Read Batak Simalungun PANGUHUM 2 Bible Online

PANGUHUM 2 - Batak Simalungun bible

PANGUHUM 2

¹Dob ai tangkog ma malekat ni Jahowa hun Gilgal hu Bokim. Nini ma, “Domma Huarahkon nasiam luar hun Masir, anjaha domma Hupadas nasiam hu tanoh, na Hubulawankon bani ompung nasiam. Anjaha Huhatahon, ʻSeng anjai ubahon-Ku padan na Hubahen ai pakon nasiam ronsi sadokah ni dokahni,

²anjaha nasiam pe, seng bulih mambahen padan pakon parnagori on, maningon parsedaon nasiam do anjapanjap ni sidea.ʼ Tapi seng itangihon nasiam parentah-Ku. Aha do na binahen nasiam on? [14]

³Halani ai Huhatahon ma bani nasiam, ʻSeng usiron-Ku sidea hun lobei nasiam, gabe imbang ma sidea bani nasiam, anjaha naibata ni sidea ai gabe tirangkap ma bani nasiam.ʼ ” [15]

⁴Jadi dob ihatahon malekat ni Jahowa hata ai bani ganup halak Israel, ipagogoh bangsa ai ma sorani tangis-tangis.

⁵Dob ai ibahen sidea ma goran ni ianan ai Bokim, anjaha manggalang ma sidea bani Naibata ijai.

⁶Dob ai isuruh si Josua ma mulak bangsa ai, gabe laho ma halak Israel ganup hu parbagiananni bei, laho manean tanoh ai.

⁷Sai ibalosi bangsa ai do Jahowa sadokah manggoluh si Josua, anjaha sadokah manggoluh pangintuai-pangintuai ai i pudi ni si Josua, na sampang mangidah haganup horja habanggalon ni Jahowa, na binahen-Ni hubani Israel. [16]

⁸Dob ai matei ma si Josua, anak ni si Nun, juakjuak ni Jahowa, marumur saratus sapuluh tahun.

⁹Jadi itanom sidea ma ia i tanoh parbagiananni, i Timnat-Heres, i Dolog Efraim, hampit utara ni Dolog Gaas. [17]

¹⁰Tapi dob martumpu ganup jolma na sasundut ai hubani ompung ni sidea, jongjong ma i pudi ni sidea sundut na legan, na so mananda Jahowa, barang pambahenan-Ni ai bani halak Israel.

¹¹Dob ai ibahen halak Israel ma sogam ni uhur ni Jahowa, anjaha marsombah sidea bani Baal;

¹²itadingkon sidea ma Jahowa, Naibata ni ompung ni sidea, na paluar sidea hun tanoh Masir, iirikkon sidea ma naibata na legan, ai ma naibata ni bangsa na marianan inggot ni sidea, anjaha marsombah hujai mangalop ringis ni Jahowa.

¹³Halani na tinadingkon ni sidea ai Jahowa, gabe marsombah sidea hu Baal pakon Astarot,

¹⁴jadi gajag ma ringis ni Jahowa dompak Israel, iondoskon ma sidea hu tangan ni panamun, na manamuni sidea, anjaha ijualhon ma sidea hu tangan ni munsuh ni sidea inggot, gabe lang martahan be sidea jongjong i lobei ni munsuh ni sidea.

¹⁵Barang huja pe sidea bingkat, sai tangan ni Jahowa do imbang ni sidea hu hamagouan, songon na hinatahon ni Jahowa hinan, anjaha songon na binulawankon ni Jahowa hubani sidea; jadi tarsosak tumang ma sidea. [18]

¹⁶Dob ai ipabangkit Jahowa ma panguhum, na paluahkon sidea hun tangan ni na manamun sidea. [19]

¹⁷Age pe sonai seng itangihon sidea panguhum ni sidea ai, ai ibalosi sidea do naibata na legan, anjaha marsombah hujai; podas do sidea manlembang humbani dalan na nidalanan ni ompung ni sidea, na mambalosi titah ni Jahowa; seng ibahen sidea sonai.

¹⁸Anggo ipabangkit Naibata panguhum bani sidea, ihasomani Naibata do panguhum ai, anjaha ipaluah do sidea hun tangan ni imbang ni sidea sadokah goluh ni panguhum ai; ai marpangulaki do uhur ni Jahowa halani doruh-doruh ni sidea pambahen ni na mangarsik pakon na manosak sidea.

¹⁹Tapi mateihonsi panguhum ai, marbalik ma use sidea marparlahou na sambor, samboran humbani ompung ni sidea, mangirikkon naibata na legan, mambalosi anjaha marsombah hujai; seng iparontihon sidea pambahenan ni sidea pakon parlahou hahengkengon ni sidea ai.

²⁰Jadi gajag ma ringis ni Jahowa dompak Israel, anjaha nini Ma, “Halani na nilaosan ni bangsa on padan-Ku, na dob Hutonahkon hubani ompung ni sidea, anjaha seng i tangihon sidea sorang-Ku,

²¹Ahu pe seng be nunutan-Ku mangusir hun lobei ni sidea, bangsa sipajuh begu-begu, na tading ibahen si Josua bani parmateini ai,

²²ase marhitei sidea Hulajou Israel, barang na ra do sidea bujur mardalan bani dalan ni Jahowa, songon na binahen ni ompung ni sidea, atap lang.” [20]

²³Jadi ipaturut Jahowa ma bangsa sipajuh begu-begu ai, seng mintor iusir sidea; seng ipadas sidea hubagas tangan ni si Josua.