Read Batak Simalungun 1 SAMUEL 14 Bible Online

1 SAMUEL 14 - Batak Simalungun bible

1 SAMUEL 14

¹Bani na sadari ai, nini si Jonatan, anak ni si Saul ma dompak juakjuak siusung sinjatani, “Eta ma hita mandipar hu parsaranan ni halak Palistim na i dipar ai.” Tapi otik pe lang ipatugah pasal ai hu bani bapani.

²Tapi hundul-hundul do anggo si Saul i parbalogan ni Gibea i toruh ni dalima na i Migron, anjaha bala na rap pakonsi adong do hira-hira onom ratus halak. [137]

³Anggo si Ahia, anak ni si Ahitub, abang ni si Ikabot, anak ni si Pinehas, anak ni si Eli, malim ni Jahowa i Silo marpakeian epod do; tapi seng ibotoh bala ai, na dob laho si Jonatan. [138]

⁴Tapi i holangkolang ni pandiparan ni si Jonatan laho mandipar hu parsaranan ni halak Palistim ai adong do dua dolog batu padipar-dipar, goran ni na sada Bozes, goran ni na sada nari Sene.

⁵Dolog batu na sada jongjong hampit utara tontang ni Mikmas, na sada nari i dangsina tontang ni Gibea.

⁶Jadi nini si Jonatan ma dompak juakjuak siboban sinjatani, “Eta ma hita mandipar hu parsaranan ni halak na so marsunat ai, andohar iurupi Jahowa hita, ai seng payah bani Jahowa mangurupi marhitei na buei atap na otik.” [139]

⁷Jadi nini siboban sinjatani ai ma hu bani, “Bahen ma ganup na dear nini uhurmu; tonggor ma, i lambungmu do ahu, songon uhurmu ai do uhurhu.”

⁸Dob ai nini si Jonatan ma, “Tonggor ma, mandipar ma hita hu bani halak ai, pataridahkon dirinta hu bani sidea.

⁹Anggo sonon ihatahon sidea banta, ʻPaima nasiam ma hanami Ijin,ʼ jadi soh ma hita i hajongjonganta, anjaha ulang ma hita tangkog marayak sidea.

¹⁰Tapi anggo ihatahon sidea, ʻTangkog ma nasiam bennami!ʼ Jadi tangkog ma hita, ai domma iondoskon Jahowa sidea hubagas tanganta, ai ma gabe partanda banta.” [140]

¹¹Jadi dob ipataridahkon sidea na dua dirini hu parsaranan ni halak Palistim ai, nini halak Palistim ai ma, “Tonggor ma, domma luar halak Heber hun bani liang parponopan ni sidea na sain dokah.”

¹²Dob ai idilohon halak na i parsaranan ai ma hu bani si Jonatan pakon siboan sinjatani ai, nini ma, “Tangkog ma nasiam bennami, adong sipatugahonnami otik bani nasiam!” Jadi nini si Jonatan ma hu bani siboan sinjatani ai, “Irikkon ma ahu tangkog; ai domma iondoskon Jahowa sidea hu tangan ni Israel.”

¹³Dob ai manggawang ma si Jonatan tangkog hu atas, anjaha siboban sinjatani ai irik hun pudi. Jadi iribas si Jonatan ma sidea, anjaha siboan sinjatani ai pamateihon hun pudi. Satongah lambar juma do parmateian ni sidea ai. [141]

¹⁴Anjaha pamunuhan na parlobei na binahen ni si Jonatan ampa siboban sinjatani ai ma tar dua puluh halak; ibagas satongah lambar juma do pardiharan ni sidea ai.

¹⁵Jadi sogop ma hagobiron bani parsaranan ai, i ladang pakon i tongah-tongah ni bala ai ganup; sonai homa halak parjaga pakon panamun ai. Dugur ma homa tanoh ai; panonggot hun bani Naibata do ai. [142]

¹⁶Anjaha halak parkahap ni si Saul i Gibea-Benjamin manatap-natap do; gabe iidah sidea ma marhujai-hujon halak simbuei ai.

¹⁷Jadi nini si Saul ma hu bani bala na rap pakonsi, “Bilang anjaha patae barang ise hun banta na laho.” Jadi ibilang sidea ma, gabe tonggor ma, seng ijai si Jonatan pakon siboban sinjatani.

