Read Batak Toba 1 MUSA 11 Bible Online

1 MUSA 11 - Batak Toba bible

1 MUSA 11

¹I. [1] Saragam do pangkuling masa di sandok tano on jala sada do hata.

²Jadi di na marbungkasan nasida sian habinsaran, jumpang nasida ma tano pea di luat Sinear, gabe maringan nasida disi.

³Dung i masipandohan ma nasida: Tole, tatopa ma tano bahen tano takko, jala masak situtu itatutung i. Jadi tano na minasakna i dipangke bahen batu jala barerang dipangke nasida bahen rapot.

⁴Dung i angka dipandok nasida ma: Tole, tapungka ma sada hutanta, jala tapajokkon sada tungkup, sungkot ro di langit punsuna, tabahen ma baritanta, asa unang marserak hita tu liat portibi on.

⁵Jadi tuat ma Jahowa marnida huta dohot tungkup i, na pinauli ni angka anak ni jolma.

⁶Dung i ninna Jahowa ma: Ida ma sada do bangso jala sada pangkuling di nasida sude, jala nunga dipungka nasida paulihon angka i. Onpe tung so hasundatan nasida paulihon saluhut na sinangkapnasida i.

⁷Tole, tuat ma Hita jala tagaor pangkulingnasida disi, asa unang be diantusi sahalak pangkuling ni donganna.

⁸Jadi dipaserak Jahowa ma nasida sian i tu liat portibi on, gabe mansohot nasida paulihon huta i.

⁹Dibahen i didok goarna Babel, ala disi do digaor Jahowa pangkuling ni sandok isi ni tano on, jala sian i dipaserak Jahowa nasida tu liat portibi on. II.

¹⁰On do angka sundut ni si Sem. Marumur saratus taon ma si Sem, jadi ditubuhon ma si Arpaksad, dua taon dung salpu aek na sumar i.

¹¹Ia leleng ni si Sem mangolu, dung ditubuhon si Arpaksad i lima ratus taon do, jala ditubuhon anak dohot boru.

¹²Marumur tolupulu lima taon si Arpaksad, jadi ditubuhon ma si Sela.

¹³Ia leleng ni si Arpaksad mangolu, dung ditubuhon si Sela opat ratus tolu taon do, jala ditubuhon anak dohot boru.

¹⁴Marumur tolupulu taon si Sela, jadi ditubuhon ma si Heber.

¹⁵Jadi dung ditubuhon si Heber, mangolu dope si Sela opat ratus tolu taon, jadi ditubuhon anak dohot boru.

¹⁶Marumur tolupulu opat taon si Heber, jadi ditubuhon ma si Peleg.

¹⁷Jadi dung ditubuhon si Peleg mangolu dope si Heber opat ratus tolupulu taon, jala ditubuhon anak dohot boru.

¹⁸Marumur tolupulu taon si Peleg, jadi ditubuhon ma si Reu.

¹⁹Jadi dung ditubuhon si Reu mangolu dope si Peleg dua ratus sia taon, jala ditubuhon anak dohot boru.

²⁰Marumur tolupulu dua taon si Reu, jadi ditubuhon ma si Serug.

²¹Jadi dung ditubuhon si Serug, mangolu dope si Reu dua ratus pitu taon, jala ditubuhon anak dohot boru.

²²Marumur tolupulu taon si Serug, jadi ditubuhon ma si Nahor.

²³Jadi dung ditubuhon si Nahor, mangolu dope si Serug dua ratus taon, jala ditubuhon anak dohot boru.

²⁴Marumur duapulu sia taon si Nahor, jadi ditubuhon ma si Tara.

²⁵Jadi dung ditubuhon si Tara mangolu dope si Nahor saratus sampulu sia taon, jala ditubuhon anak dohot boru. III.

²⁶Marumur pitupulu taon si Tara, jadi ditubuhon ma si Abram, si Nahor dohot si Haran.

²⁷On do angka sundut ni si Tara: Ditubuhon si Tara do si Abram, si Nahor dohot si Haran. Alai si Haran manubuhon si Lot.

²⁸Alai mate do si Haran jumolo sian si Tara amana i, di tano hatubuanna i, di Ur di luat Kasdim.

²⁹Dung i mambuat boru ma si Abram dohot si Nahor; goar ni jolma ni si Abram si Sarai, ia goar ni jolma ni si Nahor si Milka, boru ni si Haran, ama ni si Milka dohot si Jiska.

³⁰Alai na hol do anggo si Sarai, ndang adong tubuna.

³¹Dung i diarahon si Tara ma si Abram, anakna i dohot si Lot, anak ni si Haran, pahompuna i, dohot si Sarai, parumaenna, jolma ni si Abram anakna i, jadi bungkas ma nasida sian Ur di luat Kasdim, asa laho tu tano Kanaan, jadi sahat ma nasida tu Haran, laos maringan disi.

³²Jadi dung dua ratus lima taon umur ni si Tara, mate ma ibana di Haran.