Read Batak Toba 1 MUSA 34 Bible Online

1 MUSA 34 - Batak Toba bible

1 MUSA 34

¹I. [1] Alai laho ma ianggo si Dina, boru ni si Lea, na tinubuhonna di si Jakkob, martandang tu angka boru, isi ni banua i.

²Jadi diida si Sikem, anak ni si Hemor, marga Hevi, raja ni luat i ibana, jala digogoi.

³Solo situtu rohana di si Dina, boru ni si Jakkob i, jala lomo rohana mida boruboru na bajar i, gabe didok ma hatana mambuat roha ni boruboru na bajar i.

⁴Dung i ninna si Sikem na mandok si Hemor, amana i: Sai buat ma di ahu namarbaju on bahen jolmangku.

⁵Dung i tarbortik ma tu si Jakkob, naung pinarotakrotak ni si Sikem si Dina, boruna i, jala di ladang angka anakna i marmahan pinahanna, jadi sip ma si Jakkob, paima ro nasida.

⁶Dung i ruar ma si Hemor, ama ni si Sikem i tumopot si Jakkob, naeng mangkatai dohot ibana.

⁷Ro ma dohot angka anak ni si Jakkob sian ladang. Jadi marsak jala tarrimas situtu angka baoa i, dung dibege nasida barita ni haurahon, binahen ni si Sikem tu Israel, naung pinarotakrotakna i boru ni si Jakkob, tung na so jadi do bahenon songon i.

⁸Dung i mangkatai ma si Hemor dohot nasida, ninna ma: Solo do roha ni anakku, si Sikem di borumuna i; ua lehon hamu nasida tu ibana bahen jolmana!

⁹Martondong ma hita: Lehon hamu borumuna di hami, borunami pe buat hamu di hamu.

¹⁰Di lambungnami on ma hamu maringanan; guru di hamu ma tano na di jolomuna i; ingani jala liati hamu marboniaga mambuat laba di hamu.

¹¹Dung i didok si Sikem ma mandok ama ni si Dina dohot tu angka ibotona i: Sai asi ma rohamuna di ahu hulehon pe gurudokmuna.

¹²Gumodang pe pangido hamu tuhorna dohot silehonlehon, sai na lehononku do, gurudokmuna i, asal dilehon hamu boru i tu ahu bahen jolmangku. II.

¹³Jadi tanding ma dibahen angka anak ni si Jakkob mangalusi si Sikem dohot si Hemor amana i, ala na pinarotakrotakna i si Dina, ibotonasida i.

¹⁴Didok nasida ma mandok ibana: Ndang haoloan hami hata i, mangalehon ibotonami tu halak na marhulup, ai haurahon do i di hami.

¹⁵Alai huoloi hami pe hamu, molo olo hamu sunaton nasa baoa di hamu, songon hami.

¹⁶Hulehon hami pe borunami tu hamu, hubuat hami pe dohot borumuna di hami, gabe tampak ingananta, jala sada bangso hita.

¹⁷Alai molo so diunduk hamu hatanami, mangoloi sunaton, buatonnami ma borunami, dung i bungkas hami.

¹⁸Jadi lomo ma roha ni si Hemor dohot si Sikem, anakna i umbege hatanasida i.

¹⁹Ndang pola marpaimaan dolidoli i patupahon hata i, ai solo do rohana di boru ni si Jakkob, jala ibana na sumangap sian sude pinompar ni amana.

²⁰Jadi ditopot si Hemor dohot si Sikem anakna i partungkoan ni hutanasida i, asa marhata dohot angka baoa, isi ni hutanasida i, ninna ma:

²¹Naeng maraleale angka halak on dohot hita italoas ma nasida mangingani tano on, asa diliati marboniaga, ai lambas do tano i di jolonasida humaliang; tabuat pe borunasida bahen jolmanta, talehon dohot borunta di nasida.

²²Alai ingkon marsunat hita nasa baoa, songon nasida angka na tarsunat be, asa olo nasida maringan di lambungta on, jala sada bangso dohot hita.

²³Nda guru di hita ma pinahan dohot sude sinamotnasida i? Antong sai itaoloi ma pinangido ni rohanasida i, asa maringan nasida di lambungta on.

²⁴Jadi diunduk nasida ma hata ni si Hemor dohot si Sikem, anakna i, sude nasida angka na marmeang muli sian bahal ni hutana i; marsunat ma sude baoa, isi ni huta i.

²⁵Dung i patoluarihon, di na bernit i diae nasida, masiboan podangna ma na dua anak ni si Jakkob, si Simeon dohot si Lepi, iboto ni si Dina i, dirampok ma huta i na so pangkiriman, jala dibunui nasa baoa.

²⁶Dibunu ma dohot si Hemor dohot si Sikem, anakna i, ditampuli dohot podang, dung i diboan ma si Dina sian bagas ni si Sikem, jadi laho nasida.

²⁷Dung i ditahopi angka anak ni si Jakkob ma angka na tartihami, jala ditaban duduk huta i, ala na pinarotakrotakna i ibotonasida i.

²⁸Didaek ma angka birubiru dohot lombu dohot halodenasida i ro di sude na di bagasan huta dohot na di balian.

²⁹Ro di sude ugasannasida dohot sude posoposo, tole jolmanasida diboan, jala dipupusi nasa ugasan na di bagasan jabu.

³⁰Dung i didok si Jakkob ma mandok si Simeon dohot si Lepi: Dilitohi hamu ma antong parnidaanku pabauhon baritangku tu isi ni tano on, tu halak Kanaan dohot Perisi, so manang piga bilanganta; molo marhara nasida di donganna mangalo hita, gabe bunuonna ma ahu, jadi ripur ahu dohot na hupompar.

³¹Alai ninna nasida ma: Tung tama ma doshon sibabijalang ibotonami bahenonna?