¹⁸Dob ai nini si Saul ma dompak si Ahia, “Boan hujon Poti ni Naibata. Ai i tongah-tongah ni halak Israel do ijia poti ni Naibata.” [143]

¹⁹Jadi sanggah na marsahap ai ope si Saul pakon malim ai, lambin gandani ma hageoron ai i parsaranan ni halak Palistim, gabe nini si Saul ma hu bani malim ai, “Seng pala be.” [144]

²⁰Dob ai mareta-eta ma si Saul rap pakon bala na rap pakonsi ai, gabe das ma sidea hu parporangan; hape na dob marsitagilan do sidea ijai, geor tumang. [145]

²¹Halak Heber pe, na dob dokah hasoman ni halak Palistim, na tangkog rap pakon sidea marporang, sidea pe domma gabe hasoman ni halak Israel, iirikkon ma si Saul pakon si Jonatan.

²²Anjaha ganup halak Israel, na marponop i Dolog Efraim, dob ibogei na dob maporus halak Palistim, sidea pe ipardakdak ma munsuh ai i parporangan ai. [146]

²³Sonai ma panumpak ni Jahowa bani halak Israel sadari ni ai; anjaha das do porang ai hu Bet-Aven.

²⁴Latih do halak Israel sadari ni ai, ai ipabija si Saul do bangsa ai, nini, “Hona papa ma barang ise na mangan sipanganon das ronsi bodari, ase mambahen pambalason ahu bani munsuhku!” Halani ai otik pe seng mangan bangsa ai.

²⁵Jadi das ma ganup bangsa ai hu sada parhuramahan anjaha radag do manisan ni huramah i talun ai. [147]

²⁶Sanggah na masuk ai bangsa ai hu parhuramahan ai, tonggor ma, mabaor do manisan ai, tapi sahalak pe lang adong na pag mambahen tanganni hu pamanganni; ai mabiar tumang do bangsa ai bani bija ai. [148]

²⁷Tapi seng ibogei si Jonatan bapani pabijahon bangsa ai, gabe idurdurhon ma ujung ni tungkot na ibagas tanganni ai hubagas asar ni huramah ai, anjaha inahkon ma tanganni hubagas pamanganni, gabe lihar ma pangkawahni.

²⁸Dob ai nini sahalak hun bani bangsa ai ma, “Gogoh tumang do bapanta pabijahon bangsa in, nini do, ʻHona papa ma barang ise na mangankon sipanganon sadari on.ʼ Jadi latih ma bangsa ai.”

²⁹Dob ai nini si Jonatan ma, “Bapangku do mambahen magou tanoh in; tonggor ma, naha lihar ni pangkawahku, dob hudai otik manisan ni huramah on.

³⁰Ai lang daoh dearan ambit ipangan bangsa in namin sadari on hun bani taban-taban na dapot sidea hun bani munsuh ni sidea?” Gabe halani ai seng sadiha banggal hataluan i tongah-tongah ni halak Palistim.

³¹Jadi italuhon sidea ma sadari ni ai halak Palistim singgan ni Mikmas das hu Ajalon, anjaha latih tumang do bangsa ai.

³²Dob ai ipindahi halak simbuei ai ma taban-taban, ibuat sidea ma biri-biri, lombu pakon anak ni lombu, anjaha isayat ma ai i tanoh ai; anjaha ipangan bangsa ai ma ai rap pakon darohni. [149]

³³Dob ai ipatugah sidea ma ai hu bani si Saul, “Tonggor ma, domma mardousa bangsa ai dompak Jahowa, halani ipangan sidea gulei marhasoman daroh.” Jadi nini ma, “Domma mardousa nasiam; guling nasiam ma hujon sada batu bolon bangku.”

³⁴Ambah ni ai nini si Saul ma, “Marserak ma nasiam hu tongah-tongah ni bangsa in, anjaha hatahon ma hu bani sidea, ʻGanup ma mamboan lombuni barang biri-birini anjaha isayat ma ai ijon, dob ai ipangan ma; anjaha ulang ma nasiam mardousa dompak Jahowa, marhitei na mangankon gulei rap pakon darohni.ʼ ” Jadi ganup ma bangsa ai marsiboan lombuni bornginni ai, anjaha isayat ma ijai.

