Read Batak Simalungun 1 SAMUEL 28 Bible Online

1 SAMUEL 28 - Batak Simalungun bible

1 SAMUEL 28

¹Bani panorang ai ipatumpu halak Palistim ma balani laho marporang dompak halak Israel. Jadi nini si Akis ma dompak si Daud, “Botoh ma, ham do hasomanku bingkat laho marporang, ham rap pakon hasomanmu.”

²Nini si Daud ma mambalosi si Akis, “Dear, ase ibotoh ham naha gogoh ni juakjuakmu on.” Jadi nini si Akis ma dompak si Daud, “Antong ham ma pangawalhu sadokah manggoluh ahu.”

³Tapi domma matei anggo si Samuel, domma itangisi ganup halak Israel ia, anjaha itanom i Rama, i hutani. Domma ipalaho si Saul paniaran pakon partondung hun tanohni ai. [295]

⁴Domma martumpu halak Palistim, anjaha marsaran sidea i Sunem; si Saul pe domma ipatumpu ganup halak Israel, anjaha marsaran i Gilboa.

⁵Jadi dob iidah si Saul bala ni halak Palistim ai mabiar ma ia, gobir tumang uhurni.

⁶Isungkun si Saul ma Jahowa, tapi seng ibalosi Jahowa ia, barang marhitei nipi barang marhitei urim, barang marhitei nabi pe. [296]

⁷Dob ai nini si Saul ma dompak juakjuakni, “Pindahi nasiam ma bangku paniaran naboru, ase laho ahu hu bani laho manungkunsi.” Nini juakjuakni ai ma mambalosi, “Tonggor ma, andai i Endor adong do sada halak paniaran naboru.” [297]

⁸Dob ai ilagei ma rupani, ipakei ma hiou na legan; laho ma ia rap pakon hasomanni dua halak, mangindahisi; das ma sidea borngin-borngin hu bani naboru ai. Jadi nini ma, “Patugah ma na sasintongni bangku marhitei na siar bamu, anjaha pahuta ham ma bangku halak na sihol patugahonku bamu.”

⁹Nini naboru ai ma hu bani, “Tonggor ma, ibotoh ham do na binahen ni si Saul, ai ma sonaha paniapkonni bani halak paniaran pakon partondung hun nagori on. Mase ma sihol sidingonmu ahu, ase matei ahu?”

¹⁰Mintor marbija ma si Saul marhitei goran ni Jahowa, nini ma, “Songon sintongni manggoluh Jahowa, seng marsalah ham ibagas pahara on!”

¹¹Dob ai nini naboru ai ma, “Ise ma pahutaonku bamu?” Nini ma, “Pahuta ma si Samuel bangku!”

¹²Dob ibogei naboru ai goran Samuel ai, gogoh ma ia mandoruh anjaha nini naboru ai ma hu bani si Saul, “Mase ma paoto-otoonmu ahu? Si Saul do hape ham.”

¹³Nini raja ai ma hu bani, “Ulang ham mabiar! Aha dong iidah ham?” Nini naboru ai ma dompak si Saul, “Huidah sada tonduy tangkog hun tanoh.”

¹⁴Nini si Saul ma hu bani, “Sonaha rupani?” Nini naboru ai ma, “Adong sada halak na matua tangkog hu atas, marbaju-baju mantel do ia.” Jadi ibotoh si Saul ma, si Samuel do ai. Mintor marsombah ma ia, bohini das hu tanoh. [298]

¹⁵Nini si Samuel ma dompak si Saul, “Mase ma isunsahi ham ahu, marhitei na ipahuta ham ahu?” Nini si Saul ma mambalosi, “Sosak tumang do ahu; iporang halak Palistim do ahu, anjaha itadingkon Naibata do ahu, seng be ibalosi ahu barang marhitei nabi atap nipi pe, halani ai do ase hudilo ham, ase ipabotohkon ham bangku atap aha do sibahenonku.”

¹⁶Dob ai nini si Samuel ma, “Tapi mase ma ahu sungkunonmu, anggo Jahowa pe domma sirang hun bamu anjaha gabe imbangmu?

¹⁷Domma ibahen Jahowa bamu songon na dob hinatahon-Ni marhitei ahu; domma ibuat Jahowa hun bamu harajaon ai, anjaha iberehon hu bani halak na legan, hu bani si Daud. [299]

¹⁸Halani na so itangihon ham hata ni Jahowa, anjaha seng idaskon ham hu bani halak Amalek pargajag ni uhur-Ni, ai ma halani ase sonin pambahenan ni Jahowa bamu sadari on. [300]

¹⁹Ambahni ai ondoskonon ni Jahowa ma halak Israel pakon ham hu tangan ni halak Palistim; patar ma parayakonmu ahu pakon anakmu. Bala ni halak Israel pe ondoskonon ni Jahowa ma hubagas tangan ni halak Palistim.” [301]

²⁰Jadi mintor tompas ma si Saul langkop hu tanoh, mabiar tumang ia halani hata ni si Samuel ai; anjaha seng margogoh ia, halani seng mangan ia layur sadari saborngin.

²¹Mintor roh ma naboru ai hu bani si Saul, anjaha iidah ma rusak tumang ia; nini ma hu bani, “Tonggor ma, ibalosi jabolonmu naboru on do ham; huasamkon do hosahku, anjaha hubalosi do hatamu na hinatahonmu bangku.

²²Halani ai tangihon ham ma hata ni jabolonmu naboru on; hupasirsir ma otik ruti bamu; pangan ham ma, ase adong gogohmu laho mannunuti dalanmu.”

²³Tapi manjua do ia, nini ma, “Seng sir uhurhu mangan!” Tapi halani sai ielek-elek juakjuakni pakon naboru ai ia, gabe ibalosi ma sidea. Jongjong ma ia dob ai hundul ma ia hu podom-podoman.

²⁴Adong do bani naboru ai sada anak ni lombu na pinamombur i rumahni, podas ma isayat ai; ibuat ma nitak, iagu ma ai anjaha imasak ma ruti na so niigaran hunjai.

²⁵Dob ai iidangkon ma ai hulobei ni si Saul pakon juakjuakni ai; jadi mangan ma sidea. Dob ai bingkat ma sidea mardalan bani na saborngin ai.