Read Batak Simalungun 2 JOHANNES 1 Bible Online

2 JOHANNES 1 - Batak Simalungun bible

2 JOHANNES 1

¹Hun bangku, sintua in, hubani inang na tarpilih in, ampa dakdanakni, na huhaholongi ibagas hasintongan, seng ahu tumang tene, tapi dihut do haganup na dob mananda hasintongan in, [1]

²halani hasintongan na marianan ibagas hita, anjaha na mangkasomani hita ronsi sadokah ni dokahni.

³Ihasomani idop ni uhur, parontou ni uhur ampa damei ma hita, humbani Naibata Bapa ampa humbani Jesus Kristus, Anak ni Bapa in, marhitei hasintongan ampa haholongon.

⁴Malas tumang do uhurhu halani jumpah ahu i tongah-tongah ni anakmu na marparlahou ibagas hasintongan domu hubani titah, na dob ijalo hita humbani Bapa in.

⁵Anjaha sonari, mangindo ma ahu bamu inang na pinarsangapan, sedo songon titah na baru husuratkon bamu, tapi na dob dong banta humbani mulani do, “Marsihaholongan ma hita samah hita.” [2]

⁶Anjaha on do holong ni uhur in, ase marparlahou hita domu hubani titah-Ni in. On ma titah in, songon na dob ibogei nasiam humbani mungkahni, ase ibagas ai nasiam marparlahou. [3]

⁷Ai domma bingkat buei parpodah na kahou roh hu dunia on, na so mangakui Jesus Kristus roh ibagas daging. In ma parpodah na kahou anjaha Antikristus in. [4]

⁸Jaga nasiam ma diri nasiam, ase ulang magou humbani nasiam na dob hinorjahon nasiam, tapi jumpahan upah na gok ma nasiam. [5]

⁹Ganup na manadingkon na so totap ibagas pangajaran ni Kristus, seng parrupei ai bani Naibata. Na totap ibagas pangajaran in, in do parrupei bani Bapa in ampa Anak in. [6]

¹⁰Anggo adong na roh bani nasiam, na so mamboan pangajaran on, ulang ma jalo nasiam ia hu rumah, anjaha ulang ma tabi nasiam ia. [7]

¹¹Ai barang ise na manabisi, na dihut ma ai bani horja hajahatonni ai.

¹²Buei do namin na sihol suratkononku bani nasiam, tapi seng marosuh uhurhu marhitei kortas ampa tinta tumang, huarap do boi ahu roh manjumpahkon nasiam, ase boi dumpar bohi bei marsahap, ase gok malas ni uhurta. (3 Joh. 13)

¹³Manongos tabi do bamu anak ni saninamu, na tarpilih in.