Read Batak Simalungun 1 SAMUEL 18 Bible Online

1 SAMUEL 18 - Batak Simalungun bible

1 SAMUEL 18

¹Jadi dob salpu si Daud marsahap pakon si Saul, tarsangkut ma uhur ni si Jonatan bani si Daud, anjaha ihaholongi si Jonatan ma ia songon dirini sandiri.

²Lanjar ijalo si Saul ma ia sadari ni ai, anjaha seng ilopas be ia mulak hu rumah ni bapani. [195]

³Jadi ibahen si Jonatan ma parpadanan bani si Daud, halani holong do uhurni mangidahsi songon dirini sandiri. [196]

⁴Itanggali si Jonatan ma bajuni anjaha iberehon ma ai hu bani si Daud, pakon baju porangni ampa podangni, panahni pakon gonditni.

⁵Anjaha huja pe laho si Daud marporang isuruh si Saul sai monang do ia; gabe ipabangkit si Saul ma ia gabe puanglima. Anjaha rosuh do uhur ni ganup bangsa ai mangidahsi, sonai homa age juakjuak ni si Saul. [197]

⁶Sahali sanggah na mulak sidea, sanggah na mulak si Daud hun bani na manaluhon halak Palistim, roh ma naboru-naboru hun bani ganup huta ni halak Israel mandoding anjaha manortor-nortor mangalo-alo Raja Saul marhasoman tambur, surak-surak pakon parugas musik. [198]

⁷Jadi mandoding ma naboru ai marsibalos-balosan, nini ma, “Marribu-ribu do italuhon si Saul, tapi marlaksa-laksa do anggo si Daud.” [199]

⁸Jadi marah tumang ma si Saul, anjaha seng marosuh ia mambogei hata ai, nini ma, “Hu bani si Daud ihatahon sidea marlaksa-laksa, hape hu bangku marribu-ribu hansa; pitah harajaon in mando hape na so bani?”

⁹Jadi hun bani ari ai nari subil ma uhur ni si Saul mangidah si Daud.

¹⁰Patarni ai siar ma tonduy na jahat ai, na sinuruh ni Naibata hu bani si Saul, gabe ratou ma ia ibagas rumahni; tapi marhusapi do si Daud songon na sain dokah, anjaha pajolom-jolom tanja do anggo si Saul. [200]

¹¹Dob ai ipantomkon si Saul ma tanjani ai, ai nini uhurni, “Hupantom ma si Daud hu dingding ai!” Tapi idiharhon si Daud do, pala dua hali. [201]

¹²Jadi mabiar ma si Saul mangidah si Daud, ai ihasomani Jahowa do ia, tapi minsah do Ia anggo hun bani si Saul.

¹³Halani ai ipadaoh si Saul ma si Daud ai hun lambungni, anjaha ipabangkit ma ia gabe pambobai ni sisaribu; luar masuk do ia i lobei ni bangsa ai.

¹⁴Sai monang do ia bani sagala dalanni, ai ihasomani Jahowa do ia. [202]

¹⁵Jadi dob iidah si Saul sai marhamonangan do ia, gabe lambin mabiar ma ia mangidahsi.

¹⁶Tapi holong do uhur ni ganup halak Israel pakon Juda mangidah si Daud, ai luar masuk do ia i lobei ni sidea.

¹⁷Dob ai nini si Saul ma dompak si Daud, “Tonggor ma, ijon do borungku sikahanan, si Merab; hubere pe ia bahen parinangonmu; tapi gabe halak na garang ma ho bangku anjaha porangkon ma porang ni Jahowa.” Ai nini uhur ni si Saul, ʻUlang ma tanganku sandiri mangonai hu bani, tapi tangan ni halak Palistim ma patundukkonsi.ʼ [203]

¹⁸Jadi nini si Daud ma dompak si Saul, “Ise ma ahu, anjaha aha ma pangkungku pakon ginompar ni bapa i Israel, ase maningon gabe hela ni raja in ahu?” [204]

¹⁹Tapi dob jumpah panorangni, bereon si Merab, boru ni si Saul ai hu bani si Daud, gabe hu bani si Adriel par-Mehola ai do ia iberehon bahen parinangonni. [205]

²⁰Tapi holong do uhur ni si Mikal, boru ni si Saul ai mangidah si Daud; jadi adong ma na patugahkon ai hu bani si Saul, gabe rosuh ma ia mambogei hata ai.

²¹Ai nini uhur ni si Saul do, ʻHubere ma ia hu bani, ase gabe tirangkap ia bani, anjaha halak Palistim patundukkonsi.ʼ Halani ai nini si Saul ma dompak si Daud paduahalihon, “Gabe helangku ma ho sadari on.”

²²Jadi ihatahon si Saul ma hu bani juakjuakni, “Marsahap ma nasiam hu bani si Daud marponop-ponop, hatahon nasiam ma, ʻTonggor ma, rosuh do uhur ni raja in mangidah ho, anjaha ganup juakjuakni mangkaholongi ho; on pe balosi ma gabe hela ni raja in.ʼ ” [206]

²³Jadi ipatugah juakjuak ni si Saul ma hata ai hu bani si Daud. Tapi nini si Daud ma, “Na urah do gakni nini uhur nasiam gabe hela ni raja diri? Ai halak na musil anjaha na dorun do ahu.” [207]

²⁴Jadi ipatugah juakjuak ni si Saul ma hata ai hu bani, “Sonon do hata ni si Daud.”

²⁵Dob ai nini si Saul ma, “Sonon do sihatahonon nasiam hu bani si Daud, ʻSeng mangindo boli raja in, pitah saratus sibur-sibur ni halak Palistim do, bahen pambalason hu bani munsuh ni raja in.ʼ ” Ai nini uhur ni si Saul, ase matei si Daud marhitei tangan ni halak Palistim. [208]

²⁶Jadi dob ipatugah juakjuak ni si Saul hata ai hu bani si Daud, marosuh ma uhurni gabe hela ni raja ai. Tapi taram nape jumpah padan,

²⁷bingkat ma si Daud rap pakon balani, lanjar ibunuh ma dua ratus halak Palistim. Iboan si Daud ma sibur-sibur ni sidea ai, anjaha iberehon ma hu bani raja ai. Jadi ibere si Saul ma boruni, si Mikal gabe parinangonni.

²⁸Jadi dob iidah anjaha iahap si Saul, na ihasomani Jahowa do si Daud ai, anjaha halak Israel pe ganup mangkaholongisi,

²⁹lambin tambah ma biarni dompak si Daud. Ase munsuh ni si Saul do si Daud sadokah manggoluh ia. [209]

³⁰Sadihari pe luar halak Palistim marporang, banggalan do tong hamonangan ni si Daud marimbang haganup juakjuak ni si Saul, gabe tarmurmur tumang ma goranni. [210]