Read Batak Toba 1 MUSA 31 Bible Online

1 MUSA 31 - Batak Toba bible

1 MUSA 31

¹I. [1] Dung i tarbortik ma tu si Jakkob hatahata ni angka anak ni si Laban, angka na mandok: Nunga diahuti si Jakkob sinamot ni amanta sasudena, jala marharoroan sian na di amanta i do hamoraonna on sudena.

²Bohi ni si Laban pe, ndang songon na sai laon be dompak ibana, diida si Jakkob.

³Dung i ninna Jahowa ma mandok si Jakkob: Mulak ma ho tu tano ni angka ompum, tu tano hagodanganmu, hudongani pe ho.

⁴Jadi disuru si Jakkob ma manjou si Rahel dohot si Lea tu panjampalan punguan ni birubiruna i.

⁵Jala didok ma mandok nasida: Nunga huida bohi ni amanta i, ndang be songon na sai laon dompak ahu; alai didongani Debata ni damang i do ahu.

⁶Jala diboto hamu do, nasa gogongku hubahen mangulahon amanta i.

⁷Alai sai dipaotooto amanta i do ahu, jala sampulu hali diuba upangki; alai ndang diloas Debata ibana mangago ahu.

⁸Molo didok ibana songon on: Angka na marrintik ma upam, jadi angka na marrintik i dipantubuhon sude birubiru i. Alai molo didok songon on: Angka sibolang i ma upam, jadi angka sibolang dipantubuhon, sude birubiru i.

⁹Asa Debata do mangarampas sinamot ni amanta i, jala dilehon tu ahu.

¹⁰Ai huida do di bagasan nipingku, di tingki harorongom ni angka pinahan i, angka tunggal na marrintik dohot sibolang dohot siganding mangangkati angka birubiru i.

¹¹Jadi didok surusuruan ni Debata ma mandok ahu di bagasan nipingku: Jo Jakkob! Dison do ahu, ningku.

¹²Dung i ninna ibana ma: Ua pameong jolo matam jala ida, angka na marrintik, jala sibolang, jala siganding sude birubiru tunggal angka na mangangkati angka birubiru boruboru, ai nunga huida sude na binahen ni si Laban i tu ho.

¹³Ahu do Debata uju na di Betel i, uju na miniahanmu disi partinandaan i, jala dibagabaga i ho Ahu. On pe, borhat ma ho, bungkas sian tano on, jala mulak tu tano hagodanganmi.

¹⁴Dung i ninna si Rahel dohot si Lea ma mangalusi ibana: Apala adong be tagamon jambar, manang ugasan siteanonnami di jabu ni amanta i.

¹⁵Nda sobokkon halak na pulik marga na ma hami di rohana? Ai digadis do hami, jala nunga sun dipangan dohot tuhornami.

¹⁶Ai nasa hamoraon na nirampas ni Debata sian amanta i, hita dohot anakta i hian do nampunasa. On pe, bahen ma sude na tinonahon ni Debata tu ho.

¹⁷Jadi hehe ma si Jakkob, dipahundul ma angka anakna dohot jolmana tu angka unto.

¹⁸Diboan ma dohot pinahanna luhut ro di nasa ugasanna, na niomona i, pinahan hapunjunganna pe, na sinamotsamotna i di Padang-Aram laho tumopot si Isak, amana i tu tano Kanaan.

¹⁹Alai laho manggustingi imput ni birubiruna i anggo si Laban, jadi ditangko si Rahel ma angka terapim (Debata hidup) ni amana i.

²⁰Asa dipalungun si Jakkob ma roha ni si Laban, halak Ram i, ala so dipaboa tu ibana na laho lintun i ibana.

²¹Asa lintun ma si Jakkob, diboan dohot sude na di ibana i, borhat ma ibana laho manaripari batang aek i, dung i ditondong ma dompak dolok Gilead. II.

²²Patolubornginhon adong ma na mamaritahon tu si Laban naung lintun i si Jakkob.

²³Jadi diarahon si Laban ma angka hahaanggina i mangeahi ibana, parpituarian pe, asa dapotsa ibana di dolok Gilead.

²⁴Alai ro ma Debata bornginna i paipihon tu si Laban, halak Ram i, ninna ma mandok ibana: Jaga ho! So tung ditongkari ho si Jakkob i.

²⁵Asa dapot si Laban ma si Jakkob i, ai dipagohon si Jakkob do undungundungna di dolok i; si Laban pe dipagohon do undungundungna di dolok Gilead rap dohot angka hahaanggina i.

²⁶Dung i ninna si Laban ma mandok si Jakkob: Dia do na binahenmi? Tole dipalungun ho rohangki, tole diboan ho angka borungku, hira tabantaban do nasida na dapot podang?

²⁷Boasa tung marsibuni ho laho lintun, so martinading hata ho tu ahu, asa hupataru ho nian, hugondanggondangi hamu nian, paboa godang ni rohangku.

²⁸So manang diloas ho ahu mangumma angka pahompungku dohot angka borungku; asa na oto do pambahenmi.

²⁹Tuk do nian gogo ni tanganku mambahen uhum na roa tu hamu; alai na ro do na borngin nantuari hata ni Debata ni amamuna tu ahu, ninna do: Jaga ho! So tung ditongkari ho si Jakkob i.

³⁰On pe, ia na naeng laho ho ala na malungun ho di bagas ni amamu, boasa ma tung tangkoonmu angka debatangku?

