Read Batak Simalungun 1 SAMUEL 8 Bible Online

1 SAMUEL 8 - Batak Simalungun bible

1 SAMUEL 8

¹Jadi dob sayur matua si Samuel, ipabangkit ma anakni ai manguhumi halak Israel.

²Ia goran ni anak sikahananni si Joel do, anjaha goranni na paduahon ai si Abia do, i Berseba do sidea panguhum. [69]

³Tapi seng iirikkon anakni ai dalan ni bapani, tapi impolan do sidea bani pirak; ra do sidea manjalo sisip laho papeolhon uhum. [70]

⁴Jadi martumpu ma ganup pangintuai ni halak Israel hu bani si Samuel i Rama, [71]

⁵nini sidea ma hu bani, “Tonggor ma, domma sayur matua ham, tapi anggo anakmu seng dong iirikkon sidea dalanmu; on pe pabangkit ham ma bennami sada raja, ase ia manrajai hanami songon na bani ganup bangsa sipajuh begu-begu.” [72]

⁶Tapi sogam do uhur ni si Samuel bani hata na hinatahon ni sidea ai, “Bere ham ma bennami raja, ase ia manrajai hanami.” Jadi martonggo ma si Samuel hu bani Jahowa.

⁷Jadi nini Jahowa ma dompak si Samuel, “Tangihon ma sora ni bangsa in pasal haganup na hinatahonni ai bam, ai sedo ho, Ahu do na niambungkon ni sidea ijai, ase ulang Ahu be raja bani sidea. [73]

⁸Romban hu bani haganup pambahenan na binahen ni sidea singgan ni na Huarahkon sidea luar hun tanoh Masir ronsi sadari on, itangihon sidea do Ahu laho mambalosi naibata na legan, sonai do homa ibahen sidea hubam.

⁹On pe tangihon ma sora ni sidea ai, asal ma pangkei isaksihon anjaha ipasingatkon ho uhum ni raja na sihol manggomgomi sidea.” [74]

¹⁰Jadi ipadas si Samuel ma ganup hata ni Jahowa hu bani bangsa ai, na mangindo raja hun bani.

¹¹Nini ma, “On ma uhum ni raja na sihol manggomgomi nasiam: Buatonni do anak nasiam anjaha bahenonni ma sidea gabe pargareta pakon parhudani, ase marlintun sidea i lobei ni garetani. [75]

¹²Anjaha bahenonni ma sidea kopala ni marsasaribu, pakon kopala ni marlima-lima puluh, anjaha deba maninggala jumani pakon manabi sisabionni; manukangi parugas hu parporangan ampa parugas ni garetani. [76]

¹³Buatonni ma pakon boru nasiam laho manggiling minak na morum, barang pardahan barang parmasak.

¹⁴Buatonni ma juma nasiam pakon anggur nasiam ampa hayu jetun nasiam, sagala sidearan, anjaha berehononni ma ai hu bani juakjuakni. [77]

¹⁵Buatonni ma parsapuluhan ni gandum nasiam pakon pohon anggur nasiam, anjaha berehononni ma ai hu bani juakjuakni pakon suruh-suruhanni.

¹⁶Buatonni ma homa jabolon nasiam dalahi pakon jabolon nasiam naboru, sonai homa lombu pakon halode nasiam, sagala sidearan laho mamakei ai bani horjani. [78]

¹⁷Buatonni ma parsapuluhan ni biri-biri nasiam, anjaha gabe jabolonni ma nasiam.

¹⁸Jadi bani ari ai mandoruhi ma nasiam halani raja nasiam ai, na pinilih nasiam bani nasiam; tapi seng balosan ni Jahowa nasiam bani ari ai.”

¹⁹Tapi manjua do bangsa ai manangihon sora ni si Samuel, nini sidea ma, “Lang! Maningon adong do sada raja bennami,

²⁰ase dos hanami songon haganup bangsa sipajuh-begu-begu, ase rajanami ai ma, na maruhum bennami anjaha mambobahon hanami hu parmunsuhan.”

²¹Ase dob ibogei si Samuel ganup hata ni bangsa ai, ipatugah ma ai hu bani Jahowa. [79]

²²Jadi nini Jahowa ma dompak si Samuel, “Tangihon ma sora ni sidea ai, anjaha pabangkit ma bani sidea sada raja.” Dob ai nini si Samuel ma dompak halak Israel, “Laho ma nasiam ganup hu hutani bei.” [80]