Read Batak Simalungun 3 JOHANNES 1 Bible Online

3 JOHANNES 1 - Batak Simalungun bible

3 JOHANNES 1

¹Hun bangku, sintua in, hubani si Gayus, na hinaholongan, na huhaholongi ibagas hasintongan. (2 Joh. 1)

²Ham na hinaholongan, iparsinta uhurhu do, ase horas anjaha jorgit ham ibagas haganup, domu hubani hajorgiton ni tonduymu.

³Malas tumang do uhurhu, sanggah na roh hasoman-hasomanta, anjaha isaksihon sidea do pasal hasintongan na adong bamu, sonaha ham marparlahou ibagas hasintongan. (2 Joh. 4)

⁴On do malas ni uhurhu sibanggalan, ai ma, anggo hubogei marparlahou anakku ibagas hasintongan.

⁵Ham na hinaholongan, dear do pambahenmu in bani hasoman-hasoman ampa bani halak na legan.

⁶Isaksihon sidea do holong ni uhurmu i lobei ni kuria in. Dear ma in anggo ipabingkat ham sidea bani pardalanan ni sidea, domu hubani rosuh ni Naibata. [1]

⁷Ai halani goran in do sidea bingkat, anjaha seng dong ijalo sidea atap aha pe humbani halak sipajuh begu-begu. [2]

⁸Halani ai, patut do jaloonta halak sisonin, ase hasoman parhorja hita bani hasintongan in. [3]

⁹Manongos surat do ahu otik bani kuria in, tapi lang ijalo si Diotrepes hanami, ai ma na sihol sigijangan ai humbani sidea ninuhurni.

¹⁰Halani ai, anggo roh ahu, tarsingatanku ma pambahenanni ai, ai ma na pasambor-samborhon hanami marhitei hata-hata, anjaha seng sonang uhurni singgan sonai tumang, manjua do ia manjalo sanina in, anjaha ilanglangi na sihol manjalo, ipabali humbani kuria in.

¹¹Ham na hinaholongan, ulang ma tiru na masambor, tapi na madear ma. Hun bani Naibata do halak na mangkorjahon na madear, tapi sihorjahon na masambor seng ongga ididah ai Naibata. [4]

¹²Jumpahan hasaksian do si Demetrius humbani haganup, ampa humbani hasintongan in sandiri, sonai homa hun bennami, anjaha ibotoh ham do, sintong do hasaksian na hun bennami in. [5]

¹³Buei do namin sisuratkononku bamu, tapi seng marosuh uhurhu manurat bamu marhitei tinta ampa panurat. (2 Joh. 12)

¹⁴Tapi arap do uhurhu podas ham boi idahonku, jadi boi ma hita padumpar bohi marsahapi.

¹⁵Damei ma bamu. Manongos tabi do bamu hasoman-hasoman in. Padas ham tabingku bani hasoman-hasoman in sada-sada!