Read Batak Toba 1 MUSA 38 Bible Online

1 MUSA 38 - Batak Toba bible

1 MUSA 38

¹I. [1] Tuat ma uju i si Juda tumadingkon angka hahaanggina i, dipagohon ma undungundungna i jonok tu lambung ni sada halak Adullam margoar si Hira.

²Jadi diida si Juda ma disi sada boru ni halak Kanaan, si Sua goarna, dibuat ma i jala ditopot.

³Jadi marhangoluan ma ibana, jala ditubuhon anak sada, dibahen ma goarna si Er.

⁴Dung i gabegabean muse ibana, jala ditubuhon anak sada, dibahen ma goarna si Onan.

⁵Dung i gabegabean muse ibana jala ditubuhon anak sada, dibahen ma goarna si Sela. Alai di huta Aksib do si Juda di hatutubuna i.

⁶Dung i dibuat si Juda ma boru bahen jolma ni si Er, buhabajuna i, si Tamar do goarna.

⁷Alai na jahat do si Er, buhabaju ni si Juda i, maradophon Jahowa, jadi dibunu Jahowa ibana.

⁸Dung i ninna si Juda ma mandok si Onan: Topot ma jolma ni haham, jala pagodang, mambahen rindang di haham.

⁹Alai dung diboto si Onan, ndada ibana nampuna pinompar, ia ditopot pe jolma ni hahana i, jadi tu tano ma gogo ni dagingna dibolongkon, asa unang marrindang hahana i dibahen.

¹⁰Alai sogo do roha ni Jahowa di pambahenna i, jadi dibunu ma dohot ibana.

¹¹Dung i didok si Juda ma tu si Tamar, parumaenna i: Songon i ma hamu mabalu tinggal di bagas ni amanta, paima magodang anakku, si Sela i, ai ninna rohana do, atek tung mate dohot ibana, songon angka hahana i. Jadi laho ma si Tamar, jala diingani bagas ni amana i. II.

¹²Dung i di laonlaon ni ari, mate ma boru ni si Sua, jolma ni si Juda. Jadi dung sabam roha ni si Juda, nangkok ma ibana tumopot angka sigusting imbulu ni birubiruna, tu Timna, ibana dohot si Hira alealena sian Adullam.

¹³Jadi dibaritahon halak ma tu si Tamar, ninna do: Ida ma, na laho do simatuam doli nangkok tu Timna manggusting imbulu ni birubiruna.

¹⁴Dung i diosari boruboru i ma angka ulos habaluonna i, disaongsaongkon ma abit tujung i laho hundul tu harbangan ni huta Enaim, na di lambung dalan tu Timna, ai nunga balga diida si Sela, hape ndang dilehon ibana tu si Sela bahen jolmana.

¹⁵Jadi dung diida si Juda ibana, diambang ma boruboru sibabijalang ibana, ai disaongsaongi do bohina.

¹⁶Dung i didapothon si Juda ma boruboru i tu pinggol ni dalan i, ninna ma: Ua loas ma ahu ro tu ho, ai ndang diboto parumaenna hape nasida. Jadi ninna nasida ma: Aha ma ugasanmu lehononmu tu ahu, asa ro ho tu ahu?

¹⁷Jadi ninna ibana ma: Hutongos pe di ho sada hambing tunggal sian pagaran. Antong lehon ma tu on sindorna, paima ditongos ho, ninna nasida.

¹⁸Jadi ninna ibana ma: Aha ma sindor lehononku tu ho? Jadi ninna nasida ma: Ba, tintin pijormi dohot horungkorungmi dohot tungkot na di tanganmi. Jadi dilehon ma i tu nasida, dung i ditopot ma nasida, jadi gabegabean ma nasida sian ibana.

¹⁹Dung i hehe ma nasida laho muli, dipasae ma abit tujung i, jala dialithon muse angka ulos habaluonna i.

²⁰Dung i ditongoshon si Juda ma hambing tunggal i marhite sian alealena, halak Adullam i, tumobus sindor sian tangan ni boruboru i, hape ndang didapot disi.

²¹Jadi disungkuni ma isi ni luat i: Atehe hamu, didia do boruboru sibabijalang i, na hundulhundul di Enaim, di pinggol ni dalan i? Alai ninna nasida ma: Ndang adong boruboru sibabijalang, huida hami dison.

²²Dung i mulak ma ibana tu si Juda, ninna ma: Ndang jumpang ahu nasida; jala didok angka isi ni luat i huhut: Ndang adong dison boruboru sibabijalang.

²³Jadi ninna si Juda ma: Di ibana ma i tusi, asal unang gabe haurahonta; ida ma, hutongos do nian hambing tunggal on, alai ndang jumpang ho angkora i.

²⁴Hape salpu arga tolu bulan, tarbortik ma tu si Juda: Tardege pinggol ni dalan do si Tamar, parumaenmi, nunga pola gabegabean ibana dibahen sibabijalangonna i. Jadi didok si Juda ma: Boan hamu nasida tu on, asa sinoksohan nasida.

²⁵Jadi dung diboan halak nasida, marsuruan ma nasida manopot simatuana doli mandok: Sian baoa, nampuna angka indi on ahu gabegabean, ua tanda hamu, manang ise nampuna tintin pijor on dohot horungkorung on dohot tungkot on!

²⁶Jadi ditanda si Juda ma ugasan i, gabe didok ma: Pintoran do hape nasida, asa ahu; ai ala na so hulehon i nasida tu si Sela, anakki. Alai ndang be diparjolma ibana nasida. III.

²⁷Jadi dung jumpang hatotoras ni emena, gabe linduat do di bortianna.

²⁸Tole manubuhon nasida, surduk na sada tangan, gabe ditangkup sibaso i, jala dirahuti dohot bonang na rara, ninna ma: On do na parjolo ruar.

²⁹Hape dung ditait tanganna i mulak, ruar ma anggina i; jadi didok sibaso i ma: Boasa ma tung songon i pamuntasmu? Jadi dibahen ma goarna si Peres.

³⁰Dung i ruar ma anggina i, na martali bonang na rara i di tanganna, jadi dibahen ma goarna si Zerah.