Read Batak Simalungun RUT 1 Bible Online

RUT 1 - Batak Simalungun bible

RUT 1

¹Sanggah na manggomgomi panguhum-panguhum ai, masa ma sahali lohei i tanoh ai. Dob ai bungkas ma sada halak hun Betlehem, Juda rap pakon parinangonni ampa anakni dua halak, laho manginsolat hu tanoh Moab. [1]

²Goran ni dalahi ai si Elimelek do, goran ni parinangonni si Naomi, anjaha goran ni anakni na dua ai si Malon pakon si Kilion. Halak Eprata do sidea hun Betlehem Juda; das ma sidea i tanoh Moab, lanjar marianan ijai. [2]

³Matei ma si Elimelek, paramangon ni si Naomi ai, gabe tading ma ia pakon anakni na dua ai.

⁴Ibuat sidea ma boru Moab bahen parinangon ni sidea; goran ni na sada si Orpa, goran ni na sada nari si Rut. Dong ma sidea hira-hira sapuluh tahun marianan ijai.

⁵Matei ma homa sidea haduasi, si Malon pakon si Kilion, gabe punjung ma puang-puang ai dob matei anakni na dua ai pakon paramangonni ai.

⁶Dob ai bingkat ma puang-puang ai rap pakon parumaenni na dua ai, mulak hun tanoh Moab, ai domma ibogei i Tanoh Moab, na dob marpangulaki uhur ni Jahowa mangidah bangsa-Ni anjaha ibere sipanganon bani sidea. [3]

⁷Jadi itadingkon sidea ma ianan panginsolatanni ai, rap pakon parumaenni na dua halak ai, laho mardalan mulak hu tanoh Juda.

⁸Dob ai nini si Naomi ma hubani parumaenni na dua halak ai, “Laho ma nasiam mulak hu rumah ni inang nasiam bei. Sai idop ma uhur ni Jahowa mangidah nasiam, romban hubani na binahen nasiam hubani na matei ondi pakon hu bangku. [4]

⁹Sai ilayak-layakkon Jahowa ma bani nasiam, ianan hasonangan ganup i rumah ni paramangonni bei!” Dob ai isummah ma sidea, anjaha ipagogoh bei sorani tangis-tangis. [5]

¹⁰Nini sidea ma dompak simatuani ai, “Lang, maningon odor do hita mulak bani bangsamu.”

¹¹Tapi nini si Naomi ma, “Mulak ma nasiam, inang! Mase ma sihol uhur nasiam bingkat rap pakon ahu? Seng anjai tubuh be anakku bahen paramangon nasiam.

¹²Mulak ma nasiam, inang, ai domma matuatu ahu anggo marparamangon ahu use. Porini pe huhatahon, ʻAdong ope pangarapan bangku, anjaha borngin on marparamangon ahu, anjaha tubuhan anak ahu,

¹³tor tarpaima nasiam ma sidea paima ma godang?ʼ Tor tarlanglang ma nasiam marrumah tangga? Ulang ma sonai inang, ai paet do na hudagei halani nasiam, na mangonai ai tangan ni Jahowa hu bangku.” [6]

¹⁴Ipagogoh sidea ma use sorani anjaha marompot tangis-tangis; isummah si Orpa ma simatuani ai, tapi anggo si Rut irohop do ia.

¹⁵Nini si Naomi ma, “Tonggor ma, domma mulak abangmu hubani bangsani pakon hubani naibatani; mulak ma ho, irikkon ma abangmai.”

¹⁶Tapi nini si Rut ma, “Ulang ma sai ajar-ajari ham ahu manadingkon ham, barang sirang hun bamu; ia huja ham laho, hujai do ahu laho, ia huja ham marianan, hujai do ahu marianan; bangsamu mando bangsangku, anjaha Naibatamu mando Naibatangku; [7]

¹⁷ ija ham matei, ijai ma ahu matei, ijai ma ahu tanomon. Sai sonai ma ibahen Jahowa hu bangku, anjaha porini lobih ope, pitah hamatean mando, na boi manirang ahu hun bamu.” [8]

¹⁸Jadi dob ididah si Naomi, na dob putus uhurni mangirikkonsi, seng inunut be marsahap.

¹⁹Dob ai inunut sidea na dua ai ma mardalan, paima das sidea hu Betlehem. Dob das sidea hu Betlehem, guntar ma parhuta ai halani sidea; nini naboru-naboru ai ma, “Ai on do si Naomi ondi?”

²⁰Tapi nini ma dompak sidea, “Ulang be goran nasiam ahu si Naomi, goran nasiam ma ahu si Mara, ai paet tumang do pambahenan ni Pargogoh Na So Tarimbang in hu bangku. [9]

²¹Bayak do ahu bingkat hunjon, tapi sombuh do ahu mulak ibahen Jahowa. Mase igoran nasiam ahu si Naomi, ai domma isalahkon Jahowa ahu anjaha marhinamagou ahu ibahen Pargogoh Na So Tarimbang in.”

²²Ase sonai ma parmulak ni si Naomi rap pakon si Rut, boru Moab, parumaenni ai, hun tanoh Moab. Das ma sidea hu Betlehem sanggah mungkah ni pariama.