³⁵Dob ai ipajongjong si Saul ma sada anjapanjap bani Jahowa; ai ma anjapanjap na parlobei na pinajongjongni bani Jahowa. [150]

³⁶Dob ai nini si Saul ma, “Eta ma hita tuad mardakdak halak Palistim borngin on, anjaha rampasi hita ma barangni ronsi torang ari; anjaha sahalak pe lang hun bani sidea tebahon hita.” Jadi nini sidea ma, “Bahen ham ma atap aha na dear nini uhurmu.” Tapi nini malim ai ma, “Padohor hita ma hujon bani Naibata.” [151]

³⁷Jadi isungkun si Saul ma Naibata, “Bulih do ahu tuad mardakdak halak Palistim? Ondoskononmu do sidea hu tangan ni halak Israel?” Tapi seng ibalosi Naibata ia sadari ni ai. [152]

³⁸Dob ai nini si Saul ma, “Roh ma hujon ganup pangintuai ni bangsa in; papangkei anjaha idah nasiam ma barang sonaha do ase masa dousa in sadari on.

³⁹Ai songon sintongni manggoluh Jahowa, na manumpak monang halak Israel, age pe bani si Jonatan anakkin jumpah dousa ai, maningon marutang hosah do ia. Ise pe lang hun bani bangsa in na mambalosi.”

⁴⁰Dob ai nini ma dompak ganup halak Israel, “Jongjong ma nasiam hampit jin, ahu pakon si Jonatan anakkin hampit jon.” Nini bangsa ai ma mambalosisi, “Bahen ham ma barang aha na dear nini uhurmu.”

⁴¹Jadi nini si Saul ma dompak Jahowa, “Ham Jahowa, Naibata ni Israel, mase ma lang ibalosi Ham jabolonmu sadari on? Anggo ahu do na marsalah barang si Jonatan anakkin, Ham Jahowa, Naibata ni halak Israel, patugah ham ma marhitei Urim; tapi anggo halak Israel do na marsalah, patugah Ham ma marhitei Tummim.” Jadi hona ma si Jonatan pakon si Saul, tapi maluah ma bangsa ai. [153]

⁴²Dob ai nini si Saul ma, “Dabuh nasiam ma ruji-ruji pasal ahu pakon pasal si Jonatan anakkin!” Jadi hona ma si Jonatan.

⁴³Dob ai nini si Saul ma dompak si Jonatan, “Patugah ma bangku barang aha do na binahenmin!” Dob ai ipatugah si Jonatan ma bani, “Hudai do otik manisan marhitei ujung ni tungkot na bani tanganku; ijon do ahu, sirsir do ahu matei.” [154]

⁴⁴Jadi nini si Saul ma, “Sonin do bahenon ni Jahowa bangku, anjaha tambahkonon-Ni ope; maningon matei do ho, Jonatan.”

⁴⁵Dob ai nini bangsa ai ma dompak si Saul, “Mintor matei ma si Jonatan, na mambahen hamonangan na sonin banggalni i Israel? Daoh ma in! Songon sintongni manggoluh Jahowa, seng bulih marurus jambulan ni uluni age sada hu tanoh, ai marhasomankon Naibata do ia na mangkorjahon ai sadari on.” Jadi bangsa ai mando na paluahkon si Jonatan mambahen lang matei ia.

⁴⁶Dob ai tangkog ma si Saul hun bani na mardakdak halak Palistim; mulak ma homa halak Palistim hu iananni bei.

⁴⁷Jadi dob si Saul manjujung harajaon i Israel, sai marmunsuh do ia dompak haganup munsuhni inggot, dompak Moab pakon halak Ammon, dompak Edom pakon raja na hun Zoba, pakon dompak halak Palistim; barang dompak ja pe idompakkon, sai monang do ia.

⁴⁸Ibahen do horja habanggalon, italuhon do halak Amalek, anjaha ipaluah do halak Israel hun bani tangan ni halak na manrampas sidea na sain dokah.

⁴⁹Ia anak ni si Saul on do: Si Jonatan, si Iswi pakon si Malkisua; goran ni boruni na dua ai on do: Goran ni sikahanan si Merab, anjaha goran ni sianggian si Mikal. [155]

⁵⁰Ia goran ni parinangon ni si Saul si Ahinoam do, boru ni si Ahimas; goran ni pambobai ni balani si Abner do, anak ni si Ner, bapanggi ni si Saul. [156]

⁵¹Ia si Kis, bapa ni si Saul, pakon si Ner, bapa ni si Abner, ai ma anak ni si Abiel.

⁵²Sai jobu do tong porang dompak halak Palistim sadokah goluh ni si Saul, halani ai ipatumpu si Saul ma hu lambungni sagala halak na garang pakon puanglima, sagala na niidahni. [157]