Read Batak Simalungun PANGUHUM 8 Bible Online

PANGUHUM 8 - Batak Simalungun bible

PANGUHUM 8

¹Dob ai nini halak Efraim ma hu bani, “Mase ma sonai pambahenmu bennami, ai lang iarahkon ham hanami marmunsuh dompak halak Midian? Banggal tumang do hutuk ni sidea bani. [61]

²Tapi nini ma dompak sidea, ʻAha ma na hubahen in anggo na partimbangkon hubani na binahen nasiam?ʼ Ai lang dearan do parturiangan ni halak Efraim humbani pariama buah anggur ni halak Abieser? [62]

³Hubagas tangan nasiam do iondoskon Naibata raja ni halak Midian, ai ma si Oreb pakon si Zeeb, aha ma na hubahen anggo ipartimbangkon hubani nasiam?“ Jadi dob ihatahon sonai, mahombun ma ringis ni sidea dompaksi.

⁴Jadi dob das si Gideon hu Bah Jordan, mandipar ma ia rap pakon hasomanni na tolu ratus halak ai, domma loja, tapi sai inunut do mangayak-ayak.

⁵Nini ma dompak parhuta Sukot, “Tolong nasiam ma mambere otik roti bani halak na mangirikkon ahu on; ai domma latih sidea, anjaha na mangayak-ayak si Zeba pakon si Salmuna raja ni halak Midian do hanami.

⁶Tapi nini pangintuai ni huta Sukot ma, ʻDomma ondos gakni tangan ni si Zeba pakon si Salmuna hubagas tanganmu, ase bereonnami ruti hubani balamu?ʼ

⁷Dob ai nini si Gideon ma, ʻAnggo sonai, ia dob ibere Jahowa si Zeba pakon si Salmuna hubagas tanganku, bogboganku ma angkula nasiam bani duri ampa tatada na hun halimisan.ʼ ”

⁸Dob ai tangkog ma ia hunjai hu Penuel, anjaha ihatahon ma sonai hubani sidea, tapi ibalosi par Penuel ma ia songon parbalos ni par Sukot ai. [63]

⁹Dob ai nini ma homa dompak par Penuel ai, “Anggo mulak ahu horas-horas, parreongonku ma manara on.”

¹⁰Tapi anggo si Zeba pakon si Salmuna i Karkor do rap pakon bala ni sidea, hira-hira sapuluh lima ribu halak bueini, ai ma sagala na tading ope humbani ganup bala ni halak parhapoltakan; ai domma rasei saratus dua puluh ribu halak na marsinjatahon podang.

¹¹Ia si Gideon, tangkog do ia hun dalan ni halak siiani lampolampo hampit hapoltakan ni Nobah pakon Jogbeha, anjaha idorab ma bala ai, na so panagaman ni sidea.

¹²Maporus ma si Zeba pakon si Salmuna, tapi ipardakdak si Gideon ma sidea anjaha dapotsi do na dua raja ni Midian ai, si Zeba pakon si Salmuna, anjaha mambur merap do ganup bala ai ibahen.

¹³Dob ai mulak ma si Gideon, anak ni si Joas hun parporangan hun tangkogan Heres;

¹⁴itangkap sidea ma sahalak garama parhuta Sukot ai, isungkuni sidea ma ia; jadi isurati ma goran-goran ni pambobai pakon pangintuai-pangintuai ni Sukot bani si Gideon, pitu puluh pitu halak bueini.

¹⁵Dob ai laho ma ia hubani parhuta Sukot anjaha nini ma, “Andon ma si Zeba pakon si Salmuna, marhalanihon ni sidea domma iapasi nasiam ahu, pala ihatahon nasiam, ʻDomma gakni ondos hu tanganmu si Zeba pakon si Salmuna, ase bereonnami ruti hubani balamu na loja in?ʼ ”

¹⁶Dob ai itangkapi ma pangintuai ni huta ai, ibuat ma pakon duri ampa tatada na hun halimisan, ijora ma sidea marhitei ai.

