Read Batak Simalungun PANGUHUM 14 Bible Online

PANGUHUM 14 - Batak Simalungun bible

PANGUHUM 14

¹Tuad ma sahali si Simson hu Timna, gabe ididah ma sada naboru i Timna, boru Palistim.

²Dob ai tangkog ma ia, ipatugah ma hubani bapani pakon inangni, “Adong do huidah sada naboru i Timna, boru Palistim; on pe buat nasiam ma ia gabe parinangonku.

³Tapi nini bapani pakon inangni ma hu bani, ʻSeng dong gakni boru ni i tongah-tongah ni boru saninamu barang i tongah-tongah ni ganup bangsanta, mambahen laho ho mambuat boru humbani halak Palistim, na so marsunat ai?ʼ Tapi nini si Simson ma dompak bapani ai, ʻManingon ia do buatonmu bangku, ai ia do na huharosuhkon.ʼ ” [119]

⁴Tapi seng ibotoh bapa pakon inangni, na roh humbani Naibata do ai, ai na mangindahi siguiti do ia dompak halak Palistim. Ai halak Palistim do na manggomgom halak Israel bani panorang ia. [120]

⁵Dob ai tuad ma si Simson rap pakon namatorasni, bapani ampa inangni, hu Timna. Jadi dob das sidea hu pohon anggur ni Timna, tonggor ma, roh ma anak ni singa sada maraum manjumpahkonsi.

⁶Jadi sogop ma hubani Tonduy ni Jahowa, gabe iparsirak ma singa ai songon halak na marsirak anak ni hambing, anjaha aha pe seng dong ibagas tanganni. Tapi seng ipatugah hubani namatorasni na binahenni ai. [121]

⁷Dob ai tuad ma ia lanjar marsahap-sahap pakon naboru ai, ai rosuh do uhurni mangidah naboru ai.

⁸Dob salpu piga-piga ari mulak ma ia hujai laho mangalop naboru ai; anjaha sanggah na manirpang ia laho mangidah bangkei ni singa ai, tonggor ma, adong do sahulanan ranggiting bani tangkurak ni singa ai, sonai homa manisan.

⁹Ihoruk ma ai hubagas tanganni, anjaha ipangan ma turut-turut mardalan; das ma ia hubani namatorasni, ibere ma deba hu bani sidea, lanjar ipangan sidea ma. Tapi seng ipatugah hubani sidea, paboa na humbani tangkurak ni singa do ai ibuat.

¹⁰Jadi dob das bapa ni si Simson hubani naboru ai, ibahen si Simson ma horja-horja ijai, ai somal do sonai ibahen anak garama.

¹¹Jadi dob ididah sidea ia, ibuat sidea ma tolu puluh halak bahen pangkasomanini.

¹²Nini si Simson ma dompak sidea, “Adong sada hutintangku bani nasiam; anggo tarpatugah nasiam bangku aha ai, ibagas mata ni pesta sipitu ari on, anjaha dapot nasiam artini ai, bereonku ma bani nasiam tolu puluh pakean parbagas pakon tolu puluh pakean pardarat. [122]

¹³Tapi anggo seng boi ibere nasiam balosni hu bangku, jadi nasiam ma mambere hu bangku tolu puluh pakean parbagas ampa tolu puluh pakean pardarat. Nini sidea ma hu bani, ʻPatugah ma hutintamu ai, ase ibogei hanami.ʼ

¹⁴Nini ma dompak sidea, ʻLuar sipanganon humbani siparpangan, anjaha luar na matobu humbani na gogoh.ʼ Anjaha seng tarpatugah sidea arti ni hutinta ai ibagas tolu ari.”

¹⁵Bani ari papituhon nini sidea ma dompak parinangon ni si Simson, “Elek-elek ma paramangonmai, ase ipatugah bennami arti ni hutinta ai, ase ulang itutung hanami ho, age pangisi ni rumah ni bapamu bani apuy. Ai lang na sihol mambuat artanami do ho ase iontang hanami?” [123]

¹⁶Jadi sai tangis-tangis ma parinangon ni si Simson ai i lobeini, nini ma, “Magigi do ham hape mangidah ahu, lang holong uhurmu mangidah ahu; marhutinta do ham hubani hasomanku sabangsa, tapi seng ipatugah ham artini hu bangku. Nini ma mambalosisi, ʻGari hubani bapa pakon inang seng hupatugah, lambin bam ma patugahonku?ʼ ”

¹⁷Tapi sai tangis do parinangonni ai i lobeini, sadokah na pitu ari ai sidea marpesta; jadi bani ari papituhon, ipatugah ma bani, halani na motei-otei ai ia, lanjar ipatugah naboru ai ma arti ni nipi ai hubani hasomanni sabangsa. [124]

¹⁸Dob ai ari papituhon, sanggah lape ope sundut mata ni ari, nini dalahi parhuta ai ma hu bani, “Aha do tobunan ase manisan? Aha do gogohan, ase singa? Nini ma dompak sidea, ʻAmbit lang maninggala nasiam pakon anak ni lombungku, seng anjai dapot nasiam arti ni hutintangkai.ʼ ” [125]

¹⁹Sogop ma Tonduy ni Jahowa hu bani, dob ai laho ma ia hu Askelon, ibunuh ma humbani sidea tolu puluh halak ijai; ibuat ma pakean ni sidea, anjaha ibere ma ai hubani sidea na mandapot arti ni hutinta ai; tapi gajag tumang do ringisni, lanjar mulak ma ia hu rumah ni bapani. [126]

²⁰Tapi anggo parinangon ni si Simson ai hu bani pangkasomanini, na mangkasomanisi do iberehon. [127]