Read Batak Toba 1 MUSA 30 Bible Online

1 MUSA 30 - Batak Toba bible

1 MUSA 30

¹I. [1] Alai dung diida si Rahel, na so tubuan anak ibana di si Jakkob, mangiburu ma ibana di hahana i, didok ma tu si Jakkob: Patupa anak di ahu, molo so adong, mate ma ahu.

²Jadi tarrimas ma si Jakkob mida si Rahel i, ai ahu do huroha singkat ni Debata, nda Ibana do tumiop parbue ni bortianmi?

³Alai ninna si Rahel ma, ida ma, ndi radingku si Bilha, ibana ma topot, asa ditubuhon tu ampuanku, gabe maruli dohot ahu marhite sian ibana.

⁴Jadi dilehon ma tu ibana si Bilha, radingna i, bahen jolmana, gabe ditopot si Jakkob ma.

⁵Jadi gabegabean ma si Bilha, jala ditubuhon anak sada di si Jakkob.

⁶Dung i ninna si Rahel ma nunga dapotan uhum ahu dibahen Debata, ditangihon dohot soarangki, jala dilehon di ahu anak sada; ala ni dibahen ma goarna si Dan.

⁷Dung i tumagam haroan muse si Bilha, rading ni si Rahel i, jala ditubuhon anak paduahon di si Jakkob.

⁸Jadi ninna si Rahel ma: Angka parsirangguton ni Debata huparsirangguthon dohot dahahang i, gabe monang ahu, jadi dibahen ma goarna si Naptali.

⁹Jadi dung diida si Lea, naung mansohot ibana mangintubu, dibuat ma si Zilpa radingna i, mangalehon ibana tu si Jakkob bahen jolmana.

¹⁰Asa ditubuhon si Zilpa, rading ni si Lea i anak sada di si Jakkob.

¹¹Dung i ninna si Lea ma: Nunga ro tua i, jadi dibahen ma goarna si Gad.

¹²Dung i ditubuhon si Zilpa, rading ni si Lea i anak paduahon di si Jakkob.

¹³Jadi ninna si Lea ma: Tuangki antong! Ai parhatuaon ni angka boruboru i ma ahu, jadi dibahen ma goarna si Aser.

¹⁴Dung i di na masa gotilon laho ma si Ruben tu balian, gabe jumpangsa ma angka dudaim (bahen dorma) di tonga ni hauma, jala diboan tu si Lea inana i. Dung i ninna si Rahel ma mandok si Lea: Ua lehon ahu deba sian angka dudaim ni anakmu.

¹⁵Jadi ninna si Lea ma mandok ibana: Na hurang dope huroha di roham binuatmi roha ni sinondukki, dohot do angka dudaim ni anakki naeng buatonmu? Jadi ninna si Rahel ma: Antong di lambungmu ma ibana modom saborngin on ali ni angka dudaim ni anakmi.

¹⁶Jadi dung muli si Jakkob sian hauma bodarina i, ditomutomu si Lea ma ibana, ninna ma: Tu ahu do ho ro, ai nunga hutuhor ho ali ni angka dudaim ni anakki. Jadi rap modom nasida di na saborngin i.

¹⁷Dung i ditangihon Debata ma si Lea, gabegabean ma ibana, jala ditubuhon anak palimahon di si Jakkob i.

¹⁸Jadi ninna si Lea ma: Nunga dilehon Debata upangku, ala na hulehon i radingku tu sinondukki, jadi dibahen ma goarna si Isasar.

¹⁹Dung i tumagam haroan muse si Lea i, jala ditubuhon anak paonomhon di si Jakkob.

²⁰Jadi ninna si Lea ma: Silua na denggan disiluahon Debata tu ahu. Inganhonon ni sinondukku ma ahu sahali on, ai nunga hutubuhon di ibana onom anak, jadi dibahen ma goarna si Zebulon.

²¹Dung i ditubuhon ma boru sada, jala dibahen goarna si Dina. II.

²²Alai diingot Debata muse si Rahel, jala ditangihon pangidoanna, dibungka ma bortianna i.

