Read Batak Simalungun PANGUHUM 3 Bible Online

PANGUHUM 3 - Batak Simalungun bible

PANGUHUM 3

¹Tapi on do bangsa sipajuh begu-begu na ipaturut Jahowa, laho manlajou Israel marhitei sidea, ai ma sagala na so mambotoh pasal parporangon i tanoh Kanaan, [21]

²ase marpambotoh marga ni halak Israel pasal parporangon, ase tarajarhonsi parporangon bani sidea, sagala na so marpambotoh pasal ai hinan,

³ai ma lima raja ni halak Palistim, haganup halak Kanaan, halak Sidon pakon Hewi, na marianan i Dolog Libanon, singgan ni Dolog Baal-Hermon das hu Hamat. [22]

⁴Sidea ma na manlajou Israel, laho mangidah, barang tangihonon ni sidea do titah ni Jahowa, na tinonahkon-Ni bani ompung ni sidea marhitei si Musa.

⁵Jadi dob marianan halak Israel i tongah-tongah ni halak Kanaan, Heti, Amori, Peresi, Hewi pakon Jebusi,

⁶gabe ibuat ma boru ni sidea bahen parinangon ni sidea, anjaha ibere boru ni sidea bani anak ni sidea, anjaha isombah naibata ni sidea. [23]

⁷Dob ai ihorjahon halak Israel ma sogam ni uhur ni Jahowa, ihalupahon Jahowa, Naibata ni sidea ai, anjaha ibalosi sidea Baal pakon Aserot.

⁸Jadi gajag ma ringis ni Jahowa dompak Israel, gabe ijualhon ma sidea hu tangan ni si Kusan-Risataim, raja hun Mesopotamia; gabe pambalosi ma halak Israel hubani si Kusan-Risataim ualuh tahun dokahni.

⁹Dob ai doruh-doruh ma halak Israel bani Jahowa, gabe ipabangkit Jahowa ma sada sipaluah bani Israel, laho paluahkon sidea, ai ma si Otniel, anak ni si Kenas, anggi ni si Kaleb. [24]

¹⁰Jadi sogop ma bani Tonduy ni Jahowa, gabe iuhumi ma halak Israel; bingkat ma ia marporang, jadi iondoskon Jahowa ma hu tanganni si Kusan-Risataim, raja ni Mesopotamia ai; ipatunduk tanganni ma si Kusan-Risataim ai. [25]

¹¹Jadi marhasonangan ma tanoh ai ompat puluh tahun dokahni. Dob ai matei ma si Otniel, anak ni si Kenas ai.

¹²Tapi iulaki halak Israel ma use mambahen sogam ni uhur ni Jahowa; jadi ipargogohi Jahowa ma si Eglon, raja ni Moab mangimbang halak Israel, halani na hinorjahon ni sidea ai sogam ni uhur ni Jahowa.

¹³Iarahkon ma halak Amon pakon Amalek, bingkat ma ia, ipatunduk ma Israel anjaha isoluk huta parkurmaan. [26]

¹⁴Jadi maningon balosan ni halak Israel ma si Eglon, raja ni Moab ai, sapuluh ualuh tahun dokahni.

¹⁵Jadi doruh-doruh ma halak Israel bani Jahowa, gabe ipabangkit Jahowa ma bani sidea sada sipaluah, ai ma si Ehud, anak ni si Gera, marga Benjamin, matei lopah do tanganni siamun; isuruh halak Israel ma ia mamboan utang sombah hubani si Eglon, raja ni Moab.

¹⁶Dob ai ipauli si Ehud ma bani sada podang sidua mata, saasta ganjangni; jadi igonditkon ma ai bani binongeini hampit siamun i toruh ni hiouni.

¹⁷Jadi itaruhkon ma utang sombah ai hubani si Eglon, raja ni Moab; jolma na mombur tumang do si Eglon ai.

¹⁸Jadi dob ondos isombahon utang sombah ai, isuruh ma mulak siboan utang sombah ai.

¹⁹Mulak ma anggo ia hun gana-gana na i Gilgal, anjaha nini Ma, “Adong do hata ponopanku bamu, alo rajanami.” Jadi iparentahkon Ma, “Sip.” Dob ai luar ma sagala na jongjong i lambungni.

²⁰Dob ai iparayak si Ehud ma ia, sanggah hundul ia tumang i kamar pardatas ni panatap-natapanni. Nini si Ehud ma, “Adong do bangku tonah ni Naibata bamu.” Jadi jongjong ma raja ai humbani karosini.

²¹Ipagostong si Ehud ma tanganni sambilou, iumpat ma podangni humbani binongeini,

²²itikamkon ma ai hu boltokni, gabe masuk ma mata ni podang ai rap pakon suhulni; lanjar irongkop taboh-taboh ai do mata ni podang ai, halani lang iumpat podang ai humbani boltokni; kaluar do ginagatni.

²³Dob ai luar ma si Ehud hu surambih; ioruk ma labah ni kamar par datas ai lanjar ikunsi.

²⁴Kaluarhonsi ia, roh ma juakjuak ni raja ai manorih, tapi oruk do labah ai jumpah sidea. Nini sidea ma, “Tontu na hu duru do ia i kamar panatap-natapanni ai.”

²⁵Jadi ipaima-ima sidea ma pala bulinsah, tapi lanjar seng ibuha raja ai labah ni kamar pardatas ai. Dob ai ibuat sidea ma anakkunsi, ibuha sidea ma labah ai, jadi tonggor ma, domma tibal tuan ni sidea ai i dasor, matei.

²⁶Sanggah na paima-imahon ai sidea, domma maporus si Ehud, domma pala ilopusi gana-gana ai, anjaha maluah hu Seira.

²⁷Dob das ia hujai, isompul ma tarompit i Dolog Efraim, jadi tuad ma halak Israel rap pakonsi hun dolog ai, ia mambobahon sidea.

²⁸Nini ma dompak sidea, “Irikkon nasiam ma ahu, ai domma iondoskon Jahowa halak Moab munsuh nasiam ai hubagas tangan nasiam.” Jadi tuad ma sidea mangirikkonsi, gabe dapot sidea ma pandiparan ni Jordan, tontang ni Moab, anjaha lang ilopas mandipar age sahalak. [27]

²⁹Ibunuh sidea ma bani panorang ia, hira-hira sapuluh ribu halak Moab, haganup halak na gogoh anjaha halak parmunsuh, sahalak pe lang na maluah.

³⁰Sonai ma Moab bani ari ai ipatunduk hu toruh ni kuasa ni halak Israel, anjaha sonang ma tanoh ai ualuh puluh tahun dokahni.

³¹Dob ia, bingkat ma si Samgar, anak ni si Anat, na mamunuh halak Palistim pakon simambu ni lombu onom ratus halak; dihut do ia paluahkon Israel.