Read Batak Simalungun 1 SAMUEL 16 Bible Online

1 SAMUEL 16 - Batak Simalungun bible

1 SAMUEL 16

¹Nini Jahowa ma dompak si Samuel, “Sadia dokah on marhoru ho pasal si Saul, halani Huambukkon ia, ase ulang be ia raja manggomgom halak Israel? Isi ma tandukmu bani minak, anjaha laho ma ho; sihol suruhon-Ku do ho marayak si Isai, par-Betlehem ai; ai domma Hupilih Bangku sada hun bani anakni ai gabe raja.” [173]

²Dob ai nini si Samuel ma, “Sonaha ma parlangkahku hujai? Anggo ibogei si Saul ai, bunuhonni ma ahu.” Dob ai nini Jahowa ma hu bani, “Buat ma anak ni lombu sada, anjaha hatahon ma, ʻNa laho manggalang bani Jahowa do ahu, ase roh.ʼ

³Anjaha dilo ma si Isai hu panggalangan ai, dob ai patugahon-Ku bam barang aha na sihol sibahenonmu; maningon minakanmu do Bangku barang ise, na sihol patugahon-Ku bam.”

⁴Dob ai ibahen si Samuel ma songon na hinatahon ni Jahowa bani, anjaha das ma ia hu Betlehem. Jadi hirjatan ma pangituai ni huta ai manjumpahkonsi, anjaha nini ma, “Damei do, na hinarohkonmu on?” [174]

⁵Jadi nini ma, “Damei do; na sihol manggalang bani Jahowa do, ase roh ahu; manguras ma nasiam, anjaha roh ma nasiam mangkasomani ahu hu panggalangan an.” Dob ai iuras ma si Isai pakon ganup anakni ai, lanjar idilo ma sidea hu panggalangan ai.

⁶Sanggah na masuk ai sidea, iidah ma si Eliab, gabe nini ma ibagas uhurni, ʻTontu on ma gakni siminakan i lobei ni Jahowa.ʼ

⁷Tapi nini Jahowa ma dompak si Samuel, “Ulang ma tonggor rupani barang togap ni badanni, ai seng ia sipilihon-Ku; ai seng songon pangidah ni jolma pangidah ni Jahowa; anggo jolma rupa do iidah, tapi anggo Jahowa uhur na ibagas ai do iidah.” [175]

⁸Dob ai idilo si Isai ma si Abinadab, anjaha ipabontaskon ma ia hun lobei ni si Samuel. Jadi nini ma, “Ia pe seng ipilih Jahowa.”

⁹Dob ai ipabontaskon si Isai ma si Samma. Tapi nini si Samuel ma, “Ia pe seng ipilih Jahowa.”

¹⁰Dob ai ipabontaskon si Isai ma anakni na pitu ai i lobei ni si Samuel. Tapi nini si Samuel ma dompak si Isai, “Seng dong hun bani sidea na ipilih Jahowa.” [176]

¹¹Dob ai nini si Samuel ma dompak si Isai, “Pitah on do anakmu ganupan?” Jadi nini ma, “Tading ope sietekan, anjaha tonggor ma, marmahan biri-biri do ia.” Dob ai nini si Samuel ma dompak si Isai, “Suruh ma na mangalopisi; ai seng anjai mangan ope hita, anggo seng ope roh ia hujon.” [177]

¹²Jadi isuruh ma na mangalopisi. Tapi magerger do huyumni anjaha jenges do rupani pakon potongan ni angkulani. Nini Jahowa ma, “Jongjongkon ma, minaki ma ia, ai in ma ia.” [178]

¹³Dob ai ibuat si Samuel ma tanduk parminakanni ai, anjaha iminaki ma ia, i tongah-tongah ni saninani ai. Jadi sogop ma Tonduy ni Jahowa bani si Daud singgan ni na sadari ai nari. Dob ai laho ma si Samuel mulak hu Rama. [179]

¹⁴Tapi surut ma Tonduy ni Jahowa hun bani si Saul, anjaha marulah ma sada tonduy na jahat, na sinuruh ni Jahowa bani. [180]

¹⁵Dob ai nini juakjuak ni si Saul ma dompaksi, “Tonggor ma, marulah do sada tonduy na jahat, na sinuruh ni Naibata bamu.

¹⁶Mahua parentahkon ham ma, ale rajanami, hu bani jabolonmu na i lobeimu, mangindahi sada halak na pandei marhusapi, ase anggo marulah tonduy na jahat na hun bani Naibata ai bamu, jadi igiut ma husapi ai, andohar malum iahap ham.” [181]

¹⁷Jadi nini si Saul ma dompak jabolonni ai, “Pindahi nasiam ma bangku sada halak na pandei manggiut husapi, anjaha boban ma ia hu bangku.”

¹⁸Jadi nini sada halak hun bani anak parana ai ma mambalosi, “Tonggor ma, hutanda do sada halak, anak ni si Isai, par-Betlehem, na mambotoh marhusapi, sada halak na borani anjaha na garang, na pandei marsahap-sahap, anjaha ihasomani Jahowa do ia.”

¹⁹Jadi isuruh si Saul ma suruhanni hu bani si Isai, nini ma, “Suruh ma hu bangku anakmu si Daud, siparmahan biri-biri ai.” [182]

²⁰Dob ai ibuat si Isai ma sada halode na mangusung ruti, pakon sada gusi hulingkuling, na marisi anggur ampa sada hambing tunggal, anjaha itongoskon ma ai marhitei si Daud anakni ai hu bani si Saul. [183]

²¹Jadi das ma si Daud hu bani si Saul anjaha marhorja ma ia i lobeini; holong tumang do uhur ni raja ai mangidahsi, anjaha ipabangkit ma ia gabe siboan sinjata.

²²Jadi isuruh ma suruhanni hu bani si Isai mangkatahon, “Mahua lopas ham ma si Daud marhorja i lobeihu, ai holong do uhurhu mangidahsi.”

²³Jadi anggo siar ma tonduy na jahat na sinuruh ni Naibata ai bani si Saul, mintor ibuat si Daud ma husapi ai, igiut ma ai; jadi ganggang ma iahap anjaha sonang ma uhurni, anjaha laho ma tonduy na jahat ai hun bani. [184]