Read Batak Simalungun PANGUHUM 4 Bible Online

PANGUHUM 4 - Batak Simalungun bible

PANGUHUM 4

¹Dob matei si Ehud, iulaki halak Israel ma mambahen sogam ni uhur ni Jahowa.

²Halani ai ijualhon Jahowa ma sidea hu tangan ni si Jabin, raja ni tanoh Kanaan, na marrajai i Hazor. Ia puanglima ni balani, ai ma si Sisera, na marianan i Haroset-Hagoyim. [28]

³Dob ai doruh-doruh ma halak Israel bani Jahowa; ai adong do siah ratus gareta bosi bani si Sisera anjaha parah tumang do halak Israel iarsik dua puluh tahun dokahni.

⁴Si Debora, sada nabi naboru, parinangon ni si Lapidot do na gabe panguhum bani halak Israel bani panorang ia. [29]

⁵Somal do ia hundul i toruh ni kurma Debora, i holangkolang ni Rama pakon Betel i Dolog Efraim; anjaha mangadap ma halak Israel bani laho mangindo uhum.

⁶Isuruh ma na mandilo si Barak, anak ni si Abinoam hun Kedes na i Naftali, nini ma hu bani: Ai lang Jahowa, Naibata ni Israel do na mamarentahkon sonon: Bingkat ma ho, laho hu Dolog Tabor, anjaha bobahon ma sapuluh ribu halak humbani ginompar ni Naftali pakon Sebulon,

⁷anjaha juljulonku ma manjumpahkon ho, hu lambung ni Bah Kison, si Sisera, puanglima ni bala ni si Jabin rap pakon garetani ampa balani, anjaha Ahu mangondoskonsi hubagas tanganmu?

⁸Nini si Barak ma hu bani: Anggo ihasomani ham ahu, ahu pe laho do, tapi anggo seng ihasomani ham ahu, seng laho ahu.

⁹Nini si Debora ma: Huhasomani pe ham; tapi seng na maningon dapotan puji-pujian bani dalan na nidalananmu on, ai hu tangan ni sada naboru do ondoskonon ni Jahowa si Sisera. Jadi bingkat ma si Debora pakon si Barak hu Kedes.

¹⁰Iarahkon si Barak ma halak Sebulon pakon Naftali hu Kedes, jadi sapuluh ribu halak tangkog mangirikkonsi, sonai pakon si Debora rap pakonsi.

¹¹Tapi anggo si Heber, halak Keni ai, domma marsirang humbani halak Keni, ginompar ni si Hobab, tulang ni si Musa, anjaha domma ipajongjong lampolamponi das hu hayu ara i Saanim dohorhon Kedes. [30]

¹²Dob ipatugah halak bani si Sisera, na dob tangkog do si Barak, anak ni si Abinoam hu Dolog Tabor,

¹³jadi ipatumpu si Sisera ma ganup garetani, siah ratus gareta bosi, pakon sagala parporang na rap pakonsi, hun Haroset-Hagoyim hu Bah Kison.

¹⁴Jadi nini si Debora ma dompak si Barak: Marugas ma, ai ari on ma Jahowa mangondoskon si Sisera hubagas tanganmu. Ai lang Jahowa do na bingkat mambobahon ham? Jadi tuad ma si Barak hun Dolog Tabor anjaha sapuluh ribu halak mangirikkonsi;

¹⁵anjaha igeori Jahowa ma si Sisera pakon garetani ampa ganup balani marhitei podang i lobei ni si Barak; jadi tuad ma si Sisera hun garetani anjaha maporus mardalan nahei.

¹⁶Ipardakdak si Barak ma gareta ai pakon ganup balani ai das hu Haroset-Hagoyim, jadi rasei ma ganup bala ni si Sisera ibahen podang, sahalak pe lang dong na tading.

¹⁷Tapi maporus do si Sisera mardalan nahei hu lampolampo ni si Jael, parinangon ni si Heber, halak Keni ai, ai mardear do si Jabin, raja ni Hazor pakon ginompar ni si Heber, halak Keni ai.

¹⁸Luar ma si Jael ai manjumpahkon si Sisera, anjaha nini ma dompaksi: Tului ma ham, ale rajanami, tului ma ham hu rumah, ulang ham mabiar. Jadi tului ma ia hu lampolampo ni naboru ai, anjaha irongkob naboru ai ma ia bani salimut.

¹⁹Dob ai nini ma dompak puang-puang ai: Bere ma bangku bah otik inumon, ai horahan do ahu. Jadi iungkab naboru ai ma parnahan ni dadih, ibere ma ia minum anjaha isalimuti homa.

²⁰Nini ope dompak naboru ai: Jongjong ma ham i lobei ni labah ni lampolampo on, anjaha anggo adong halak na roh anjaha na manungkun bamu: Adong jolma ijon? hatahon ham ma: Seng dong.

²¹Tapi ibuat si Jael, parinangon ni si Heber, marga Keni ai ma pasuk-pasuk ni lampolampo ai sada, ibuat homa parpalu, idohori ma sipsip, dob ai ipakuhon ma pasuk-pasuk ai hu parsuntinganni tolpus hu tanoh, ai domma sinok tumang ia halani lojani, jadi matei ma ia.

²²Sanggah na roh si Barak mandakdaki si Sisera, luar ma si Jael manjumpahkonsi, anjaha nini ma hu bani: Roh ma ham, ase hupatuduhkon bamu dalahi na pinindahanmu ai. Jadi masuk ma ia hubagas lampolampo ai gabe ididah ma si Sisera tibal matei, anjaha pasuk-pasuk ai bani parsuntinganni.

²³Sonai ma ipatunduk Naibata si Jabin, raja hun Kanaan bani ari na sasada ai, i lobei ni halak Israel.

²⁴Jadi lambin gogohni ma tangan ni halak Israel mangodohkon si Jabin, raja ni tanoh Kanaan, paima siap si Jabin, raja ni tanoh Kanaan ai ibahen sidea.