Read Batak Simalungun 1 SAMUEL 20 Bible Online

1 SAMUEL 20 - Batak Simalungun bible

1 SAMUEL 20

¹Dob ai lintun ma si Daud hun Nayot na i Rama. Dob das ia hu bani si Jonatan, nini ma, “Aha dong na hubahen? Aha salahku? Aha do salahku i lobei ni bapanta, ase sihol bunuhonni ahu?”

²Tapi nini si Jonatan ma, “Daoh ma in! Seng dong ibahen bapa atap aha pe, na banggal age na etek, anggo lang ope ipatugah hu bangku. Mase ma ponopkonon ni bapa ia on hun bangku? Seng tongon sonai.”

³Dob ai nini si Daud ma mambalosi, “Torang do ibotoh bapanta, na dob jumpahan idop ni uhur do ahu i lobeimu.” Gabe nini uhurni, ʻSeng bulih botohon ni si Jonatan hata on, ase ulang pusok uhurni. Tapi tongon do, songon sintongni manggoluh Jahowa, anjaha manggoluh pakon ho, pitah sanlangkah mando holangkolangku hun bani hamateian.ʼ

⁴Dob ai nini si Jonatan ma dompak si Daud, “Aha gakni pinindo ni uhurmu, si bahenonku bam?”

⁵Nini si Daud ma dompak si Jonatan, “Tonggor ma, patar ma poltak ni bulan, somalni rap pakon rajanta do ahu mangan, tapi palopas ma ahu laho, ase marponop ahu i ladang das ronsi patolu bornginkon. [219]

⁶Porini sungkun-sungkun bapanta pasal ahu, jadi hatahon ma, ʻGomos do ipindo si Daud hun bangku, ase podas ia laho hu Betlehem, hutani ai; ai adong do parsombahon tahunan ijai rap pakon pangkuni ganup.ʼ

⁷Anggo ihatahon, ʻDear!ʼ Artini tanda na dear ma ai. Tapi anggo manggila do ia, botoh ma, na dob putus do uhurni mambahen na jahat.

⁸On pe patidak ma idop ni uhurmu hu bani jabolonmon, ai domma pala mambahen padan ho hu bani jabolonmon i lobei ni Jahowa. Tapi anggo adong salahku, ho ma rahanan mamunuh ahu; mase ma pala boanonmu ahu hu bani bapanta?” [220]

⁹Dob ai nini si Jonatan ma, “Daoh ma in hun bangku! Anggo hubotoh, na dob putus do uhur ni bapa mambahen na jahat bam, mintor lang ma patugahonku ai bam?”

¹⁰Jadi nini si Daud ma dompak si Jonatan, “Ise ma patugahkon hu bangku, anggo manggila bapanta marbalos hubam?”

¹¹Dob ai nini si Jonatan ma dompak si Daud, “Eta hita laho hu ladang!” Jadi laho ma sidea hu ladang.

¹²Nini si Jonatan ma dompak si Daud, “Jahowa, Naibata ni halak Israel ma saksi! Anggo domma hupapangkei bapa patar barang haduan, tonggor ma, anggo dear do uhurni hu bani si Daud, mintor suruhonku ma na patugahkon ai bam.

¹³Tapi anggo sihol uhur ni bapa mambahen na masambor bam sonai ma bahenon ni Jahowa hu bani si Jonatan, lobih ope tene, anggo seng hupatugah ai bam, ase boi sonang ho laho. Sai ihasomani Jahowa ma ho songon na hinasomananni bapa na sain dokah. [221]

¹⁴Sanggah manggoluh ope ahu, patuduhkon ma hu bangku idop ni uhur ni Jahowa, ase ulang matei ahu,

¹⁵anjaha ulang ma rotapkon idop ni uhurmu hun bani ginomparhu ronsi sadokah ni dokahni. Anggo isiapkon Jahowa ma ganup munsuh ni si Daud hun bani sab tanoh on, [222]

¹⁶ulang ma siap goran ni si Jonatan hun rumah ni si Daud, anjaha Jahowa ma na manluluhon munsuh ni si Daud.”

¹⁷Dob ai iulaki si Jonatan ma pabijahon si Daud halani holong ni uhurni mangidahsi; ai holong do uhurni bani songon holong ni uhurni bani dirini. [223]

¹⁸Dob ai nini si Jonatan ma hu bani, “Patar ma poltak ni bulan; jadi sungkunon ni halak ma pasal ho, ai lumei do hundulanmu.

¹⁹Haduan ope sipalgeinan na so ijai ho; jadi laho ma ho hu bani ianan parponopanmu hinan, sanggah sihol bunuhonni ho; anjaha hundul ma ho i lambung ni batu na gugun na ijai ai. [224]

²⁰Panahkononku ma tolu lingkit hu lambungni ai, songon na manembak sada alatan ahu pakulahonku.

²¹Dob ai suruhonku ma sada anak garama, ningku ma, ʻLaho ma ho ne, mangidah lingkit ai.ʼ Anggo huhatahon hu bani anak garama ai, ʻTonggor ma, hampit jon do lingkit ai, buat ma!ʼ Jadi roh ma ho, ai songon sintongni manggoluh Jahowa, damei do bam, seng dong mara.

