Read Batak Toba 1 MUSA 13 Bible Online

1 MUSA 13 - Batak Toba bible

1 MUSA 13

¹I. [1] Jadi nangkok ma si Abram sian Misir, ibana dohot jolmana dohot sude na di ibana rap dohot si Lot tu Kanaan pardangsina.

²Alai mamora situtu do si Abram di pinahan, perak dohot di sere.

³Dung i didatdati ma dalanna sian dangsina sahat ro di Betel, ro di hajongjongan ni undungundungna di mulana, di holangkolang ni Betel dohot Ai.

⁴Tu hajongjongan ni langgatan na binahenna disi parjolo, jala dipajoujou si Abram disi goar ni Jahowa. II.

⁵Alai si Lot pe, na udur mardalan dohot si Abram, marbirubiru do, jala marlombu jala marundungundung.

⁶Jadi ndang tarparmudu tano i nasida, ianggo tung tampak maringan, ai tung na godang do artanasida, jadi ndang tarbahen be top nasida maringan.

⁷Dung i sai adong bada di tongatonga ni sipormahan pinahan ni si Abram dohot sipormahan pinahan ni si Lot. Halak Kanaan i pe dohot halak Perisi maringan uju i di tano i.

⁸Jadi ninna si Abram ma tu si Lot: Ua unang adong bada di tongatonganta dohot di tongatonga ni parmahan ni pinahanta be, ai na sabutuha do hita.

⁹Nda di jolom do sandok tano on? Ua sirang ma ho sian ahu! Ia tu hambirang ho, tu siamun ahu; ia tu siamun ho tu hambirang ahu.

¹⁰Jadi manatapnatap ma si Lot manangkasi sude angka luat humaliang Jordan, ai angka tano tangkasan do i luhut, tagan so diripashon Jahowa dope Sodom dohot Gomorra, sobokkon porlak ni Jahowa, sobokkon tano Misir tolhas ro di Zoar.

¹¹Jadi dipillit si Lot ma di ibana sude angka luat humaliang Jordan, borhat ma ibana tungkan habinsaran. Asa sirang ma nasida na marsabutuha i.

¹²Si Abram maringan di tano Kanaan, ianggo si Lot maringan di angka huta ni luat i, jala dibahen undungundungna tolhas ro di Sodom.

¹³Alai halak na jahat jala pardosa situtu isi ni Sodom i maradophon Jahowa. III.

¹⁴Jadi ninna Jahowa ma mandok si Abram, dung sirang si Lot i sian ibana: Ua tatap ma sian ingananmon dompak utara dohot dompak dangsina dohot dompak habinsaran dohot dompak hasundutan.

¹⁵Ai sandok tano na tinatapmi lehononku ma tu ho dohot tu pinomparmu ro di salelenglelengna.

¹⁶Jala bahenonku do pinomparmu sobokkon orbuk ni tano toropna, molo tung habilangan jolma orbuk ni tano on, habilangansa ma dohot pinomparmi.

¹⁷Borhat ma ho, liati ma tano i mangihuthon unjurna dohot bohangna, ai tu ho do lehononku.

¹⁸Jadi dipaunsat si Abram ma undungundungna laho ma ibana maringan tu tombak Mamre na di Hebron, jala dipajokkon disi sada langgatan di Jahowa.