Read Batak Simalungun 1 SAMUEL 22 Bible Online

1 SAMUEL 22 - Batak Simalungun bible

1 SAMUEL 22

¹Dob ai laho ma si Daud hunjai, anjaha maporus ma ia hu liang Adullam. Jadi dob ibogei abangni pakon ganup ginompar ni bapani ai, gabe tuad ma sidea manjumpahkonsi hujai. [237]

²Dob ai martumpu ma hu bani sagala halak na tarsosak, sagala halak siparutang pakon sagala halak na marborit ni uhur; gabe ia ma gabe pambobai bani sidea. Adong do ompat ratus halak hasomanni ai. [238]

³Dob ai laho ma si Daud hunjai hu Mispa na i tanoh Moab, anjaha nini ma hu bani raja ni halak Moab ai, “Palopas ma bapa pakon inang marianan i tongah-tongah nasiam, paima hubotoh barang aha sibahenon ni Naibata hu bangku.”

⁴Jadi iarahkon ma sidea hu lobei ni raja ni halak Moab, anjaha marianan ma sidea i lambungni sadokah si Daud marbatar-batar i atas dolog.

⁵Dob ai nini nabi Gat ma dompak si Daud, “Ulang be ham marbatar-batar i dolog, laho ma ham hu tanoh Juda.” Jadi laho ma si Daud, gabe das ma ia hu harangan Heret. [239]

⁶Dob ai tarbogei ma hu bani si Saul barita pasal si Daud pakon pasal halak hasomanni ai. I Gibea do hundul-hundul si Saul ijia, i toruh ni hayu jabi-jabi na i atas ni buntu-buntu, anjaha tanjani ibagas tanganni; haganup juakjuakni jongjong do i lambungni.

⁷Dob ai nini si Saul ma dompak juakjuakni na jongjong i lambungni, “Tangar nasiam ma, nasiam halak Benjamin; mintor tumaram ma bereon ni anak ni si Isai ai bani ganup nasiam juma barang pohon anggur? Mintor tumaram ma pabangkitonni ganup nasiam bahen kopala ni sisaribu barang kopala ni sisaratus?

⁸Mase ma martahi-tahi nasiam ganup mangimbang ahu? Sada pe lang dong na patugahkon bangku sanggah na mambahen parpadanan anakku pakon anak ni si Isai ai, sada pe lang dong na marpusok ni uhur nasiam pasal ahu, anjaha sada pe lang nasiam patugahkon hu bangku na dob ipajabu anakku juakjuakku mangimbang ahu, anjaha ionggopi ahu, songon na dob talar sadari on.” [240]

⁹Dob ai nini si Doeg halak Edom ai ma, na jongjong ijai rap pakon juakjuak ni si Saul, “Huidah do anak ni si Isai ai roh hu Nob, hu bani si Ahimelek, anak ni si Ahitub.” [241]

¹⁰Isungkun do hu bani Jahowa pasal langkahni, ibere do bohal bani, anjaha ibere do bani podang ni si Goliat halak Palistim ai. [242]

¹¹Dob ai isuruh raja ai ma na mandilo Malim Ahimelek, anak ni si Ahitub pakon ganup ginompar ni bapani, na adong i Nob; jadi roh ma sidea ganup hu bani raja ai.

¹²Nini si Saul ma, “Tangihon ma, ale anak ni si Ahitub!” Ibalosi ma, “Tonggor ma, ijon do ahu, tuannami.”

¹³Dob ai nini si Saul ma hu bani, “Mase ma martahi-tahi hanima mangimbang ahu, ho pakon anak ni si Isai, tandani ibere ho do bani ruti pakon podang, anjaha isungkun ho Jahowa pasalsi, gabe iimbang ahu, anjaha ionggopi ahu, songon na torang taridah sonari?”

¹⁴Dob ai ibalosi si Ahimelek ma raja ai, “Ise ma hun bani ganup juakjuakmu hatengeran songon si Daud, ai ma hela ni rajanami, kopala ni pangawalmu, anjaha marsangap i rumahmu? [243]

¹⁵Ai sahali on pe nani ahu parlobei sahali manungkun Naibata pasal langkahni? Sabonar lang! Ulang ma ihonahon rajanami hata ai bangku pakon bani ganup ginompar ni bapa; ai ganup hata on, otik pe lang ibotoh juakjuakmu.”

¹⁶Tapi nini raja ai ma, “Maningon matei ho, Ahimelek, ho pakon ganup ginompar ni bapamu.”

¹⁷Dob ai nini raja ai ma dompak pangawal na jongjong i lambungni, “Padohor hujon, bunuh ma Malim ni Jahowa in! Ai dihut do tangan ni sidea mangurupi si Daud, anjaha ibotoh sidea do na maporus ia, hape seng ipatugah ai bangku.” Tapi seng ra juakjuak ni raja ai manlaluhon tanganni, laho manikam malim ni Jahowa.

¹⁸Dob ai nini raja ai ma dompak si Doeg, “Roh ho hujon, tikam ma malim-malim in.” Dob ai marhusor ma si Doeg, halak Edom ai, anjaha itikam ma malim-malim ai. Ibunuh ma bani na sadari ai ualuh puluh lima dalahi, siparbaju epod na hun bani hiou silopak.

¹⁹Ibunuh do homa parhuta Nob, huta ianan ni sagala malim ai, marhitei podang, dalahi pakon naboru, dakdanak pakon na etek-etek, lombu, halode pakon biri-biri, ibunuh do ganupan ai marhitei podang. [244]

²⁰Tapi maluah do sada anak ni si Ahimelek, anak ni si Ahitub, si Abyatar do goranni; jadi maporus ma ia hu bani si Daud.

²¹Jadi dob ibaritahon si Abyatar hu bani si Daud, na dob ibunuh si Saul malim ni Jahowa,

²²nini si Daud ma dompak si Abyatar, “Domma hubotoh namin bani ari ai, na ijai do si Doeg, halak Edom ai, anjaha na maningon patugahonni do ai hu bani si Saul. Marsapata hu bangku do ganup hosah ni ginompar ni bapamu. [245]

²³I lambungku ma ho, ulang ho mabiar, ai barang ise na manahihon hosahmu, tahinononni do homa hosahku, sonang do ho i lambungku.” [246]