²²Tapi anggo huhatahon hu bani anak garama ai, ʻTonggor ma, hampit jadui do lingkit ai!ʼ Anggo sonai, mintor laho ma gelah ho, halani Jahowa do na marsuruh ho.

²³Tapi anggo pasal na sinahapkonta on, ho pakon ahu, pasal on Jahowa do saksi i tongah-tongahta ronsi sadokah ni dokahni.”

²⁴Dob ai marponop ma si Daud i tongah ladang. Jadi dob jumpah poltak ni bulan, hundul ma raja ai sihol mangan.

²⁵Hundul ma raja ai bani hundulanni songon na sain dokah, bani hundulan i lambung ni dingding; si Jonatan hundul patontang pakonsi, si Abner i lambung ni si Saul; tapi lumei do anggo ianan ni si Daud.

²⁶Seng dong isahapkon si Saul bani sadari ni ai, ai dapot uhurni, ʻAdong do na masa bani; seng pansing ia, ai seng manguras ope ia.ʼ [225]

²⁷Tapi patarni ai, paduaarihon dob poltak bulan, lanjar lumei do ianan ni si Daud. Jadi nini si Saul ma dompak si Jonatan anakni ai, “Mase ma lang roh si Daud, anak ni si Isai ai mangan nantuari barang sadari on?”

²⁸Nini si Jonatan ma mambalosi, “Gomos do ielek-elek ahu, ase laho ia hu Betlehem.

²⁹Nini, ʻPalopas ma ahu laho, ai manggalang do hanami na saompung ibagas huta ai, anjaha abang sandiri do na manonahkon ahu; on pe anggo dapotan idop ni uhur do ahu, laho ma ahu mangidah na si abang; halani ai do ase seng roh ia mangan rap pakon raja in.ʼ ”

³⁰Jadi gajag ma ringis ni si Saul mangidah si Jonatan, nini ma hu bani, “Anak magou, na so siat hata do ho! Ai lang hubotoh do na dob ipilih ho do anak ni si Isai mambahen hadorunonmu pakon hadorunon ni inangmu na manubuhkon ho?

³¹Ai sadokah manggoluh anak ni si Isai ai i tanoh on, seng anjai totap ho barang harajaonmu. On pe suruh ma na mangalopisi hu bangku, ai anak sibunuhon do ia.”

³²Nini si Jonatan ma mambalosi bapani ai, “Mase ma maningon bunuhon ia? Aha salahni?” [226]

³³Jadi ipantomkon si Saul ma tanja ai hu bani sihol mamunuhsi. Hunjai ibotoh si Jonatan ma na dob putus uhur ni bapani ai sihol mamunuh si Daud. [227]

³⁴Dob ai laho ma si Jonatan hun bani na mangan-mangan ai, manringis tumang ia, seng mangan ia paduaarihon dob poltak bulan ai, ai pusok do uhurni halani si Daud, marhiteihon na dob pinahiri ni bapani ai ia.

³⁵Patarni ai laho ma si Jonatan hu ladang bani panorang na dob pinadankonni ai hu bani si Daud, sada dakdanak na etek-etek do hasomanni.

³⁶Nini ma dompak juakjuakni ai, “Marlintun ma ho, pindahi ma lingkit sisiorhononku.” Dob ai marlintun ma juakjuakni ai, gabe isiorhon ma sada lingkit humbabouni.

³⁷Dob das juakjuak ai bani ianan ni lingkit na siniorhon ni si Jonatan ai, dilo-dilo ma si Jonatan hun pudi ni juakjuakni ai, nini ma, “Ai lang hampit jadui do lingkit ai?”

³⁸Jadi idilohon si Jonatan ma hu bani juakjuak ai, “Podas, ulang ho mantadi-mantadi!” Ibuat juakjuak ni si Jonatan ai ma lingkit ai, lanjar iboan ma ai mulak hu bani tuanni.

³⁹Tapi anggo juakjuak ai seng ibotoh ai; pitah si Jonatan ampa si Daud do na marsibotohan pasal hata ai.

⁴⁰Iondoskon si Jonatan ma sinjatani ai hu bani juakjuak hasomanni ai, anjaha nini ma hu bani, “Laho ma ho, boan ma in hu huta.”

⁴¹Jadi dob laho juakjuak ai, roh ma si Daud hun lambung ni gugunan batu ai, manrogop ma ia pala dais bohini hu tanoh, anjaha isombah ma ia tolu hali; dob ai marsisummahan ma sidea lanjar tangis bei, marompot tumang. [228]

⁴²Dob ai nini si Jonatan ma dompak si Daud, “Laho ma ho mardamei-damei. Pasal na pinadankonta padua-dua, marhitei bija ibagas goran ni Jahowa, Jahowa do saksi i tongah-tongahta, i tongah-tongah ni ginomparhu pakon ginomparmu sadokah ni dokahni.” [229]

⁴³Dob ai bingkat ma si Daud; si Jonatan pe mulak ma hu hutani.