Read Batak Toba 1 MUSA 12 Bible Online

1 MUSA 12 - Batak Toba bible

1 MUSA 12

¹I. [1] Dung i ninna Jahowa ma mandok si Abram: Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononku tu ho.

²Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho.

³Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on.

⁴Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitupulu lima taon si Abram, di na bungkas i ibana sian Haran.

⁵Dung i diarahon si Abram ma si Sarai, jolmana i dohot si Lot, anak ni hahana i ro di sude na sinamotsamotnasida, dohot jolma, angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.

⁶Diliati si Abram ma tano i sahat tu inganan ni si Sikem, ro di tombak More, nunga di tano i hian halak Kanaan i, didapot.

⁷Dung i ro ma Jahowa, diida si Abram, didok ma: Tu pinomparmu ma lehononku tano on. Jadi dipajok disi sada langgatan di Jahowa na niidana i.

⁸Dung i borhat ma ibana sian i tu sada dolok na tungkan habinsaran ni Betel, jala dipagohon undungundungna, tungkan hasundutan ni Betel, jala tungkan habinsaran ni Ai; jadi dipauli ma disi sada langgatan di Jahowa, jala dipajoujou goar ni Jahowa.

⁹Dung i bungkas muse si Abram laho dompak dangsina. II.

¹⁰Alai masa ma haleon di tano i, jadi tuat ma si Abram tu tano Misir, asa maisolat ibana disi, ai haleon potir do di tano i.

¹¹Jadi mandapothon tano Misir i ibana, ninna ma mandok si Sarai, jolmana i: Huboto do, boruboru na uli rupa do ho.

¹²Onpe, molo diida halak Misir ho, dohononnasida ma: Jolmana do on, gabe bunuonnasida ahu, ianggo ho pangoluonnasida do.

¹³Ua dok ma, ibotongku ho, asa sonang ahu ala ho, jala mangolu hosangku ala ho.

¹⁴Jadi dung tolhas si Abram ro di tano Misir, dipaberengbereng halak Misir ma boruboru i, ai na uli situtu do ibana.

¹⁵Dohot angka panuturi ni raja Firaun paberengbereng ibana, jala dipapujipuji ibana tu raja Firaun; jadi diboan ma boruboru i tu bagas ni raja Firaun.

¹⁶Dipadenggan ma uhumna tu si Abram, ala ni angkora i, gabe adong ma di ibana angka birubiru, lombu, halode, angka naposo baoa dohot boruboru, dohot halode boruboru dohot angka unto.

¹⁷Alai dihonahon Jahowa ma angka haporsuhon bolon tu raja Firaun dohot tu donganna sajabu ala hata ni si Sarai, jolma ni si Abram i.

¹⁸Jadi dijou raja Firaun ma si Abram, didok ma; dia do na binahenmi tu ahu? Boasa so dipaboa ho tu ahu jolmam ibana hape?

¹⁹Boasa dohononmu: Ibotongku ibana? Jadi naeng buatonku ibana bahen jolmangku. On pe, na, jolmam, buat ma, dung i laho ma ho.

²⁰Dung i didokkon raja Firaun ma angka naposona bahen donganna pataruhon ibana dohot jolmana dohot sude na di ibana i.