Read Batak Simalungun 1 SAMUEL 24 Bible Online

1 SAMUEL 24 - Batak Simalungun bible

1 SAMUEL 24

¹Dob ai tangkog ma si Daud hunjai, lanjar marianan i dolog-dolog ni Enggedi.

²Jadi dob mulak si Saul hun bani na mardakdak halak Palistim ai, ipatugah halak ma hu bani, “Tonggor ma, i halimisan Enggedi do si Daud.”

³Dob ai iarahkon si Saul ma tolu ribu halak pilihan hun bani ganup halak Israel, jadi laho ma ia mangindahi si Daud pakon hasomanni ai i lambung ni dolog batu parbedaran.

⁴Das ma ia hu harang ni biri-biri i lambung ni dalan ai, adong do ijai sada liang; masuk ma si Saul hubagas; uhurni sihol hu duru tongkin ijai. Tapi hundul do si Daud pakon hasomanni ai bani pamurnangan ni liang ai. [259]

⁵Jadi nini hasoman ni si Daud ai ma hu bani, “Domma jumpah ari, na hinatahon ni Jahowa bamu, ʻTonggor ma, Ahu do mangondoskon munsuhmu hubagas tanganmu, anjaha bahen ma bani romban hu bani rosuh ni uhurmu.ʼ ” Dob ai jongjong ma si Daud, anjaha isayat ma asok-asok suhi-suhi ni mantel ni si Saul ai.

⁶Dob ai dosak-dosak ma taroktok ni si Daud, halani na dob sinayatni ai suhi-suhi ni mantel ni si Saul ai. [260]

⁷Nini ma dompak hasomanni ai, “Daoh ma ai hun bangku ibahen Jahowa, mambahen na sonai hu bani tuanku na dob mininakan ni Jahowa, anjaha mangonai tangan hu bani, ai na dob mininakan ni Jahowa do ia.” [261]

⁸Iulangi si Daud ma hasoman ai marhitei hata ai, seng ibere sidea mardas tangan hu bani si Saul. Dob ai ijongjongkon si Saul ma, itadingkon ma liang ai laho mannunuti dalanni.

⁹Dob ai ijongjongkon si Daud ma homa laho luar hun bagas liang ai, anjaha dilo-dilo ma ia hun pudi ni si Saul, “Ham Raja, tuannami!” Jadi dob mangkawah si Saul dompak pudi, manrogop ma si Daud marsombah hu bani raja ai, bohini das hu tanoh.

¹⁰Nini ma hu bani si Saul, “Mase ma itangihon ham hata bolah-bolah ni halak na mangkatahon, ʻTonggor ma, manguhurhon na masambor do si Daud hu bamu?ʼ

¹¹Tonggor ma, panonggormu sandiri mangidah sadari on, na dob niondoskon ni Jahowa ham sadari on hubagas tanganku ibagas liang ai; adong do deba namin mangkatahon ahu mamunuh ham, tapi huramotkon do ham, ai nini uhurhu, ʻSeng bulih mangonai tangan ahu hu bani tuanku, ai na dob mininakan ni Jahowa do ia.ʼ

¹²Tapi, ham bapa! Tonggor ham ma suhi-suhi ni bajumu ibagas tanganku; marhitei na husayat suhi-suhi ni bajumu, tapi lang hubunuh ham, boi do botohon anjaha idahonmu, na so adong hajahaton barang na ilat ibagas uhurhu; seng dong dousangku dompak ham. Tapi ham do na mandarami ahu sihol mamunuh ahu. [262]

¹³Jahowa do na manguhumi hita, anjaha Jahowa ma na mambalaskon ahu bamu; tapi na so bulih do anggo tanganku mangonai bamu. [263]

¹⁴Songon na hinatahon ni umpasa ni na matua sapari, ʻHun bani halak parjahat roh hajahaton,ʼ tapi anggo tanganku seng bulih mangonai bamu.

¹⁵Mangayak-ayak ise do ase luar raja ni Israel? Ise do na pinardakdakmu? Baliang na matei-matei do, barang hutu ni baliang sangkamata?

¹⁶Halani ai Jahowa ma Panguhum, Ia ma na manguhumi hita, Ia ma na mangidah on, Ia ma na mantinggilhon partinggilanku, anjaha Ia ma na paluahkon ahu hun bani tanganmu.” [264]

¹⁷Jadi dobkonsi ihatahon si Daud hata ai hu bani si Saul, gabe nini si Saul ma, “Soramu do in, Daud, anakku?” Jadi ipagogoh si Saul ma sorani doruh-doruh.

¹⁸Nini ma dompak si Daud, “Pintoran do ho hun bangku; na dear do ibahen ho hu bangku, tapi anggo ahu na jahat do hubalaskon hubam.

¹⁹Domma ipatalar ho sadari on dear ni pambahenanmu bangku, ai ma marhitei na so binunuhmin ahu, sanggah na niondoskon ni Jahowa ahu hubagas tanganmu.

²⁰Ai porini jumpah halak munsuhni, mintor tumaram ma palopasonni ia laho marsonang-sonang? Sai ibalaskon Jahowa ma na madear hubam, balas ni na binahenmin hu bangku sadari on.

²¹On pe, tonggor ma, torang do hubotoh na maningon gabe raja do ho, anjaha na maningon totap do harajaon Israel ibagas tanganmu. [265]

²²Halani ai bulawankon ma marhitei goran ni Jahowa, paboa na so siapkononmu ginomparhu i pudingku hun rumah ni bapa.”

²³Jadi ibulawankon si Daud ma ai hu bani si Saul. Dob ai laho ma si Saul hu rumahni; tapi anggo si Daud pakon hasomanni ai tangkog ma hu parbatar-bataran na i dolog ai.