¹⁷Tapi iparreong do manara ni Penuel anjaha ibunuhi parhuta ai. [64]

¹⁸Dob ai nini ma dompak si Zeba pakon si Salmuna, “Ija do halak na dob binunuh nasiam i Tabor? Balos ni sidea, ʻUsih do sidea hu bamu, ganup songon rupa ni anak ni raja-raja.ʼ

¹⁹Dob ai nini si Gideon ma, ʻSaninangku do sidea, anak ni inangku. Songon sintongni manggoluh Jahowa, ambit na ipagoluh nasiam sidea, seng bunuhonku nasiam.ʼ

²⁰Jadi ihatahon ma hubani si Jeter bunga tubuhni ai, ʻBunuh ma sidea!ʼ Tapi seng ra garama ai manintak podangni, halani mabiar ia, ai poso ope ia.

²¹Nini si Zeba pakon si Salmuna ma, ʻHam sandiri ma jongjong mamunuh hanami, ai sonin halak, sonai do gogohni.ʼ Jadi jongjong ma si Gideon, ibunuh ma si Zeba pakon si Salmuna; anjaha ibuat ma jagar-jagar na bani borgok ni unta ni sidea.”

²²Dob ai nini halak Israel ma dompak si Gideon, “Rajai ma hanami, age ham, age anakmu, age pahompumu, ai ham do na paluahkon hanami hun tangan ni halak Midian.

²³Nini si Gideon ma mambalosi sidea, ʻSeng ahu marrajai nasiam, anjaha seng anakku marrajai nasiam, Jahowa do na marrajai nasiam.ʼ [65]

²⁴Ambah ni ai nini si Gideon ma, ʻSada do na hupindo humbani nasiam: Ganup ma nasiam mambere bangku anting-anting omas taban-tabanni bei. Ai maranting-anting omas do sidea, ai halak Ismael do sidea.ʼ

²⁵Nini sidea ma mambalosi, ʻRa do hanami mamberehon ai.ʼ Jadi dob ipaherbang sada hiou, ganup ma sidea mannahkon anting-anting taban-tabanni ai hujai.”

²⁶Ia borat ni anting-anting omas na pinindoni ai saribu pitu ratus sekel omas do, legan ni ugas-ugas na songon bulan sasabi, ugas na i pinggol pakon hiou hasumba na pinakei ni raja-raja ni halak Midian, legan ni horungkorung na i borgok ni unta ni sidea.

²⁷Dob ai ibahen si Gideon ma ai gabe baju efod, ipajongjong ma ai i hutani i Ofra. Ganup halak Israel marsombah ma hujai, anjaha gabe tirangkap ma ai bani si Gideon pakon ginomparni. [66]

²⁸Sonai ma partunduk ni halak Midian ibahen halak Israel, seng boi padurgak uluni bei; jadi marsonang-sonang ma tanoh ai ompat puluh tahun dokahni bani panorang ni si Gideon. [67]

²⁹Mulak ma homa si Jerubbaal, anak ni si Joas, lanjar marianan i rumahni.

³⁰Adong do anak bani si Gideon pitu puluh halak, na pinupusni, ai buei do parinangonni,

³¹sonai homa siampar apeini i huta Sikem itubuhkon do sada anak bani, anjaha ibahen ma goranni si Abimelek.

³²Dob ai matei sayurmatua ma si Gideon anak ni si Joas, anjaha itanom ma i tanoman ni si Joas, bapani ai, i Ofra, tanoh ni halak Abieser. [68]

³³Dob matei si Gideon, marbalik ma halak Israel, isombah ma Baal, anjaha ibahen ma Baal-Berit gabe naibata ni sidea. [69]

³⁴Seng idingat halak Israel be Jahowa, Naibata ni sidea, na paluahkon sidea humbani munsuh ni sidea inggot.

³⁵Seng homa ipataridahkon sidea tarima kasih ni uhurni bani ginompar ni si Jerubbaal, ai ma si Gideon, balos ni ganup na madear, na binahenni hubani halak Israel. [70]