²³Jadi tumagam haroan ibana, jala ditubuhon anak sada, ninna ma: Nunga didaek Debata haurahonku.

²⁴Jadi dibahen ma goarna si Josep, ninna ma: Sai ditambai Jahowa ma tu ahu anak sada nari! III.

²⁵Jadi dung ditubuhon si Rahel si Josep i, ninna si Jakkob ma mandok si Laban: Paborhat ma ahu, asa laho ahu tumopot ingananku dohot tanongku.

²⁶Lehon ma angka jolmangki dohot angka tubungku, angka na husamothon sian hamu, asa laho ahu, ai diboto hamu do parulangku, na hupangulahon i hamu.

²⁷Jadi ninna si Laban ma mandok ibana: Sai maruli ma ahu mangido asi ni roham! Ai patar do ditanda rohangku naung dipasupasu Jahowa ahu ala ho.

²⁸Bohoi tu ahu upam silehononku, ninna.

²⁹Dung i didok si Jakkob ma mandok ibana: Hamu pe, diboto hamu do parulangku di hamu dohot panjadi ni pinahanmuna saleleng ahu patureturehon.

³⁰Ai otik do adong di hamu, tagan so ro ahu, nunga manjarar gabe deak, jala dipasupasu Jahowa hamu marhite sian ahu. On pe, sadihari pe pangulahononku dohot isi ni bagashi?

³¹Jadi ninna si Laban ma: Antong aha ma lehononku tu ho? Dung i ninna si Jakkob ma: Ndang manang aha lehononmu di ahu, molo dipatupa hamu hatangkon tu ahu, ulahanku ma marmahan pinahanmuna i.

³²Bolusonku ma sadari on sude punguan ni birubirumuna, ba papulik hamu ma sian i sude pinahan na marrintik dohot siganding, ro di sude na birong sian angka anak ni birubiru i; na marrintik dohot sibolang sian angka hambing pe, i ma gabe upangku.

³³Asa hatigoranki tumindangi ahu sogot, molo ro hamu tumingkir upangki: Sude na so marrintik, jala na so sibolang sian angka hambing i, jala na so birong sian angka anak ni birubiru i, na tinangko ma i molo di ahu.

³⁴Jadi ninna si Laban ma: Antong songon na nidokmi ma tutu!

³⁵Dung i dipapulik ma di na sadari i hambing tunggal angka na marrintik dohot angka sibolang, ro di sude hambing boruboru angka na marrintik dohot angka sibolang, sude angka na marsoar na bontar dohot sude na birong sian angka birubiru i, dung i dipasahat ma tu tangan ni angka anakna i.

³⁶Dung i dibahen si Laban ma partoluarian holangkolangna dohot si Jakkob. Asa diparmahan si Jakkob ma punguan birubiru ni si Laban angka na tading i.

³⁷Alai dibuat si Jakkob ma dangka ni hau meang dohot anturmangan dohot andulpak, jala dilangkati margollotgollot.

³⁸Dung i dipampeakkon ma dangka angka na nilangkatanna i tu parsoburan ni angka birubiru i, asa dipaadopadop, asa marbaringin nasida di na marsobur i.

³⁹Jadi marlambe ma angka birubiru maradophon angka dangka i, gabe ditubuhon ma na marrintik angka sibolang dohot siganding.

⁴⁰Dung i dipapulik si Jakkob ma angka anak ni birubiru i, jala didompakkon angka birubiru i tu na marrintik dohot na birong sian pinahan ni si Laban. Dung i pulik ma dibahen inganan ni pinahanna i, ndang be saor dibahen tu pinahan ni si Laban.

⁴¹Alai molo rumogon birubiru, angka na umbolon i, dipampeakkon si Jakkob ma muse angka dangka i tu angka parsoburan i, gabe dipaadopadop laho marjantan.

⁴²Alai molo ro birubiru, angka na marpengpeng, ndang dibahen. Jadi di si Laban ma angka na marpengpeng i, alai angka na bolon i di si Jakkob do.

⁴³Jadi mamora bulung ma si Jakkob, torop ma angka birubiruna dohot naposona boruboru dohot baoa, angka unto dohot halode.