Read Batak Toba 1 MUSA 22 Bible Online

1 MUSA 22 - Batak Toba bible

1 MUSA 22

¹I. [1] Jadi dung salpu angka jamita ondeng, diunjuni Debata ma si Abraham, ninna ma mandok ibana: Jo Abraham! Dison do ahu, ninna.

²Dung i ninna ma: Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho.

³Jadi dipasogot si Abraham ma hehe manogotna i, dipalanoi halodena, jala diarahon dua halak naposona rap dohot si Isak, anakna i, jala ditahai soban manutungi pelean i, dung i borhat ma ibana laho tu dolok, na nidok ni Debata tu ibana.

⁴Patoluarihon manaili ma si Abraham, jadi ditatap ma dolok i.

⁵Dung i ninna si Abraham ma tu angka naposona i: Dison ma hamu mangulon rap dohot halode i, alai anggo ahu dohot dakdanak i, laho ma hami tu sadu i, jala ia dung martangiang hami, mulak hami tu hamu on.

⁶Jadi dibuat si Abraham ma soban tu pelean situtungon i diampehon ma tu si Isak, anakna i. Alai ibana do maniop api dohot raut sada, jadi rap mardalan ma nasida na dua i.

⁷Dung i ninna si Isak ma tu si Abraham amana i: Atehe, ale amang, ninna! Dison do ahu ale anaha, ninna. Dung i ninna si Isak ma: Nunga dison api dohot soban, alai didia do birubiru bahen pelean situtungon i?

⁸Jadi ninna si Abraham ma: Sai pilliton ni Debata di Ibana sada birubiru bahen pelean situtungon, ale anaha. Jadi rap mardalan ma nasida na dua i.

⁹Jadi dung sahat nasida tu dolok, na nidok ni Debata tu ibana, dipauli si Abraham ma disi sada langgatan, jala disusun soban i, ditali dohot si Isak anakna i, jala diampehon ibana tu ginjang ni langgatan i, tu atas soban i.

¹⁰Dung i dipatoltol si Abraham ma tanganna mambuat raut i laho maneat anakna i.

¹¹Dung i dijou suruan ni Jahowa ma ibana sian banua ginjang, ninna ma: Jo Abraham, Abraham! Dison do ahu, ninna.

¹²Jadi ninna suruan i ma: Unang laho tanganmu tu dakdanak i, jala unang bahen manang aha tu ibana, ai nunga huboto dihabiari ho do Debata, jala ndang diolani ho anakmu na sasada i maradophon Ahu.

¹³Jadi manaili ma si Abraham, gabe diida ma birubiru tunggal sada di pudina, rais tandukna di dangka dupang ni hau metmet; jadi laho ma si Abraham dibuat ma birubiru tunggal i, jala dipelehon bahen pelean situtungon, singkat ni anakna i.

¹⁴Dung i dibahen si Abraham ma goar ni pamelean i: Jahowa Jireh (Jahowa manatap); ala ni didok halak rasirasa nuaeng: Di dolok ni Jahowa tataponna. II.

¹⁵Dung i dijou suruan ni Jahowa ma si Abraham paduahalihon sian banua ginjang.

¹⁶Didok ma: Nunga pola huuarihon diringku, ninna Jahowa, ala dibahen ho songon i, jala ndang diolani ho anakmu na sasada i:

¹⁷Sai pasupasuonku ma ho, jala patoroponku situtu pinomparmu, sobokkon bintang angka na di langit, jala sobokkon rihit, angka na di topi ni laut, jala teanon ni pinomparmu sogot huta ni angka musuna.

¹⁸Jala martua sogot saluhut bangso ni tano on marhitehite pinomparmu, ala ditangihon ho soarangku.

¹⁹Dung i mulak ma si Abraham tu angka naposona, jadi borhat ma nasida, asa tampak laho tu Berseba, ai maringan di Berseba do si Abraham. III.

²⁰Jadi dung salpu angka jamita ondeng, ro ma barita mandok tu si Abraham: Ida ma, nunga tubuan anak dohot si Milka di si Nahor, anggim i.

²¹Si Us, buhabajuna dohot si Bus anggina i dohot si Kemuel, ompu ni halak Ram.

²²Dohot si Kesed dohot si Haso dohot si Pildas dohot si Jidlap dohot si Betuel.

²³Alai anggo si Betuel tumubuhon si Rebekka. Na ualu halak i do ditubuhon si Milka di si Nahor, anggi ni si Abraham i.

²⁴Dohot hatobanna, pinarjolmana i, na margoar si Reuma do tubuan anak: Si Teba, Gaham, Tahas dohot Maaka.