Read Batak Simalungun 1 SAMUEL 6 Bible Online

1 SAMUEL 6 - Batak Simalungun bible

1 SAMUEL 6

¹Pitu bulan do dokahni poti ni Jahowa i tanoh ni halak Palistim.

²Dob ai ipatumpu halak Palistim ma sagala malim pakon partondung, nini sidea ma, “Aha do sibahenonnami pasal poti ni Jahowa? Patugah nasiam ma bennami marhitei aha tongoskononnami ai hu iananni.” [53]

³Jadi ihatahon sidea ma, “Anggo sihol tongoskonon nasiam poti ni Naibata ni halak Israel, ulang lumei tumang tongoskon nasiam, tapi maningon padihuton nasiam do sada galangan parsalahan hujai. Jadi malum ma ahapkonon nasiam anjaha torang ma botohon nasiam, barang aha halani mambahen lang surut tanganni hun bani nasiam.”

⁴Jadi nini sidea ma, “Aha ma galangan parsalahan sipadihutonnami hujai?” Nini sidea ma mambalosi, “Lima bayoh omas pakon lima ubag omas romban hu bani bilangan ni raja ni halak Palistim, ai sada uhum do in, na mangonai bani nasiam ganup pakon bani raja nasiam. [54]

⁵Maningon bahenon nasiam usihan ni bayoh ampa usihan ni ubag, na mansedahon tanoh in, anjaha bere nasiam ma hasangapon hu bani Naibata ni halak Israel, andohar ipaganggang tangan-Ni hun bani nasiam pakon hun bani tanoh nasiam.

⁶Mase ma pahengkengon nasiam uhur nasiam songon halak Masir pakon Parao na pahengkengkon uhur ni sidea? Ai lang sonon do? Dob ipapai Jahowa sidea ipalopas sidea ma bangsa ai laho, dob ai bingkat ma sidea. [55]

⁷On pe, ugaskon nasiam ma pauli sada gareta na baru, anjaha buat nasiam dua lombu na pabagodkon ope, na so ongga ope hona pasangan; pasang nasiam ma lombu ai hu bani gareta ai, tapi boan nasiam ma anakni ai mulak hu rumah.

⁸Dob ai buat nasiam ma poti ni Jahowa, pajongjong nasiam ma ai hu gareta ai; dob ai ugas omas ai siberehonon nasiam bahen galangan parsalahan, nahkon nasiam ma ai hubagas poti-poti i lambungni. Dob ai palopas nasiam ma laho manuruti dalanni.

⁹Dob ai pardiateihon nasiam ma, anggo tangkog do ia hun dalan na laho hu tanohni hinan, hu Bet-Semes, torang ma, Ia do mambahen hamagouan banggal on banta, tapi anggo lang, botoh hita ma, sedo tangan-Ni na mangonai ai hu banta, purini hinan do ai masa banta.”

¹⁰Jadi ibahen halak ai ma sonai, ibuat sidea ma dua lombu na pabagodkon, anjaha ipasang ma ai hu bani gareta ai; tapi ihurungkon sidea do anakni ai i rumah.

¹¹Anjaha inahkon sidea ma Poti ni Jahowa ai hu gareta ai ampa poti-poti ai isianni ubag omas pakon usih-usihan ni bayoh ni sidea ai.

¹²Jadi laho ma lombu ai torus mangirikkon dalan na laho hu Bet-Semes; sai dalan na bolon ai do idalani lanjar marumboh-umboh anjaha seng manirpang hu siamun barang hu sambilou; sai raja ni halak Palistim ai do hun pudini das hu parbalogan ni Bet-Semes.

¹³Tapi ragat ni halak mambuat omei do par Bet-Semes i habungan ai; mangkawah ma sidea jadi iidah sidea ma poti ai, gabe malas ma uhur ni sidea mangidahsi.

¹⁴Dob ai das ma gareta ai hu juma ni si Josua, par Bet-Semes, anjaha maronti ma ijai. Adong do ijai sada batu na banggal; itahai sidea ma hayu ni gareta ai, anjaha igalangkon sidea ma lombu ai songon galangan situtungon hu bani Jahowa.

¹⁵Dob ai ipaturun halak Levi ma Poti ni Jahowa ai pakon poti-poti isian ni ugas-ugas omas na i lambung ni ai, anjaha itibalhon ma ai hu bani batu na bolon ai; lanjar igalangkon par Bet-Semes ma sadarini ai hu bani Jahowa galangan sisayaton pakon galangan situtungon. [56]

¹⁶Jadi dob iidah raja ni halak Palistim na lima ai ai, mulak ma sidea sadari ni ai hu Ekron.

¹⁷Anjaha on do bayoh omas na pinaingkat ni halak Palistim bahen galangan parsalahan hu bani Jahowa: Hun Asdod sada, hun Gaza sada, hun Askelon sada, hun Gad sada pakon hun Ekron sada. [57]

¹⁸Ambah ni ai ubag omas, marguru hu bani bilangan ni ganup huta ni halak Palistim, ginomgom ni raja na lima ai, hun bani huta na marbatar-batar pakon huta na so marparik. Batu banggal, ianan panampeian ni sidea bani poti ni Jahowa, i lambung ni juma ni si Josua, par Bet-Semes ai, ai do hasaksian ni ai ronsi sadari on.

¹⁹Tapi ibunuh Jahowa ma deba hun bani par Bet-Semes, halani itungkir sidea poti ai; ibunuh ma pitu puluh halak hun bani sidea. Jadi marhoru ma bangsa ai, halani buei hun bani sidea, na hona bunuh ibahen Jahowa. [58]

²⁰Jadi nini par Bet-Semes ma, “Ise ma na tahan jongjong i lobei ni Jahowa, Naibata na pansing in? Anjaha ise ma haondosanni dob laho hun lambungta?” [59]

²¹Dob ai isuruh sidea ma suruhanni hu bani par Kirjat-Jearim, nini sidea ma, “Domma mulak poti ni Jahowa itaruhkon halak Palistim; tuad ma nasiam anjaha alop nasiam ma bani nasiam.”