Read Batak Simalungun PANGUHUM 21 Bible Online

PANGUHUM 21 - Batak Simalungun bible

PANGUHUM 21

¹Tapi domma marbulawan halak Israel i Mispa sonon, “Sahalak pe lang hun banta bulih mambere boruni bahen parinangon ni halak Benjamin.” [202]

²Jadi das ma bangsa ai hu Betel, lanjar tading ma sidea ijai ronsi bodari i lobei ni Naibata, anjaha ipagogoh bei ma sorani doruh-doruh, [203]

³nini sidea ma, “Mase ma, ale Jahowa, Naibata ni Israel, masa na sonin i tongah-tongah ni halak Israel, pala moru sadari on sada marga hun tongah-tongah ni halak Israel?”

⁴Dob ai patarni ai ipagirah bangsa ai ma puho, ipauli sidea ma ijai sada anjapanjap, anjaha igalangkon ma galangan situtungon pakon galangan hatarimakasihon. [204]

⁵Dob ai nini halak Israel ma, “Ise do humbani ganup marga ni halak Israel, na so roh tangkog hu partumpuan on hu lobei ni Jahowa? Ai domma marbulawan sidea pangkei-pangkei, barang ise na so marayak Jahowa hu Mispa, maningon marutang hosah do ia. [205]

⁶Maidop ma uhur ni halak Israel mangidah halak Benjamin, saninani ai, nini sidea ma, ʻSiap do hape sada marga sadari on humbani halak Israel.ʼ [206]

⁷Aha do sibahenonta hubani na tading ai, ase dong parinangon ni sidea bei, ai domma marbulawan hita hubani Jahowa, na so bulih bereonta humbani borunta bahen parinangon ni sidea? [207]

⁸Halani ai do ase ihatahon sidea, ʻAdong do humbani marga ni halak Israel, na so tangkog hu Mispa hubani Jahowa?ʼ Jadi tonggor ma, seng dong hape barang ise na tangkog hu parsaranan ai, hun Jabes-Gilead, marayak tumpuan ai.” [208]

⁹Ai sanggah na binilang bangsa ai, tonggor ma, sahalak pe lang adong dalahi ijai humbani par Jabes-Gilead.

¹⁰Jadi ipabangkit humpulan ai ma hujai sapuluh dua ribu halak sagala na bisang marmunsuh. Iparentahkon ma hubani sidea: Laho ma nasiam, raseihon nasiam ma par Jabes Gilead bani podang, ronsi puang-puang pakon naetek-etek. [209]

¹¹On ma sibahenon nasiam: Sagala dalahi pakon puang-puang, na dob hinasomanan ni dalahi modom, maningon siapkononkon do. [210]

¹²Jadi jumpah sidea ma humbani par Jabes Gilead ompat ratus anak boru, na so ongga hinasomanan ni dalahi modom, anjaha iboan sidea ma ai hu parsaranan ai hu Silo, na i tanoh Kanaan.

¹³Dob ai isuruh ganup humpulan ai ma suruhanni padaskon hata hubani halak Benjamin, na i Dolog batu Rimon, maningtingkon damei hubani sidea. [211]

¹⁴Jadi mulak ma ijia halak Benjamin, ibere ma hubani sidea naboru, na pinagoluh humbani naboru ni par Jabes Gilead, tapi seng sungkup hubani sidea.

¹⁵Idop do uhur ni bangsa ai mangidah marga Benjamin, halani na dob binahen ni Jahowa rikah bani marga ni halak Israel. [212]

¹⁶Dob ai nini sintua ni humpulan ai ma, “Aha ma bahenonta hubani halak na tading ai, ase dong parinangon ni sidea, halani na dob siap ai naboru humbani halak Benjamin?

¹⁷Nini sidea ma, ʻSagala na maluah, ai ma simada parbagianan ni halak Benjamin, ase ulang lanjar sasap sada marga humbani halak Israel.ʼ

¹⁸Tapi anggo hita seng bulih bereonta borunta bahen parinangon ni sidea. Ai domma marbulawan halak Israel: Hona papa ma barang ise, na mamberehon boru hubani halak Benjamin. [213]

¹⁹Jadi nini sidea ma, ʻMasa do ganup tahun pesta bani Jahowa i Silo, na i utara ni Betel, na i hapoltakan ni dalan na bolon, na tangkog hun Betel laho hu Sikem pakon dangsina ni Lebona.ʼ

²⁰Ihatahon sidea ma hubani halak Benjamin, ʻLaho ma nasiam monggop i pohon anggur,

²¹pardiateihon nasiam ma anggo luar ma boru ni par Silo laho manortor-nortor marodor-odor, jadi luar ma nasiam hun pohon anggur ai, anjaha ganup nasiam manluahon sada humbani boru ni par Silo bahen parinangonni, lanjar boan nasiam ma hu tanoh Benjamin.ʼ

²²Dob ai anggo roh bapa ni sidea barang botou ni sidea laho mangaduhon ai bennami, hatahononnami ma hubani sidea, ʻBere nasiam ma sidea bennami. Ai seng ibuat hanami bani ganup halak na gabe parinangonni marhitei humbani porang; sedo homa nasiam sandiri na mamberehon sidea bani sidea; halani ai seng na marsalah nasiam ibagas ai.ʼ

²³Jadi ibahen halak Benjamin ma sonai, ipambuat bei ma boru marguru hubani bilangan ni sidea humbani panortor ai, ai ma na nirampas ni sidea; dob ai laho ma sidea mulak hubani parbagianan ni sidea, ipauli sidea ma use hutani lanjar marianan ijai.” [214]

²⁴Laho ma homa halak Israel hunjai bani panorang ai, mulak bei hubani margani pakon bangsani; mulak ma sidea hunjai ganup hu parbagiananni bei.

²⁵Bani panorang ai seng adong raja i Israel; ganup do marsibahen na pintor domu bani uhurni bei. [215]