Read Batak Simalungun PANGUHUM 15 Bible Online

PANGUHUM 15 - Batak Simalungun bible

PANGUHUM 15

¹Jadi bani labang-labang ni ari, sanggah musim ni pariama, iparayak si Simson ma use parinangonni ai, iboan do anak ni hambing sada, anjaha nini ma, “Sihol hu kamar do ahu marayak parinangonku.” Tapi seng ipalopas bapa ni naboru ai ia masuk.

²Nini bapani ai ma, “Huagan ma na dob magigi ho bani, jadi domma hupalaho ia hubani hasomanmu. Ai lang jengesan do anggini ai hun bani, ia ma bam gantihni. [128]

³Dob ai nini si Simson ma dompak sidea, ʻAnggo sahali on, seng marsalah ahu dompak halak Palistim, anggo huparroh hamagouan hubani sidea.ʼ ” [129]

⁴Dob ai laho ma si Simson, itangkap ma tolu ratus sorigala, ibuat ma tunam, isangkut ma ihur bani ihur, anjaha inahkon ma tunam sada i holangkolang ni na dua sorigala ai.

⁵Dob ai inahiti ma tunam ai, anjaha ipaluah ma sorigala ai hu juma gandum ni halak Palistim, na so ipariamai ope, gabe matutung ma radean pakon gandum, na so ipariamai ope, sonai homa kobun anggur pakon kobun jetun.

⁶Nini halak Palistim ma, “Ise do na mambahen on? Nini halak ma mambalosi, ʻSi Simson do, hela ni halak Timna ai, ai ibuat do parinangon ni si Simson anjaha iberehon hubani hasomanni.ʼ Dob ai laho ma halak Palistim hujai anjaha itutung ma naboru ai pakon bapani.” [130]

⁷Dob ai nini si Simson ma dompak sidea, “Anggo sonai ibahen nasiam, seng anjai maronti ope ahu, anggo seng hubalaskon ope ai bani nasiam.”

⁸Jadi ibogbogi, irosaki ma holi-holi ni sidea, parah pambogbogini ai. Dob ai laho ma ia anjaha marianan ibagas sada liang i Dolog batu Etam.

⁹Dob ai bingkat ma halak Palistim, marsaran ma sidea i Juda anjaha merap das hu Lehi. [131]

¹⁰Nini halak Juda ma, “Mase ma tangkog nasiam dompak hanami? Nini sidea ma mambalosi, ʻLaho manangkut si Simson do ase tangkog hanami, anjaha mambahen hubani songon na binahenni hu bennami.ʼ ”

¹¹Dob ai tuad ma tolu ribu halak humbani halak Juda hu liang na i Dolog batu Etam, anjaha nini sidea ma dompak si Simson, “Ai lang ibotoh ho, na ginomgom ni halak Palistim do hita? Ai aha do na binahenmon bennami? Tapi nini ma mambalosi sidea, ʻSongon na binahen ni sidea hu bangku, sonai do hubahen bani sidea.ʼ [132]

¹²Nini sidea ma hu bani, ʻAse roh pe hanami hujon na laho manangkut anjaha mangondoskon ho do hubagas tangan ni halak Palistim.ʼ Jadi nini si Simson ma mambalosi sidea, ʻMarbulawan ma nasiam bangku, paboa na so nasiam sandiri mandorab ahu.ʼ

¹³Dob ai nini sidea ma hu bani, ʻLang, pitah manangkut ho do hansa hanami, dob ai mangondoskon ho hubagas tangan ni sidea, tapi seng anjai bunuhonnami ho.ʼ Dob ai isangkut sidea ma ia marhitei dua tali na baru anjaha iboan ma ia hun dolog batu ai.”

¹⁴Dob das ia hu Lehi, anjaha marsurak-surak halak Palistim manjumpahkonsi, jadi sorap ma Tonduy ni Jahowa hu bani, anjaha tali na i pargolanganni ai gabe songon bonang na tinutung ma anjaha sagala panangkutni ai tanggal hun tanganni. [133]

¹⁵Dob ai jumpahsi ma sada osang-osang ni halode na baru ope, idurdurhon ma tanganni laho manjomput ai, dob ai ipambogbogkon ma ai gabe matei ma saribu halak.

¹⁶Nini si Simson ma, “Marhitei osang-osang ni halode hubogbogi sidea bois, marhitei osang-osang ni halode saribu halak hubunuh.”

¹⁷Jadi dob ihatahon sonai, igijigkon ma osang-osang ai hun tanganni; halani ai igoran do ianan ai Ramat-Lehi.

¹⁸Tapi horahan tumang ma ia, gabe idilo ma Jahowa, nini ma, “Domma ibere Ham haluahon na banggal marhitei ahu jabolon-Mu on, mintor matei horahan ma ahu sonari anjaha madabuh hu tangan ni halak na so marsunat on?“ [134]

¹⁹Jadi ibolah Naibata ma dolog batu na i Lehi, gabe luar ma hunjai bah; jadi dob minum ia mulak ma hosahni anjaha margogoh ma ia. Halani ai igoran ma bah tubuh ai: “Bah tubuh ni halak na dilo-dilo,” na adong i Lehi ronsi sadari on. [135]

²⁰Jadi adong do dua puluh tahun si Simson manguhumi halak Israel bani panorang ni halak Palistim. [136]