Read Batak Toba 1 MUSA 25 Bible Online

1 MUSA 25 - Batak Toba bible

1 MUSA 25

¹I. [1] Dung i diulakkon si Abraham ma mambuat boru, na margoar si Ketura.

²Na manubuhon di ibana: Si Zimran dohot si Joksan dohot si Medan dohot si Midian, si Isbak dohot si Sua.

³Ia si Joksan manubuhon: Si Seba dohot si Dedan. Alai anggo angka anak ni si Dedan: halak Assusim dohot si Letusim dohot si Leummim.

⁴Ia angka anak ni si Midian: Si Epah, si Eper, si Hanok, si Abida dohot si Elda. I ma angka anak ni si Ketura sudena.

⁵Dung i dilehon si Abraham ma sude na di ibana i tu si Isak.

⁶Alai anggo tu angka anak ni jolmana panoroni i, dilehon si Abraham angka silehonlehon, dung i dipajae nasida sian si Isak anakna i tu tano na tungkan habinsaran, tagan mangolu dope ibana. II.

⁷Ia leleng ni si Abraham mangolu saratus pitupulu lima taon do.

⁸Dung i tos ma hosana, jala mate sarimatua si Abraham, dung mahap rohana di hangoluan on, jadi dipapungu ibana tu angka ompuna.

⁹Dung i ditanom si Isak dohot si Ismael, angka anakna i, ibana tu liang Makpelah, tu hauma ni si Epron, anak ni si Zohar, marga Het, na tungkan habinsaran ni Mamre.

¹⁰Tu hauma, na tinuhor ni si Abraham sian angka anak ni si Het; disi do tartanom si Abraham dohot si Sarah jolmana i.

¹¹Jadi dung mate si Abraham, dipasupasu Debata ma si Isak, anakna i; alai maringan di lambung sumur Lakhai-Roi do si Isak i. III.

¹²Angka on do pinompar ni si Ismael, anak ni si Abraham, tinubuhon ni si Hagar, boru Misir, hatoban ni si Sarah, di si Abraham:

¹³Jala on do goar ni angka anak ni si Ismael mangihuthon partubunasida: Nabaiot buhabaju ni si Ismael, dung i Kedar, Abdeel, Mibsam.

¹⁴Misma, Duma, Masa.

¹⁵Hadad, Tema, Jetur, Napis dohot Kademah.

¹⁶I ma angka anak ni si Ismael, jala i ma angka goarnasida mangihuthon hutana dohot parsaroanna be, sampulu dua raja, parserahan ni marganasida.

¹⁷Ia leleng ni si Ismael mangolu saratus tolupulu pitu taon do, dung i tos ma hosana, jala mate ibana, jadi dipapungu ma ibana tu angka ompuna.

¹⁸Olat ni huta Hevila sahat ro di Sur na marbalokkon Misir dohot Assur diingani nasida; tungkan habinsaran ni angka donganna i ibana ojak. IV.

¹⁹On ma angka pinompar ni si Isak, anak ni si Abraham. Si Abraham tumubuhon si Isak.

²⁰Jala marumur opatpulu taon si Isak di na binuatna i si Rebekka, boru ni si Betuel, isi ni Ram i, iboto ni si Laban, isi ni Ram i, bahen jolmana.

²¹Dung i digogo si Isak ma tumangiangkon jolmana i tu Jahowa, ai na hol do ibana; jadi ditangihon Jahowa tangiangna, gabegabean ma si Rebekka jolmana i.

²²Dung i masitunjangan ma posoposo i di bortianna. Jadi ninna si Rebekka ma: Molo songon i hape boasa songon on ahu? Dung i laho ma ibana manungkunhonsa tu Jahowa.

²³Jadi ninna Jahowa ma tu ibana: Dua do bangso di bortianmi, jala dua marga sirang sian boltokmi, jala gumogo na samarga martimbangkon na sada nari, jala mandapot di siampudan do sihahaan i.

²⁴Jadi dung jumpang hasasangana i manubuhon, ida ma, linduat do di boltokna i.

²⁵Jadi ruar ma na parjolo i, rara do ibana, hira na marulos imbulu sandok dagingna i, jadi dibahen ma goarna si Esau.

²⁶Dung songon i, ruar ma anggina i, ditiop ma tambihul ni si Esau, jadi dibahen ma goarna si Jakkob. Onompulu taon ma umur ni si Isak di na tubu i nasida. V.

²⁷Jadi dung balga dakdanak i, marsiajar parburuon dohot parumaon ia si Esau; alai anggo si Jakkob jolma na daulat marroha do, maringan di angka undungundung.

²⁸Dihasiani si Isak do si Esau i, ala giot pamanganna mangan na binuru; alai hasian ni si Rebekka do ianggo si Jakkob.

²⁹Dung i mangalompa sipanganon ma si Jakkob, jadi ro ma si Esau, sian harangan, jala mansai loja ibana.

³⁰Jadi ninna si Esau ma mandok si Jakkob: Ua husohali ma sian na rara i, ai nunga mansai loja ahu. Ala ni do umbahen margoar Edom ibana.

³¹Alai ninna si Jakkob ma: Gadis ma tu ahu sadari on sahala sihahaan!

³²Jadi ninna si Esau ma: Antong na laho mate na ma ahu, tu dihangku sahala sihahaan i?

³³Dung i ninna si Jakkob ma: Antong mangmangkon ma tu ahu sadari on! Jadi dimangmangkon tu ibana; jala digadis sahalana sihahaan i tu si Jakkob.

³⁴Dung i dilehon si Jakkob ma tu si Esau sagusagu dohot hadio na nilompana i; jadi mangan jala minum ibana, dung i hehe ma ibana laho muli. Asa marsineang ma roha ni si Esau di sahala sihahaan i.