Read Batak Toba 1 MUSA 15 Bible Online

1 MUSA 15 - Batak Toba bible

1 MUSA 15

¹I. [1] Dung salpu angka jamita ondeng ro ma hata ni Jahowa tu si Abram marhitehite alatan, ninna ma: Unang ho mabiar ale Abram. Ahu do lombulombum, upam mansai balga.

²Alai ninna si Abram ma: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu.

³Angkup ni ninna si Abram: Ndi, ndang adong pinomparhu dilehon ho, jala ida, anak na tubu di bagasan jabungku na ma sitean ahu.

⁴Dung i ro ma hata ni Jahowa mandok tu ibana: Ndang ibana tumean ho, na ruar sian butuham, ibana tumean ho.

⁵Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.

⁶Jadi porsea ma si Abram di Jahowa, gabe hatigoranna do i dietong Jahowa. II.

⁷Dung i didok ma tu ibana: Ahu do Jahowa, na paruarhon ho sian Ur ni halak Kasdim, mangalehon tu ho tano on bahen teanteananmu.

⁸Alai ninna si Abram ma: Ale Tuhan Jahowa, di aha ma tandaonku paboa ahu tumeansa.

⁹Dung i ninna Tuhan i ma mandok ibana: Buat ma di Ahu sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada.

¹⁰Jadi diboan ma i sude di Tuhan i, angka dipardostonga ma i, dung i martoradan be ma dibahen; alai anggo pidong i ndang dibola.

¹¹Dung i marsonggopan ma angka pidong panoro tu angka juhut pelean i, alai diosikkon si Abram ma angka pidong i.

¹²Jadi dung manihir mata ni ari, tarnenep modom ma si Abram, gabe songgop ma tu ibana hasonggoton dohot haholomon bolon.

¹³Dung i ninna ma mandok si Abram: Unang so diboto ho, paisolat do sogot pinomparmi di tano na so golatna, jala parhatobanonna nasida, jala paporsukporsuhonna arga opat ratus taon.

¹⁴Alai bangso na marhatobanhon nasida pe uhumonku do; dung i ruar ma nasida mantat ugasan godang.

¹⁵Ianggo ho topotonmu do angka ompum mardamedame, tanomon do ho dung sarimatua.

¹⁶Dung i paopatsunduthon mulak ma nasida, ai ndang dope sun hinajahat ni halak Amori.

¹⁷Jadi dung mate mata ni ari, jala holom marimpotimpot, ida ma, martimus ma sada pamurunan, jala disola sada sipusipu na gara holangkolang ni angka tanggotanggo.

¹⁸Di ari na sasada i marpadan ma Jahowa dohot si Abram, ninna ma: Tu pinomparmu do lehononku tano on olat ni batang aek Misir sahat ro di batang aek na bolon, i ma batang aek Euprat.

¹⁹Tano na niinganan ni halak Keni dohot halak Kenizi dohot halak Kadmoni.

²⁰Dohot halak Het dohot halak Perisi dohot halak Repaim.

²¹Dohot halak Amori dohot halak Kanaan i dohot halak Girgasi dohot halak Jebusi.