hanami Bamu anak ni hambing sada.ʼ [112]

¹⁶Jadi nini malekat ni Jahowa ma dompak si Manoah, ʻAge pe ijolomi ham Ahu, seng anjai panganon-Ku humbani sipanganonmu ai. Tapi anggo sihol galangkononmu sada galangan situtungon, hubani Jahowa ma galangkon ham ai.ʼ Halani seng ibotoh si Manoah, malekat ni Jahowa do ia hape.

¹⁷Dob ai nini si Manoah ma dompak malekat ni Jahowa ai, ʻIse do goran-Mu, ase ipasangap hanami Ham, anggo saud ma holi hata-Mu ai?ʼ [113]

¹⁸Tapi nini malekat ni Jahowa ai ma hu bani, ʻMase ma sungkunonmu goran-Ku?ʼ Halongangan do ai.” [114]

¹⁹Dob ai ibuat si Manoah ma sada anak ni hambing rap pakon galangan sipanganon, lanjar igalangkon ma ai bani Jahowa i atas ni batu. Ibahen malekat ai ma sada halongangan ididah si Manoah pakon parinangonni ai. [115]

²⁰Ai sanggah na naik dilah ni apuy ai hun anjapanjap ai hu atas, naik ma homa malekat ni Jahowa ai ibagas dilah ni apuy na humbani anjapanjap ai, ididah si Manoah pakon parinangonni ai, jadi marrogop ma sidea.

²¹Dobkonsi ai seng ongga be ipataridahkon malekat ni Jahowa ai dirini hubani si Manoah pakon parinangonni ai. Jadi ibotoh si Manoah ma, malekat ni Jahowa do Ia hape.

²²Nini si Manoah ma dompak parinangonni ai, “Maningon matei mando hita, halani na dob nididahta ai Naibata. [116]

²³Tapi nini parinangonni ai ma hu bani, ʻPorini sihol bunuhon ni Jahowa hita, seng anjai jaloon-Ni galangan situtungon pakon galangan sipanganon ai hun tanganta, anjaha seng anjai patalaron-Ni ganupan ai hu banta, anjaha seng anjai pabogeihonon-Ni na sonai ai hubanta nuan.ʼ ”

²⁴Dob ai itubuhkon naboru ai ma sada anak anjaha ibahen ma goranni si Simson. Lambin banggal ma dakdanak ai, anjaha ipasu-pasu Jahowa do ia. [117]

²⁵Anjaha ipungkah Tonduy ni Jahowa ma manggorakkonsi i Mahane-Dan, na i holangkolang ni Zora pakon Estaol. [118]