Read Batak Simalungun 1 SAMUEL 27 Bible Online

1 SAMUEL 27 - Batak Simalungun bible

1 SAMUEL 27

¹Jadi nini si Daud ma ibagas uhurni, “Sai na matei do ahu barang antigan bahenon ni si Saul; dearan ma nini uhurhu maporus ahu hu tanoh ni halak Palistim, tontu anggo sonai maronti ma si Saul mangindahi ahu i tanoh Israel, gabe maluah ma ahu hun bani tanganni.” [290]

²Dob ai bingkat ma si Daud, laho ma ia pakon hasomanni sionom ratus halak ai hu bani si Akis, anak ni si Maoh, raja ni Gat. [291]

³Jadi marianan ma si Daud rap pakon si Akis i Gat, ia pakon hasomanni, ganup rap pakon rumah tanggani, anjaha si Daud rap pakon parinangonni na dua ai, si Ahinoam na hun Jesreel, pakon si Abigail, parinangon ni si Nabal hinan, halak Karmel ondi. [292]

⁴Jadi dob ibotoh si Saul, na dob maporus si Daud hu Gat, gabe seng be inunut mangindahisi.

⁵Sahali nini si Daud ma dompak si Akis, “Sapala domma jumpahan idop ni uhur ahu i lobeimu, mahua bere ham ma sada huta bangku, ase ijai marianan ahu; mase ma pala marianan juakjuakmu rap pakon ham i huta pamatang?”

⁶Jadi ibere si Akis ma bani sadari ni ai huta Ziklag. Halani ai ronsi sadari on raja hun Juda do simada huta Ziklag. [293]

⁷Ia dokah ni si Daud marianan i tanoh ni halak Palistim satahun ompat bulan do.

⁸Dob ai tangkog ma si Daud ampa hasoman-hasomanni, idorab sidea ma halak Gesur, Girsi pakon halak Amalek, ai sidea do siiani tanoh ai hun bani sapari nari, hun Sur das hu tanoh Masir.

⁹Jadi italuhon si Daud ma tanoh ai, seng ipalopas age sahalak pe na manggoluh, dalahi age naboru, tapi itaban do biri-biri, lombu, halode, unta pakon hiou, dob ai mulak ma ia hu bani si Akis.

¹⁰Isungkun si Akis ma ia, “Hunja nasiam martaban sadari on?” Nini si Daud ma mambalosi, “Hun dangsina ni tanoh Juda, atap: Hun dangsina ni tanoh ni halak Jeremeli, atap: Hun dangsina ni tanoh ni halak Keni.”

¹¹Tapi lang ipalopas si Daud manggoluh dalahi atap naboru boanon hu Gat, ai nini uhurni, “Ase ulang iparpatugah sidea pasal hanami, ʻSonon do pambahenan ni si Daud.ʼ ” Ase sonai ma pambahenan ni si Daud sadokah marianan ia i tanoh ni halak Palistim.

¹²Tenger do uhur ni si Akis bani si Daud, ai nini uhurni, “Domma magigi uhur ni bangsa ni halak Israel mangidahsi, halani ai gabe juakjuakku ma ia lalab.” [294]