Read Batak Simalungun RUT 2 Bible Online

RUT 2 - Batak Simalungun bible

RUT 2

¹Tapi adong ma bani si Naomi sada hade-hade mangihutkon paramangonni hinan, na bayak tumang, hasoman samarga ni si Elimelek, na margoran si Boas. [10]

²Nini si Rut, boru Moab ai ma dompak si Naomi, “Mahua lopas ham ma ahu laho hu juma manjomputi buyur ni gandum mangirik-irik halak na maridop ni uhur mangidah ahu.” Nini si Naomi ma, “Laho ma ham, inang.” [11]

³Dob ai laho ma ia manjomputi buyur ni gandum i juma mangirik-irik sipanabi, anjaha tudu do ia hu juma parbagianan ni si Boas, hasoman samarga ni si Elimelek.

⁴Tonggor ma, tudu do roh si Boas hun Betlehem, anjaha nini ma dompak sipanabi ai, “Sai ihasomani Jahowa ma nasiam!” Ibalosi sidea ma, “Sai ipasu-pasu Jahowa ma ham!”

⁵Dob ai nini si Boas ma dompak juakjuakni, na mammanduri sipanabi ai, “Boru ni ise do ai?” [12]

⁶Nini juakjuak na mammanduri sipanabi ai ma, mambalosi, “Ai ma boru Moab, na mulak rap pakon si Naomi hun tanoh Moab. [13]

⁷Nini nongkan, ʻMahua lopas ham ma ahu manjomputi i holangkolang ni radean mangirik-irik sipanabi in!ʼ Roh ma ia tongon, jadi sai inunut do humbani na sogod nari ronsi sonari, tongkin pe seng marsaran ia.”

⁸Dob ai nini si Boas ma dompak si Rut, “Tangar ham ma hatangkon botou, ulang ma ham laho manjomputi bani ladang na legan, ulang ma laho ham hunjon, tapi sai i lambung ni jabolonku naboru in ma ham!

⁹Sai pardiateihon ham ma juma na sinabi ni sidea, anjaha irikkon ham ma sidea. Domma huhatahon hubani juakjuakku, ase ulang igeori sidea ham. Anggo horahan ham laho ma ham hu gusi ai, inum ham ma humbani na tinahuan ni juakjuak ai.”

¹⁰Jadi isombah si Rut ma ia, pala dais bohini hu tanoh, lanjar nini ma hu bani, “Aha do dalanni, ase dapotan idop ni uhur ahu i lobeimu, gabe isarihon uhurmu ahu, ahu halak dagang on?” [14]

¹¹Nini si Boas ma mambalosisi, “Domma hubogei haganup, sagala na binahenmu hubani simatuamu, dobkonsi matei paramangonmu, naha panadingkonmu bani namatorasmu pakon tanoh hatubuhanmu, gabe laho ham marayak bangsa na so tinandamu. [15]

¹²Sai Naibata ma mambalaskon hu bamu sagala na madear na binahenmu ai, anjaha upah na gok ma bagianmu humbani Jahowa, Naibata ni Israel, na pinarayakmu laho maronding-onding hu toruh ni habong-Ni.”

¹³Dob ai nini ma, “Banggal do idop ni uhurmu mangidah ahu, ham tuanku! Iapohi ham do ahu, anjaha basar do ham hu bangku jabolonmu naboru on, age pe seng jabolonmu naboru ahu namin.”

¹⁴Bani panorang mangan, nini si Boas ma hu bani, “Roh ma ham, mangan ruti otik, sosahkon ham ma rutimu hubagas na migar in.” Jadi hundul ma si Rut i lambung ni panabi ai, ibere si Boas ma homa hubani gandum na pinahpah, gabe bosur ma ia mangan pala marlobih-lobih. [16]

¹⁵Jongjongkonsi ia laho manjomputi, nini si Boas ma dompak juakjuakni, “Paturut nasiam ma ia manjomputi i holangkolang ni radean ai, ulang ma gapgapi nasiam ia.

¹⁶Pampeperhon nasiam homa deba bani humbani radean ai, anjaha tadingkon nasiam, ase ijomputi, anjaha ulang hatai nasiam ia.” [17]

¹⁷Jadi sai inunut ma manjomputi i juma ai ronsi bod ari; dob ai idogei ma na jinomputanni ai, adong hira-hira satapongan bueini.

¹⁸Dob ai ijujung ma ai laho mulak hu hutani, ipatuduh ma hubani simatuani na jinomputanni ai; ipadarat ma anjaha ibere ma teba-teba ni sipanganonni ai hu bani. [18]

¹⁹Nini simatuani ai ma hu bani, “Ija do ho manjomputi sadari on? Anjaha ija do ho marombou? Pinasu-pasu ma dalahi na marpanatap bam.” Jadi ipatugah ma bani simatuani ai barang i ladang ni ise do ia na marhorja ai, nini ma, “Si Boas do goran ni dalahi simada juma panjomputankai sadari on.” [19]

²⁰Jadi nini si Naomi ma dompak parumaenni ai, “Sai ipasu-pasu Jahowa ma ia. Ai seng ialang Jahowa holong ni uhur-Ni bani halak na manggoluh pakon na dob matei.” Ambahni ai nini si Naomi ma hu bani, “Dalahi ai do sidohoran banta, ia do tama sitobus hita.” [20]

²¹Nini si Rut, boru Moab ai ope, “Ambah ni ai ihatahon ope hu bangku, ʻManingon juakjuakku romban-rombananmu, paima dob isabi sidea ganup jumangkai.ʼ ” [21]

²²Dob ai nini si Naomi ma dompak si Rut, parumaenni ai, “Dear do ai, inang, anggo rap pakon juakjuakni naboru ai ho laho, ase ulang igeori halak ho i juma ni halak na legan.”

²³Jadi sai i lambung jabolon naboru ni si Boas ma si Rut manjomputi paima dob pariama limbuah pakon pariama bolon; jadi tading rap pakon simatuani ma ia.