Read Batak Simalungun 1 SAMUEL 5 Bible Online

1 SAMUEL 5 - Batak Simalungun bible

1 SAMUEL 5

¹Tapi ibuat halak Palistim ma poti ni Naibata ai, anjaha iboan ma hun Eben-Eser hu Asdod.

²Ase ibuat halak Palistim ma poti ni Naibata anjaha iboan ma ai hu rumah ni Dagon; inahkon sidea ma ai i lambung ni Dagon. [51]

³Tapi sanggah na pinagirah ni halak Asdod puho patarni ai, tonggor ma, domma tungkap Dagon ai hu tanoh i lobei ni poti ni Jahowa. Jadi ibuat sidea ma Dagon ai, anjaha ipasuang ma ai hu bani iananni.

⁴Tapi dob ipagirah sidea use puho patarni ai, tonggor ma, domma tungkap use hu Tanoh Dagon ai i lobei ni Poti ni Jahowa; anjaha tipul do ulu ni Dagon ai anjaha tanganni haduasi tibal i molmolan; pitah badan ni Dagon ai mando na tading.

⁵Halani ai do ase seng bulih dogeion ni sagala malim ni Dagon ronsi haganup na masuk hu rumah ni Dagon ai molmolan ni rumah ni Dagon na i Asdod ronsi sadari on.

⁶Tapi borat do pangodohkon ni tangan ni Jahowa hu bani halak Asdod; ihirjati do uhur ni sidea anjaha ipatubuh do bayoh bani parhuta Asdod pakon gomgomanni. [52]

⁷Jadi dob iidah halak Asdod sonai do na masa ai, nini sidea ma, “Seng bulih tading i lambungta Poti ni Naibata ni halak Israel, ai parah do pangonai ni tangan-Ni hu banta pakon hu Dagon, naibatanta in.”

⁸Dob ai isuruh sidea ma patumpuhon ganup raja ni halak Palistim, anjaha nini sidea ma, “Aha ma sibahenonta hu bani Poti ni Naibata ni halak Israel?” Nini sidea ma mambalosi, “Hu huta Gad ma na osor poti ni Naibata ni halak Israel ai.”

⁹Jadi dob ipaosor sidea ai hujai, mangonai ma tangan ni Jahowa hu huta ai, gabe rusak ma sidea; hona papa ma parhuta ai, na ganjang na etek, tubuh do bayoh bani sidea.

¹⁰Dob ai itongos sidea ma poti ni Naibata ai hu Ekron. Tapi dob das poti ni Naibata hu Ekron, mandoruhi ma parhuta Ekron, nini sidea ma, “Iboan sidea do Poti ni Naibata ni halak Israel hubennami, sihol mamunuh hanami pakon bangsanami.”

¹¹Dob ai isuruh sidea ma patumpuhon ganup raja ni halak Palistim, nini sidea ma, “Tongos nasiam ma Poti ni Naibata ni halak Israel mulak bani iananni hinan, ase ulang ibunuh hanami pakon bangsanami.” Ai masa do harusakon bolon i sab huta ai. Parah tumang do pangonai ni tangan ni Jahowa ijai.

¹²Halak na so matei, hona bayoh do, anjaha manaik do ronsi langit doruh-doruh ni huta ai.