Read Batak Simalungun 1 SAMUEL 30 Bible Online

1 SAMUEL 30 - Batak Simalungun bible

1 SAMUEL 30

¹Jadi bani ari patoluhon, sanggah das si Daud pakon hasomanni hu Ziklag, domma hape imasuki halak Amalek tanoh Dangsina pakon Ziklag. Domma italuhon sidea Ziklag anjaha domma mosog ibahen ai. [305]

²Itaban sidea do naboru ganup, ganup na ibagas huta ai, na etek pakon na banggal; ise pe lang na ibunuh, tapi iluahon do sidea, anjaha inunuti sidea ma dalanni.

³Daskonsi si Daud pakon hasomanni ai hu huta ai, domma mosog hapeni ganup anjaha parinangon pakon anak ampa boru ni sidea domma iboan halak.

⁴Jadi ipagogoh si Daud pakon hasomanni ai ma sorani tangis-tangis, pala seng dong be gogoh ni sidea tangis.

⁵Parinangon ni si Daud sidua halak ai pe iboan do, ai ma si Ahinoam na hun Jesreel pakon si Abigail, parinangon ni si Nabal na hun Karmel hinan. [306]

⁶Susah tumang do uhur ni si Daud, halani domma adong sahap ni halak laho manggijikisi bani batu, halani borit ni uhur ni halak ganup, marhitei na tarboan ai anakni pakon boruni. Tapi ipatenger si Daud ma uhurni bani Jahowa, Naibatani ai. [307]

⁷Nini si Daud ma dompak Malim Abyatar, anak ni si Ahimelek ai, “Boan ma baju epod in bangku!” Mintor iboan si Abyatar ma baju epod ai hu bani si Daud. [308]

⁸Jadi isungkun si Daud ma Jahowa, nini ma, “Dear do pardakdakonku panamun ai? Jumpah ahu ope sidea?” Nini Jahowa ma mambalosisi, “Pardakdak ma, sai jumpah ho ope anjaha tarpaluah ho ope halak ai.” [309]

⁹Mintor bingkat ma si Daud rap pakon sionom ratus halak hasomanni ai, das ma sidea i Bah Besor. Tading ma deba ijai, dua ratus halak.

¹⁰Rap pakon siompat ratus halak ai iayak si Daud ma panamun ai; tapi sidua ratus halak ai, na dob lojatu laho mandipari bah Besor ai, tading ma.

¹¹Dob ai jumpah ma sada halak Masir i ladang, lanjar iboan sidea ma ia hu bani si Daud. Ibere sidea ma bani ruti panganonni pakon bah inumonni;

¹²ambahni ai sansayat ruti na maragu buah ara pakon dua kibul anggur. Jadi dob mangan ia, mulak ma gogohni, ai seng mangan ruti pakon minum bah ia tolu ari tolu borngin dokahni. [310]

¹³Dob ai nini si Daud ma hu bani, “Ise do tuanmu? Anjaha parja do ho?” Nini ma mambalosi, “Halak Masir do ahu, jabolon ni sada halak Amalek. Itadingkon tuanku do ahu, halani boritan ahu tolu ari na salpu.

¹⁴Na manrampas do hanami hu tanoh ni halak Kereti hampit Dangsina, sonai homa tanoh Juda pakon tanoh ni si Kaleb hampit Dangsina, anjaha isurbuy hanami do huta Ziklag.” [311]

¹⁵Dob ai nini si Daud ma hu bani, “Ra do ho mangarahkon hanami hu bani panamun ai?” Nini ma mambalosi, “Anggo ra ham marbija marhitei goran ni Naibata, paboa na so bunuhonmu ahu, anjaha na so ondoskononmu ahu bani tuanku, ra do ahu manaruhkon ham hu bani panamun ai.”

¹⁶Jadi iarahkon ma ia hujai; domma hape merap sidea haganup bani ianan ai, mangan minum anjaha manortori, halani taban-taban na buei ai, na nirampas ni sidea hun tanoh ni halak Palistim pakon tanoh Juda.

¹⁷Dob ai idorab si Daud ma sidea mulai siangkonsi ari das ronsi bodari; sahalak pe lang dong na maluah hun bani sidea sobali ni ompat ratus halak anak garama na mangajak unta laho maporus.

¹⁸Ipaluah si Daud ma haganup na binuat ni halak Amalek ai; ipaluah ma homa parinangonni na dua ai.

¹⁹Seng dong na magou hun bani sidea, na etek barang na magodang, anak barang boru, taban-taban barang atap aha pe, na binuat ni munsuh ai; haganup do mulak iboan si Daud.

²⁰Dob ai ibuat si Daud ma biri-biri pakon lombu haganup, ialai-alai sidea ma ai i lobeini, anjaha nini ma, “On ma taban-taban ni si Daud.”

²¹Jadi das ma si Daud hu bani sidua ratus halak na malojatu ondi mangirikkon si Daud, na tading i Bah Besor; jadi luar ma sidea laho manjumpahkon si Daud pakon hasomanni na rap pakonsi ai. Dob dohor si Daud hu bani halak ai, isungkun ma sidea atap na horas-horas do sidea.

²²Dob ai nini halak na so margagan ampa halak na jahat na dihut mangirikkon si Daud ai ma, “Halani na so dihut ai sidea pakon hita, seng bulih bereon bani sidea hun bani taban-taban na binuatta in, sobali ni parinangonni pakon anakni; bulih do buaton ni sidea ai, anjaha laho sidea mannunut dalanni.”

²³Dob ai nini si Daud ma, “Ulang ma sonai bahen nasiam, o saninangku, pasal ugas-ugas ai na dob binere ni Jahowa hu banta. Ia do na manramotkon hita, anjaha iondoskon do panamun ai hubagas tanganta, na roh mangimbang hita.

²⁴Ise ma na ra manangihon nasiam ibagas parhara on? Songon rupei ni halak na tuad hu parporangan, maningon sonai do rupei ni halak na tading manjaga parugas; maningon dos do bagian ni ganup.” [312]

²⁵Jadi olat ni ari ai nari hu atas gabe uhum pakon aturan ma ai itotapkon bani halak Israel ronsi sadari on.

²⁶Dob das si Daud i Ziklag, ipantongoskon ma hun bani taban-taban ai hu bani pangintuai-pangintuai na i tanoh Juda, na marhuan-huan pakonsi, nini ma, “On ma sibere-bere bani nasiam hun bani taban-taban, na dapot hun bani munsuh ni Jahowa.”

²⁷Ai ma na i Betel, na i Ramat hampit dangsina, na i Jatir,

²⁸na i Aroer, na i Sipmot, na i Estemos,

²⁹na i Karmel, na i huta ni halak Jerameli, na i huta ni halak Keni,

³⁰na i Horma, na i Bor-Asan, na i Atak,

³¹na i Hebron pakon na bani ganup ianan, na binontas ni si Daud rap pakon hasomanni ai.