Read Batak Simalungun PANGUHUM 5 Bible Online

PANGUHUM 5 - Batak Simalungun bible

PANGUHUM 5

¹Jadi mandoding ma si Debora pakon si Barak, anak ni si Abinoam bani ari na sasada ai.

²Halani adong pambobai na mambobai Israel, halani rosuh uhur ni bangsa in manggalangkon dirini; puji ma Jahowa! [31]

³Tangar ma, nasiam raja-raja! Tarehon ma pinggolmu, nasiam siparkuasa! Sihol mandoding ahu bani Jahowa, mandodingkon psalm bani Jahowa, Naibata ni Israel.

⁴Ale Jahowa, sanggah luar Ham hun Seir, sanggah roh Ham hun tanoh ni Edom, dugur do tanoh, burus langit, hombun pe manektekkon bahni. [32]

⁵Dugur do dolog i lobei ni Jahowa ai ma Dolog Sinai i lobei ni Jahowa, Naibata ni Israel. [33]

⁶Bani panorang ni si Samgar, anak ni si Anat, bani panorang ni si Jael, lungun pasar na bolon, anjaha halak na maningon mardalan, mardalan humbani dalan na maringgot. [34]

⁷Seng dong pambobai i Israel, seng dong tongon paima bangkit ham, Debora, bangkit songon inang i Israel.

⁸Dob ipilih Israel naibata na legan, masa ma porang i horbangan. Seng dong be taridah gantar age tanja i tongah-tongah ni ompat puluh ribu halak i Israel. [35]

⁹Laho do uhurhu hubani puanglima ni Israel, hubani sidea na mamberehon dirini, humbani rosuhni i tongah-tongah ni bangsa in. Puji ma Jahowa.

¹⁰Nasiam na mangajak halode silopak, nasiam na hundul i atas ni parmadani, nasiam na mardalan i dalan, baritahon nasiam ma in. [36]

¹¹Mangihutkon sora ni sipamursik bani ianan pambuatan bah, idodingkon halak do ijai, dear layak ni Jahowa, dear layak-Ni bani pambobai ni Israel. Tuad ma ijia bangsa ni Jahowa hu horbangan.

¹²Jongjong ma, jongjong ma, Debora! Jongjong ma, jongjong ma, dodingkon ma sada doding! Jongjong ma, Barak! arahkon ma na tinabanmu in, ham anak ni si Abinoam!

¹³Jadi tuad ma tading-tadingan ni partuanan, tuad ma bangsa ni Jahowa hubani parporangan na borani.

¹⁴Humbani halak Efraim tuad sidea hu habungan, mangirikkon ham, halak Benjamin: pakon balamu; humbani halak Makir tuad puanglima, anjaha humbani halak Sebulon siboban tungkot harajaon. [37]

¹⁵Sonai homa pambobai ni halak Isasar mangkasomani si Debora, anjaha si Isasar bujur bani si Barak; mardalan nahei mangirikkonsi idorab ma hu habungan ai. I tongah-tongah ni ginompar ni si Ruben, buei do partimbangan.

¹⁶Mase sohsoh ham i holangkolang ni harang ni biribiri, laho manangihon parsulim i lambung hulanan ni pinahan? I tongah-tongah ni ginompar ni si Ruben buei do partimbangan!

¹⁷Tading i dipar ni Jordan do halak Gilead; anjaha halak Dan, mase sohsoh sidea i lambung ni kapal-kapal? Halak Asser hundul i topi ni laut, sohsoh i juruk-jurukni.

¹⁸Tapi halak Sebulon ai ma bangsa na ra mamberehon hosahni hu hamatean, sonai homa Naftali, bani ianan na gijang i ladang. [38]

¹⁹Roh ma raja-raja marporang; bani ari ai marporang ma raja-raja ni tanoh Kanaan, i Taanak, dohorhon Bah Megiddo; sada duit pirak pe lang dong rampason ni sidea.

²⁰Hun langit marporang bintang-bintang, humbani dalan ni sidea iporangi sidea si Sisera.

²¹Bah nabasaia do Bah Kison mangayubkon sidea, bah nabasaia do Bah Kison. Langkahkon ma, ale tonduyhu, marhagogohon. [39]

²²Bani panorang ai marolob-olob ma tambirik ni huda, halani pamosik ni puanglimani.

²³Papai ma Meroz, nini malekat ni Jahowa, sabonar papai ma pangisini, halani seng roh sidea mangurupi Jahowa, mangurupi Jahowa mangkasomani parporang na borani. [40]

²⁴Pinasu-pasu ma si Jael, parinangon ni si Heber, halak Keni ai, lobih humbani sagala naboru, pinasu-pasu ma ia, lobih humbani sagala naboru na ibagas lampolampo.

²⁵Bah do ipindo, dadih ibere, ibagas mangkuk na maharga ibere bani dadih. [41]

²⁶Idurdurhon ma tanganni mambuat pasuk-pasuk, tanganni siamun mambuat parpalu. Ipalu ma si Sisera, ipuntarhon uluni, iropuki anjaha itolpus ma parsuntinganni.

²⁷Pugul ma ia dabuh i holangkolang ni naheini, matei anjaha tibal ijai; i holangkolang ni naheni dabuh halak ai anjaha matei, bani hadabuhanni ai, ijai ma ia tibal ibogbogi.

²⁸Humbani tingkap manungkir inang ni si Sisera, anjaha mardilo humbani jandela: Mase hun dokah roh garetani? Mase ma hun dokah tarbogei sora ni garetani?

²⁹Sipentaran i tongah-tongah ni nasipuang mambalosisi, ia sandiri marbalos bani:

³⁰Ai lang mandapot taban-taban do sidea anjaha marbagi-bagi ai? Sada barang dua anak boru bani ganup halak, hiou tinubar, na tinaban bani si Sisera, hiou tinubar na sinulam, saparangguan hiou tinubar, na sinulam, bani borgokku songon taban-taban.

³¹Sonin ma siap ganup munsuhmu, ale Jahowa. Tapi anggo na mangkaholongi Ham, songon mata ni ari na poltak bani hagogohonni do. Dob ai sonang ma tanoh ai ompat puluh tahun dokahni. [42]