³¹Dung i ninna si Jakkob ma mangalusi si Laban: Dibahen na mabiar do ahu, ai ninna rohangku do: Atek tung rampasonmu maon angka borumi sian ahu.

³²Alai molo tung jumpang ho angka debatami, di manang ise, marutang hosa ma ibana; asa sungkapi hamu ma di jolo ni angka donganta on; molo adong manang aha ugasanmu di ahu, buat di ho. Alai ndang pamotoan ni si Jakkob na tinangko ni si Rahel do i hape.

³³Jadi dibongoti si Laban ma undungundung ni si Jakkob dohot undungundung ni si Lea dohot undungundung ni rading na dua i, alai ndang adong jumpangsa. Dung i ruar ma ibana sian undungundung ni si Lea mambongoti undungundung ni si Rahel.

³⁴Alai nunga dibuat si Rahel hian angka terapim i, jala dibahen tu toru ni palano ni unto, asa dihunduli. Jadi disungkapi si Laban ma undungundung i luhutna, hape ndang adong jumpangsa.

³⁵Jadi ninna si Rahel ma tu amana i: Unang tung tarrimas roha ni tuangku, ala so tarbahen ahu hehe maradophon ho, ai masa do di ahu hasomalan ni boruboru. Asa didiori pe, laos so jumpangsa angka terapim i.

³⁶Jadi tarrimas ma si Jakkob, dibadai ma si Laban i, ninna si Jakkob ma mangalusi si Laban i: Aha ma pangalaosingku, aha ma dosangku umbahen piripirion hamu mangeahi ahu?

³⁷Nunga disungkapi hami ugasanku saluhutna, aha ma jumpang hamu sian nasa ugasan ni jabum? Peakkon ma tu jolo ni angka donganki dohot donganmi, asa diuhumi nasida hita na dua.

³⁸Nunga pola duapulu taon, sai di lambungmu do ahu, ndang dung tarposo birubirumu, manang hambingmu, jala ndang dung hupangan hambing tunggal ni birubirumuna.

³⁹Ndang dung hutaruhon tu ho na sinoro ni binatang sai hualii do i; sai dipangido ho do sian ahu na tinangko ni halak nang arian nang borngin.

⁴⁰Ia arian las ni ari manganhon ahu, ia borngin ngali ni ari do, jala ndang tarnono matangku.

⁴¹Na duapulu taon on sai di jabum do ahu mangulahon hamu, sampulu opat taon mangomo borum na dua i, jala onom taon mangomo angka pinahanmu; alai sampulu hali dipauba hamu upangki.

⁴²Aut unang didongani Debata ni damang i ahu, Debata ni si Abraham, jala na hinabiaran ni si Isak, ra tung palahoonmu boti ahu; alai ditatap Debata do pardangolanki dohot halojaon ni tanganku, gabe dipinsang hamu na borngin nantuari. III.

⁴³Jadi ninna si Laban ma mangalusi si Jakkob: Borungku do angka boruboru i, jala anakku do angka anak i, jala pinahanku angka pinahan i, jala sude na niidam, ahu nampunasa; asa hahuaonku ma sadari on angka borungkon, manang anaknasida, angka na tinubuhonnasida i.

⁴⁴On pe, tole tabahen ma padan, ahu dohot ho, i ma sitindanginta sogot.

⁴⁵Jadi dibuat si Jakkob ma sada batu, jala dipajongjong bahen partinandaan.

⁴⁶Dung i ninna si Jakkob ma mandok angka donganna i: Papungu hamu ma angka batu. Jadi dipambuat nasida ma angka batu mambahen punggupunggu, laos mangan nasida disi di atas punggupunggu i.

⁴⁷Dung i dibahen si Laban ma goarna: Jegar-Sahaduta; alai Galed goarna dibahen si Jakkob.

⁴⁸Dung i ninna si Laban ma: Punggupunggu on ma sitindanginta sadari on, ala ni do umbahen margoar Galed;

⁴⁹Dohot Mispa, ai ninna do: Sai ditatap Jahowa ma hita, ia dung sirang hita!

⁵⁰Molo diarsahi ho angka borungki, manang mambuat boru bahen imbang ni angka borungki, ndang adong jolma di lambungta, alai Debata do sitindanginta.

⁵¹Angkup ni didok si Laban mandok si Jakkob: Ida ma, punggupunggu on dohot partinandaan on na huojakkon i parbolatanta.

⁵²Punggupunggu on dohot partinandaan on sitindangi, paboa na so jadi laosanku punggupunggu on mandapothon ho, hamu pe, ndang jadi laosanmu punggupunggu on dohot partinandaan on mandapothon ahu laho mangago.

⁵³Debata ni si Abraham dohot Debata ni si Nahor, Debata ni amanasida pe manguhum hita. Jadi marbulan ma si Jakkob tu Na hinabiaran ni amana si Isak i.

⁵⁴Dung i dipelehon si Jakkob ma sada pelean di dolok i, dipio ma dohot angka donganna i mangan sagusagu. Jadi dung sun nasida mangan sagusagu, laos marborngin di dolok i nasida.

⁵⁵Torang ni arina i dipasogot si Laban ma hehe, jala diumma angka pahompuna dohot angka boruna i, jala dipasupasu nasida; dung i laho muli ma si Laban tu ingananna hian.