Read Batak Simalungun 1 SAMUEL 9 Bible Online

1 SAMUEL 9 - Batak Simalungun bible

1 SAMUEL 9

¹Adong ma sada halak hun Benjamin na margoran si Kis, anak ni si Abiel, anak ni si Zeror, anak ni si Bekorat, anak ni si Afiah, sada halak Benjamin, pararta na buei. [81]

²Adong do sada anakni, na margoran si Saul, ganjang bolon anjaha jenges do ia. Seng dong dalahi sijengesan hun bani i tongah-tongah ni halak Israel, singgan abarani hu atas do hasurunganni hun bani ganup halak Israel. [82]

³Magou do piga-piga halode boru-boru ni si Kis, bapa ni si Saul ai. Nini si Kis ma dompak si Saul anakni ai, “Arahkon ma sada juakjuak in hasomanmu, jadi bingkat ma ho, anjaha laho ma ho mintor mangindahi halode boru-boru ai.”

⁴Isiari sidea ma Dolog Efraim, sonai age Tanoh Salisa, hape seng jumpahsi; isiar sidea ma use tanoh Saalim, tapi seng dong ijai. Isiari sidea ma use Tanoh Benjamin, hape seng jumpahsi. [83]

⁵Dob das sidea hu tanoh Sup, ihatahon si Saul ma hu bani juakjuakni, na mangkasomanisi ai, “Eta ma hita mulak, atap na dob rusakan do uhur ni bapa mangidah hita ase mangidah halode boru-boru ai.” [84]

⁶Tapi nini ma mambalosi, “Tonggor ma, adong do sada halak ni Naibata i huta on, anjaha sada halak na sangap do ia; sagala na hinatahonni tongon do. Laho ma hita hujai, ra boi do patugahonni banta pasal dalan sidalananta.”

⁷Nini si Saul ma dompak juakjuakni ai, “Tonggor ma, porini laho hita, aha ma siboanonta hu bani halak ai? Ai domma bois ruti ibagas ranjutta, anjaha seng dong siluah siboanonta hu bani halak ni Naibata ai. Aha ma dong banta?” [85]

⁸Dob ai nini juakjuak ai ma use dompak si Saul, “Tonggor ma, adong do bangku saparompat sekel pirak, ai ma hubere hu bani halak ni Naibata ai, ase ipatugah banta dalan sidalananta.”

⁹Sapari i tanoh Israel, anggo laho sada halak manungkun Naibata, ihatahon ma, “Laita marayak halak na marpanonggoran; ai halak na marpanonggoran do igoran sapari nabi sisonai.” [86]

¹⁰Nini si Saul ma dompak juakjuakni ai, “Dear do hatamai, eta ma.” Jadi laho ma sidea hu huta, ianan ni halak ni Naibata ai.

¹¹Sanggah na tangkog sidea bani tangkogan na laho hu huta ai, jumpah sidea ma anak boru na mangalop bah, na laho luar manahui bah, anjaha nini ma dompak sidea, “Ai ijon do halak na marpanonggoran ai?”

¹²Jadi nini sidea ma mambalosi, “Ijon do, tonggor ma, na i lobeimu an do ia. Oloskon ham, in pe roh ia hu huta on, ai sihol manggalang do halak simbuei sadari on i buntu-buntu ai.

¹³Masukkonsi nasiam hu huta ai, jumpah nasiam ma ia sanggah seng ope tangkog ia hu buntu-buntu ai mangan, ai seng tumaram mangan jolma simbuei ai paima roh ia, halani maningon ia do na mamasu-masu galangan ai; dob ai mangan ma sagala na nidilo. On pe tangkog ma nasiam, mintor jumpah nasiam ma ia.”

¹⁴Jadi tangkog ma sidea hu huta ai. Sanggah na masuk sidea hu huta ai, iidah sidea ma si Samuel manjumpahkon sidea sanggah laho tangkog ia hu buntu-buntu ai.

¹⁵Tapi domma iungkab Jahowa hinan hu bani si Samuel, sadari i lobei ni parroh ni si Saul, [87]

¹⁶“Sonon patar suruhon-Ku ma bam sada halak hun Tanoh Benjamin, ase minakanmu ia gabe pambobai ni bangsang-Ku halak Israel, ase ipaluah bangsang-Ku hun tangan ni halak Palistim; ai domma marpanatap uhur-Hu bani bangsang-Ku, ai domma das Bangku doruh-doruh ni sidea.”

¹⁷Dob iidah si Samuel si Saul ai, nini Jahowa ma hu bani, “On ma halak ia, na dob Hupatugah bam! Ia ma na sihol manggomgom bangsang-Ku.” [88]

¹⁸Dob ai idohori si Saul ma si Samuel i horbangan ai, anjaha nini ma, “Patugah ham ma bangku, ija do rumah ni halak na marpanonggoran ai?”

¹⁹Jadi nini si Samuel ma mambalosi si Saul, “Ahu do halak na marpanonggoran ai; palobei nasiam ma hu buntu-buntu ai, ase rap mangan nasiam sadari on pakon ahu; patar pe pabingkatonku ham, anjaha haganup na ibagas uhurmu ai, hupatugah pe bamu.

²⁰Anggo pasal halode boru-borumu ai do, na magou tolu ari na salpu, ulang pala pusok uhurmu pasal ai, ai domma jumpah. Ai bani ise do jumpah na pinarsinta ni ganup halak Israel? Ai lang bamu do pakon bani ganup ginompar ni bapamu?”

²¹Nini si Saul ma mambalosi, “Ai lang halak Benjamin do ahu, marga sietekan i tongah-tongah ni halak Israel? Ai lang pangkungku do sietekan hun bani ganup pangku ni marga Benjamin? Mase ma sonai hatahononmu hu bangku?” [89]

²²Dob ai iarahkon si Samuel ma si Saul pakon juakjuakni ai, iarahkon ma sidea hu kamar bolag, anjaha ibahen sidea hundul hampit luluan ni ganup na nidilo ai, tar tolu puluh halak bueini.

²³Dob ai nini si Samuel ma hu bani sipargulei, “Boan ma hujon lompah na dob hubere bam, na dob huhatahon bam, ʻPapulig on.ʼ ”

²⁴Dob ai iboan sipargulei ai ma hae bona pakon na longkot hujai, anjaha itibalhon ma ai i lobei ni si Saul; jadi nini si Samuel ma, “Tonggor ma, na pinapulig do in bamu, antong pangan ham ma! Na pinapulig hinan do in bamu, paima jumpah panorangni, boi ham mangan pakon na nidilo on.” Jadi mangan ma si Saul rap pakon si Samuel sadari ni ai. [90]

²⁵Dob tuad sidea hun buntu-buntu ai laho hu huta, ipadear ma podoman bani si Saul i kamar pardatas, dob ai modom ma ia.

²⁶Dob ai sanggah na naik simarikkuning idilo si Samuel ma si Saul hu kamar pardatas, nini ma, “Puho ma ham, ase hupataruh ham.” Jongjong ma si Saul, rap luar ma sidea haduasi hu dalan, ia pakon si Samuel.

²⁷Sanggah na tuad ai sidea das hu parbalogan ni huta ai, nini si Samuel ma dompak si Saul, “Hatahon ma juakjuak ai ase ipalobei, anjaha anggo domma hun lobei ia, soh ma ham ijon tongkin, ase hupatugah bamu hata ni Naibata.”